德國working holiday文章連結整理

我亂咁寫果136篇德國working holiday文章的連結整理,以方便各位網友搜尋資料,永久置頂 :

德國生活篇 :

出發篇 : 第一章 至 第四章

慕尼黑生活篇 : 第五章 至 第十章第四十三章 至 第四十四章

柏林生活篇 : 第廿五章第三十章 至 第三十三章第五十九章第六十七章第七十四章 至 第七十六章第111章

德國旅遊篇 : 第十一章第廿六章 至 第廿九章第三十四章 至 第四十二章第四十八章第五十章第九十四章

回程篇 : 第八十八章第133章 至 最終章

 

中歐、東歐遊記 :
捷克奧地利斯洛伐克匈牙利列支敦士登瑞士波蘭

 

北歐、波羅的海遊記 :
瑞典挪威芬蘭俄羅斯愛沙尼亞拉脫維亞 、立陶宛丹麥

 

西歐遊記 :
法國英國蘇格蘭荷蘭比利時盧森堡

 

南歐、巴爾幹半島、地中海遊記 :
斯洛文尼亞克羅地亞波斯尼亞蒙特內哥羅阿爾巴尼亞意大利馬爾他

 

無聊感性扮哂野篇 :

第四十七章第九十七章外傳2外傳3外傳4外傳5

 

飲食篇 :

對唔住我懶,右手邊”外遊美食”一欄search到的~

希望上面既整合會幫到即將出發去德國working holiday既朋友一d小忙啦~

另外遊記系列 日本紀伊半島之旅新加坡快閃3日2夜越南$2000 4日3夜伊朗獨行日本北陸之行汶萊小記已完成,可以係上面既Cover Photo搵到~

至於歐洲隨筆香港膠遊東京雜記台灣雜記韓國雜記系列則不停更新中~

 

最後當然要hard sale下我既Facebook Page : www.facebook.com/Garcia.in.Germany

ging

仲有個Instagram : https://www.instagram.com/fung_garcia/

其他同步的Blog :
DCFever – Fever Travel : http://www.dcfever.com/travel/utravelogue.php?id=799202

Blogspot : http://garcia-in-germany.blogspot.hk/

遊牧爆谷 : https://www.travelpop.hk/bloggers/5365838412513280

Medium : https://medium.com/@funggarcia

有問題想吹水甚至搵交嗌就隨時FB inbox或者funggarcia@gmail.com我啦~

 

Posted in 丹麥, 住宿, 俄羅斯, 克羅地亞, 其他, 列支敦斯登, 匈牙利, 外遊美食, 奧地利, 德國, 意大利, 愛沙尼亞, 拉脫維亞, 挪威, 捷克, 斯洛伐克, 斯洛文尼亞, 比利時, 法國, 波斯尼亞, 波蘭, 瑞典, 瑞士, 盧森堡, 立陶宛, 芬蘭, 英國, 荷蘭, 蒙特內哥羅, 觀光, 阿爾巴尼亞, 馬爾他 | Tagged , , , , , , , , , , , , , , , , , , , , , , , , , , , , , , , , , , , , , , , | Leave a comment

【北馬其頓速遊3】Skopje之夜生活

難得去到外國,夜生活當然係唔少得啦~

係卡拉OK Disco夜店舞會紅燈區,不斷左擁右抱、左右開弓、左右手……….邊度關我事~

對我嚟講,係陌生國度的夜晚當然係睇夜景啦!!!!!

位於山丘上的城堡古蹟Skopje Fortress,離遠睇都知係欣賞華光夜景的一流地點~

更估唔到會意外遇上紅霞映襯,把原本已極迷人的燈火再添艷麗


 

如果對歷史有興趣或係廢墟迷,呢度更加不能錯過~

Skopje Fortress建於公元6世紀,除左係10世紀時保加利亞帝國力抗拜占庭帝國的主力據點外,更見證著塞爾維亞帝國多場大大少少戰爭~

Um~ Well Noted~

知道就好了~ 我中學History考試個位數的~

離開Skopje Fortress,最佳路線應該係直落舊市集Old Bazaar~

有見過鬼佬話呢個係世界第二大的Old Bazaar………

係? 咁伊朗KashanIsfahan果d咩嚟ga……….

Anyway啦,呢個建於11世紀既Old bazaar絕對係反映當地人的真實生活,仲可以搵到唔少又平又正又大碟既美食tim~

但我有個毛病 ——- 去到物價平既地方就好想食豪d~

一支公去fine dining唔得咩~~~~~~~

睇中左The Eye Bridge旁果艘又大又顯眼既木船酒店餐廳Senigallia~

「Mozzarella 芝士牛肉prosciutto白汁豬扒」既濃郁又滿足,「芝士火腿奄列」大份又用料十足

咁樣既Main Course + 早餐 (!?) 加埋飲品都唔使港幣$100,唔好用ok嚟形容,直情係平到嘔呀!!!

望住發達河兩岸燈火,慢慢享受體內脂肪慢慢成長,都係種浪漫呀~

(p.s. 其實係貪心叫多左,鬼知咁大碟咩……….飽到我就嚟要爬出餐廳……..)

食完飯,無酒精落肚點得~

Skopje同其他歐洲首都一樣入夜仍有好多酒吧開門非常旺場~

我個人非常鍾意係正北馬其頓廣場的Craft Brewery Temov @ Kolektiv,係正阿阿歷山大旁邊(打仗果個唔係有阿媽果個),有佢照住非常易搵~

環境氣氛就像朋友家的庭園,聽住現場Jazz Live band再飲啖精釀啤,簡直就係一流享受~

北馬其頓真係一個好地方呀~

如果大家咁岩係聖誕節前後嚟到就正了!

佢個聖誕市集非常非常靚!

明明保加利亞Sofia果個hea到咁,點解比佢更窮既北馬其頓Skopje,華麗程度會比德國柏林有過之而無不及ga???

可能呢d就係肯唔肯用銀兩既問題啦,香港夠錢多啦,妳睇下幾多野幾hea………

更有趣既係,一般聖誕市集都係平安夜就高速清場執野閃人,但Skopje呢度到我12月29號走果日都仍然好開心Merry Christmas!

話之佢呀~ 總之我非常enjoy!

原本想直接講北馬其頓的其他景點,但最終都係決定短短地拆左呢篇出嚟獨立成文

無他ge,因為我真係幾鍾意呢個地方呀!~

下篇講近郊有咩玩~~~~

 

 

 

https://drive.google.com/open?id=1E1bUS2hsfZ1WhA8TAOtZNbhslO0FPsDW&usp=sharing

 

 

 

===================================



IG果邊間中會有d和Blog及fb page不一樣的相片和story,大家有興趣既去follow下支持下啦~


Instagram : https://www.instagram.com/fung_garcia_backpacker/




==============================

相關篇章 :

================================


我既Youtube Channel正式開通啦!!!!

快d Click入 「鋒加西亞 / 旅人瘋語」Subscribe 睇片再禁個like啦!~

岩岩開始,完全未有人睇呀~



=================================

Email : funggarcia@gmail.com


文章同時刊於UBlog、 DC Fever Travel、 Blogspot 、遊牧爆谷Medium,請各位繼續多多支持呀!!!!!!!!!!!!!







Posted in 觀光, 馬其頓 | Tagged , , , , | Leave a comment

【北馬其頓速遊2】 首都Skopje初覽,華麗有驚喜!

係時候開始我係呢個陌生國度 ——- 北馬其頓首都「斯科普里」Skopje的闖盪見聞了~

《漫遊保加利亞9》的尾段,早上5點由保加利亞的Bansko巴士總站出發先回Sofia,再買飛轉車,下晝2點終於到達Skopje中央車站~

上面都講過我sim卡用唔到,唔緊要~ 搵個information centre問下人囉地圖先~~~

喂,無wor師兄

Information centre呢家野平時唔需要就成日見,一要搵佢就唔知去左邊……..

仲要我google map唔記得download定地圖,亦唔知我而家身處既係城市既邊一忽……… 呢種迷失於異鄉既情況真係好耐無試過啦~~~

不過話哂都唔係第一次有呢d情況,定一定神,有大路行大路,跟著人潮一路向北,5分鐘左右已見到路牌指住前方Centre,準呀!

 

 

 

 

 

 

 

 

 

行不數步已見到北馬其頓最長最具代表性的「發達河」Vardar River!

個譯名真係唔得詩意,但條河就真係幾有誠意,至少都乾淨清澈~

而兩岸d建築 ———- 喂乜咁華麗ga咩???

呢個咁窮既地方點會成個歐洲大都會咁款ga?????

市中心乾淨企理,亮麗華貴,感覺就像一個迷你而整齊的巴黎!

 

 

 

 

 

 

 

 

 

 

 

而Skopje素有「銅像之城」的美譽!

市內每一轉每一角,橋上、轉角、樓梯底甚至河中心都有不同姿態風格的銅像,數目多到想每一個都影張相呢件事根本無可能!

呢個做法都幾聰明ar,因為每個銅像背後總代表著一個故事,總有遊客會受其吸引慢慢一一發掘,從而加深了對此國家城市的了解,咁先係發展旅遊業和軟實力之道嗎~

咁香港都有,「藥房之城」定「化妝品之都」好聽d呢?

 

 

 

 

 

 

 

 

 

來到市中心,有作為國家標記的馬其頓廣場,係噴水池中間騎緊馬果個就係阿歷山大大帝,一個讀得西史都會認識既Alexander the Great

如果大家好似我咁中學西史從來無合格過ge,相信都唔多會有大感受

之不過,呢個銅像係型ge!

同埋,我而家開始有興趣想知多d law~

 

 

 

 

 

好不容易係無電話無wifi下聯絡到apartment主人,攪左兩個幾鐘,終於可以放低個袋出去正式行下~

北馬其頓亦是德蘭修女的出生地,在步行大街Macedonia Street就有一座德蘭修女紀念館

另外馬其頓凱旋門、石橋、老巴剎等地都是市中心必到的~

不過計我話, Skopje的city scale好細個城市又靚,自11號車周圍走下已經好開心了~

 

 

 

 

 

 

 

 

 

 

北馬其頓真係意料不到的超驚喜!

唔好話保加利亞,比起克羅地亞、波黑、黑山、阿爾巴尼亞等巴爾幹國家首都,Skopje真係靚太多了!

聽本地人講,原來政府為左吸引遊客,特登將首都市中心打造得美倫美奐,所以相對市中心外先係真正的北馬其頓,真正係好窮呀!

作為一個外人,我無咩權去評論呢個政策,但至少我暫時因為呢個城市的外在美而愛上了

人類係咁膚淺ga啦,第一眼比你揀,你要狄易達定劉以達呀?

 

 

無錯~ 我係北馬其頓Skopje既第一日就係咁亂行一通行到癲左,當然亦攰到癲左啦!

好啦第一回的北馬其頓講住咁多~

下回繼續講下呢個首都有咩睇先~

https://drive.google.com/open?id=1E1bUS2hsfZ1WhA8TAOtZNbhslO0FPsDW&usp=sharing

 

 

===================================

IG果邊間中會有d和Blog及fb page不一樣的相片和story,大家有興趣既去follow下支持下啦~

Instagram : https://www.instagram.com/fung_garcia_backpacker/

 

==============================

 

 

 

相關篇章 :

================================

我既Youtube Channel正式開通啦!!!!

快d Click入 「鋒加西亞 / 旅人瘋語」Subscribe 睇片再禁個like啦!~

岩岩開始,完全未有人睇呀~

 

=================================

Email : funggarcia@gmail.com

 

文章同時刊於UBlog、 DC Fever Travel、 Blogspot 、遊牧爆谷Medium,請各位繼續多多支持呀!!!!!!!!!!!!!

 

 

Posted in 觀光, 馬其頓 | Tagged , , , , | Leave a comment

【北馬其頓速遊1】旅遊資料大全集

北馬其頓,一個講出嚟有人會以為係非洲既國家,但我既保加利亞之旅,突然就轉左去北馬其頓呀!!!!

上回尾段講過苦思緊聽日既旅程去邊好,望到google map ——- 北馬其頓與保加利亞西方接壤,過去唔太難ja wor,數數手指嚟個幾日快閃trip都仲夠時間~
最重要係呢個國家仲未被遊客過度開發,又一個對香港人來說非常冷門的國度!
發掘冷門旅遊國家一向係我呢個blog的宗旨~
計劃趕不上變化,一於大改行程,離開保加利亞,向呢個巴爾幹半島中部內陸小國「北馬其頓共和國」進發啦!

(p.s. 我到步時為2018年12月27日,當時和希臘的爭執未完,國名仍為「馬其頓」,到我離開後個幾月就改名了。為免大家誤會,此系列遊記一律用返現有國名「北馬其頓」)

(圖為國家象徵地標 : 北馬其頓廣場的亞歷山大大帝銅像)

開始遊記前,又簡單講少少旅遊資訊比大家參考呀~

簡單Background
北馬其頓North Macedonia全名「北馬其頓共和國」,位於巴爾幹半島中南部,東臨保加利亞,北臨塞爾維亞+科索沃,西臨阿爾巴尼亞,南臨希臘,前南斯拉夫成員國之一。
首都與最大都市是「斯科普里」Skopje (台譯「史高比耶」)。相傳此國為亞歷山大大帝的發祥地,國民以此自豪。

對國際嚟講,呢個國家最有名的就係同希臘爆發的國名衝突,詳情不在此詳述,總之北馬其頓長年受希臘經濟制裁
又因地處巴爾幹列強中心,幾乎乜鬼戰爭都關佢事,土地分完又割割完又分,連人地唔攪佢時都自己內戰,經濟點會好? 緊係窮到燶啦!
不過近年已經大有改善,上年改名做「北馬其頓」後立刻同希臘friend返,仲入埋北約tim,希望當地人既生活會慢慢變好啦~

有興趣的朋友,自己睇wiki啦~
https://zh.wikipedia.org/wiki/%E5%8C%97%E9%A6%AC%E5%85%B6%E9%A0%93

 

時差 :  夏令UTC+2 ; 冬令UTC+1 ;,即係分別慢香港6 and 7小時,同一般德法意一樣。注意比保加利亞慢1小時的。

貨幣 : 北馬其頓代納爾MKD,低過1MKD的叫輔幣叫DEN,1MKD=100DEN,即係毫子啦~
匯率約1MKD = $0.14港幣,超難計(對我嚟講),計埋唱錢匯率,我一般都係當100MKD係$15港幣,太細數既就篤apps la。Skopje市中心有少量找換店,搵唔到就搵銀行啦,用歐元or美元找換都ok~
注意如果嚟幾日only真係唔使唱太多錢,d物價平到嚇死人,買一兜仔冬甩40MKD=$5.6就比座山我,痴線增值藥水copy出嚟ga??

 

 

 

語言 : 馬其頓語,屬斯拉夫語族,好似話比較近似塞爾維亞語及保加利亞語,啊~ 即係用手語啦! ~~~~~
Skopje市中心某些地方仍可用簡單英語對答,普遍市民皆親切友善,溝通唔難的~

 

簽證
仍然係特區護照全歐洲免簽,過關非常暢順~

(呢張係岩岩過左海關影的~)

Sim card與WiFi
香港部份鴨記的歐洲用sim card並不包括北馬其頓,我去到先發現「死火上唔到網,要check地圖wor!」
好彩多數餐廳都有流暢WiFi,而我亦都無花時間去搵sim卡,反正都係嚟幾日je,download定地圖就無事啦

天氣及衣著
同保加利亞差不多,冬天比起歐洲其他地方唔算太凍~
我去果幾日係12月尾都無落雪,溫度around 4至零下3度左右,Skopje感覺無Sofia咁濕舒服d tim,一件普通羽絨就ok~
不過如果上山,特別去Millennium Cross,我又要變身撒亞蒙面超人啦…….

對外交通 : 
香港人覺得呢度冷門je,外國人就唔係咁睇ga la~
歐洲各大主要城市都~
有航班直飛Skopje Airport,尤以德國為多,但點解我working holiday果陣無發現原來咁方便ge…….

(幾乎所有德國大城市都有廉航,有無咁方便ar…….)

至於陸路,火車只行使來回Skopje至塞爾維亞首都貝爾格萊德Belgrade,或希臘第二大城市塞薩洛尼基Thessaloniki,路線非常有歷史,亦代表慢到痴x線
Rome2rio話少過6小時,但我上次係Plovdiv返Sofia咁近都delay ,呢條路仲舊d睇怕都好難避免…………….

如果坐巴士的話,則要注意有某d城市地理上雖然近d,但可能需時更耐更麻煩
以我的經驗為例,由Bansko打橫直劈去Skopje渣車只需3.5至4小時,但事實係兩地一星期只有數班直通巴士,索價約$460港幣。
貴過飛去德國ar喂!!

反而由Sofia至Skopje的巴士一日數班非常頻密!
於是就變成下圖咁Bansko >>>> Sofia >>>> Skopje,
無錯係勁花時間,係Y字型咁大繞路大白痴! 但點計呢個都係最平同最穩陣既方法!
係…………………睇地圖的確係有個城市可以中途上車,不過我真心係個巴士站度搵唔到果個城市既保加行亞文係咩………………另外亦唔擔保日日都有車呢……..
始終,最保險最安全既做法都係去左全國交通樞紐好d ge

於是我就由Bansko先北上返Sofia,到步後再另買車飛西行到Skopje,車費合共都只係二百蚊港紙! 車程實際用左6-7小時,但因為中間break開左其實唔辛苦,又或者係我坐慣左d十幾個鐘既長途車無感覺啦………..
(長途車既事,可以睇返德國working holiday第五十五章 : 長途車的自處)
注意只有數間巴士公司會賣呢程車,而係出發前資訊總匯集都講過Sofia Central Bus Station的巴士公司其實有成70間以上,記得留意返交通網頁上所講既係邊間公司,唔識就求其衝入一間度問人啦~

(Sofia Central Bus Station)

 

 

 

仲有樣野要注意,坐巴士由Skopje Bus Station (Skopje Avtobuska Stanica) 離開時,就算手上已有車票,都要先到counter比50 DEN 或1€ 稅先入得閘!
我就係唔知呢件事,大安旨意last mins先入閘,攪到要跑返去比錢幾乎走車………

 

市內交通
11號車啦!
Skopje市內City Scale勁細,主要遊覽地點都係油麻地至尖沙咀咁上下距離,
如果要去山上or郊外,咁就坐local bus啦~
Skopje市中心大多數巴士站都有實時預報的電子顯示牌,但有趣的是,並不是每架巴士都會顯示,也不是每架路過此地的巴士都寫明會停係呢個站
舉例說全世界都叫你係呢個站坐25號車,但個巴士站係無寫到25號會經呢處,但結果佢又真係會出現ga wor!
另外雖然某d總站會有timetable,但巴士司機仍然可以按自己的心情狀態隨意早開or遲到,甚至無站都停比人落車,真係好自由ar~~~~~~

(竟然係英國feel的雙層紅色巴士!?)

仲有一樣怪雞事,係Skopje坐巴士只能用SKOPSKA card而不能比現金,即係只有八達通無cash!?
而張卡又只可以係巴士站附近的Green kiosks以180MKD = $25購入,仲要無得退卡refund,好彩都唔係貴,不過比定心理準備大家啦

如果真係等唔到要坐的士,市中心一般唔難搵
基本上d司機都係唔肯by meter的,開動妳的殺價mode吧!
都係果句,還價一半以上係基本,最好一開頭劈個3折,慢慢再加上去,一家傾唔掂就另一家,如果個個講的價格都差不多,你就知那是normal price了~

(呢個樣就係的士,好易認ar~)

(影呢張相,就係因為架巴士打橫霸左3條線嚟調頭………)

住宿
Skopje一樣有hotel有hostel,不過我要介紹既係——— Apartment!!!!
同保加利亞一樣,北馬其頓係booking.com上有非常多又平又靚既apartment選擇,大概都只係港幣$2-300一晚
至於我隨便選擇的一間,600尺新裝修一房兩廳open kitchen,高層落地玻璃開揚美景,包全屋傢俬電器,市中心到等於香港住銅鑼灣登龍街,我一個人住哂都係港幣$250!?
真係窮人恩物,上車最後機會啊!

 

 

 

(露台可以睇到國家象徵阿歷山大大帝銅像,可想而知幾咁市中心!)

https://www.booking.com/hotel/mk/skopje-arch-apartments.zh-tw.html?aid=304142;label=gen173nr-1FCAEoggI46AdIM1gEaGKIAQGYATC4ARjIAQzYAQHoAQH4AQuIAgGoAgS4AsHzneUFwAIB;sid=0fcb1ff5a856d22068654897bc3a8f5b

飲食
一個地方既飲食價格絕對反映到當地人的生活水平
所以就算個城市幾華麗都好,我都仍然幾肯定北馬其頓係一個超窮既國家
市中心遊客餐廳,十幾蚊一杯啤酒,廿蚊一碟雞翼,$40一份main course, 攪到食飯好似唔使錢咁可以亂咁叫
但後果就係小林尊先食得哂………呢度d食物全部份量十足,性價比更高於保加利亞!

(呢碟雞翼有12隻,約廿蚊港紙……..)

至於菜式,一都係一般巴爾幹半島的常見食品,以肉類、燒烤、麵包等為主
有趣地市中心非常多意大利餐廳,並且非常精緻,金額亦只係香港茶餐廳小菜價,絕對係fine dining好地方!
同埋我去好多餐廳都有賣全日早餐(非限於英式)或奄列,唔通北馬其頓人好鍾意食蛋????
其他西式coffee shop, fast food shop, craft beer bar亦應有盡有,係對遊客嚟講平到唔係錢既情況下,好易肥ga………

 

原本想寫多少少第一日既見聞先完,點知又收唔到手幾千字標出嚟…….
Too long can’t read ar………
好啦北馬其頓正式遊記下回先開始,post住少少靚相,比大家先睹呢個意料之外咁精彩既國家先啦!

 

 

 

 

 

 

 

 

 

 

===================================

IG果邊間中會有d和Blog及fb page不一樣的相片和story,大家有興趣既去follow下支持下啦~

Instagram : https://www.instagram.com/fung_garcia_backpacker/


 

==============================

 

 

相關篇章 :
 
================================

我既Youtube Channel正式開通啦!!!!
快d Click入 「鋒加西亞 / 旅人瘋語」Subscribe 睇片再禁個like啦!~
岩岩開始,完全未有人睇呀~



=================================

 
Email : funggarcia@gmail.com

 
 

文章同時刊於UBlog、 DC Fever Travel、 Blogspot 、遊牧爆谷Medium,請各位繼續多多支持呀!!!!!!!!!!!!!







Posted in 觀光, 馬其頓 | Tagged , , , , , | Leave a comment