冬日非自駕沖繩遊 Day2c (Local Tour,萬座毛,掛上英殖香港旗的餐廳?)

Local Tour終於黎到尾聲啦,
Tour行程請睇冬日非自駕沖繩遊 Day2a (Local Tour,古宇利島,屋我地大橋,備瀨福木林道)


下午5:15分左右,我地就去到最後一站萬座毛
萬座毛係一個好似象鼻咁的海蝕拱,
萬座毛名稱的由來係因為琉球時代的一位國王曾經稱呢度為:可以比過萬人坐係度的毛(即原野)。
呢度又真係幾大,幾空曠,
但就好似未必夠比過萬人係度聚集啦。

周圍有好大的草原。

萬座毛的近照,
令我諗起中學時因為修讀地理而去西貢睇唔同的海蝕現象。

海邊超級大風,
我地不停食“西北風”。

崖邊的石頭都被侵蝕到一個個窿。

自拍是常識吧 :P

食完咁耐西北風,
我地臨上車係汽水機買左兩罐暖笠笠的粟米湯,
分別係Pokka Sapporo同Dydo兩個牌子,
兩罐分別都係120円。
我記得右邊個罐無咁好飲,
D味好淡,D粟米又無咁好食。
左面個罐中規中舉,
始終唔及冬日非自駕沖繩遊 Day1b (Naha Main Place,屋台村,第1日就唔見野?)提過個罐Asahi粟米湯咁牛油

之後我地就坐番觀光車番酒店,Local Tour就此完結啦,
總括黎講Local Tour一日去哂多個景點係非自駕的好選擇,
但係有D景點太走馬看花(如古宇利島),
而且一日去咁多地方都有D chur!
但都推薦各位非自駕的朋友參加呢個Local Tour。

番到酒店我地就係大堂的餐廳飲下野,
因為day1 checkin的時候酒店送左welcoming drink比我地!


Drink List 

我叫左Sapporo Premium Alcohol Free Beer,
無酒精的啤酒,
飲落去小麥味+汽,
味道同外表同普通的啤酒都無乜分別。

男朋友叫左杯泡盛
Google一下發現原來泡盛係琉球的特產,
係燒酒的一種。
同普通用日本米製做的燒酒唔同,泡盛係用泰國米製作而成。
琉球人通常會將泡盛倒落冰水入面飲用,
所以餐廳會另外比杯冰水我地。
直接飲泡盛真係好哽,
唔怪得之琉球人會加冰水落泡盛溝淡黎飲啦。

之後我地又搭單軌電車去牧志站,
去國際通行下街&食晚飯啦。
我地今日主要行下藥妝店格下價,
聽日先一次過買野。

當時已經8點幾,
我地都仲未捨得去食晚飯,
竟然去左Pablo買芝士撻食!

我地買左3個mini 版芝士撻。

分別係沖繩限定的紫薯味、朱古力味、芝士味。
總共680円。


行到8點半到,
我地終於去左呢間Sam’s Maui鐵板燒
地址:2-15-13 Kumoji Naha City. code 900-0013
我地食完先發現其實國際通有好多間Sam’s的分店
有D分店仲裝修到好靚。

話說餐廳門口的reception女仔比份韓文的menu我地,
我話唔係,然後指住中文的menu,
個個女仔好驚訝地話Chinese?!
我地心入面都好驚訝比日本人認錯係韓國人,
究竟係一種讚美,定係侮辱呢?


店入面有個非常好客的鬼佬經理 (好可惜無同佢影相),
係咁氹客人開心,
佢知道我地係香港人,
仲用唔咸唔淡的廣東話同我地講野,
非常好笑,
原來佢係香港住過一排,
唔怪得識幾句廣東話啦。
佢仲比左頂水手帽我戴添!


佢仲show比我地睇間餐廳掛住英殖時期的香港旗添,
真係估唔到係沖繩會遇到一個咁鐘意香港的鬼佬!

我地係圍住個鐵板坐,
廚師會係你面前煮野食,
煮完再放上你隻碟。

我地首先每人叫杯野飲,
呢個叫King of the beach sling,
我地叫呢杯野飲因為佢的外表,
而且個杯可以拎番屋企添!
只係1050円(未連稅),
連稅大約HK$79,
超級抵!杯野飲加個杯!

呢杯叫做Shisha Cocktail,
個杯都係可以拎番屋企,亦都係1050円(未連稅)
我地叫左Set dinner 所以每人會有碗湯飲

有沙律,
有幾款沙律醬揀,
但可惜唔係好聽得明店員的日本音英文,
所以求其叫左個醬。

廚師開始煮牛排啦!

仲有麵包牛油,
好似齋食前菜就已經會好飽。

廚師仲會表演下花式落調味粉。

男朋友碟Giant Prawns Imperial & Top Choice Sirloin Steak,3880円(未連稅)
有兩隻大蝦,同埋沙朗牛扒切粒,
男朋友話個蝦好正,面頭個隻醬汁係重點。


我就叫左Top Choice Tenderloin Steak,
呢個係牛柳,有大中細的份量,
叫左細,2400円(未連稅)

總括黎講係幾好食,但又唔係一試難忘個種,
最過癮係有廚師係你面前煮野食&表演。

食到飽飽之際,
鬼佬經理竟然請我地食雪糕!
真係飽到捧住個肚番酒店!哈哈。

我地埋單的時候,
收銀會比個全新的杯比我地,
而且有埋紙盒,
唔洗驚唔知點拎番屋企好 :P
好愉快、好滿足的一餐,總共食左9050円,
大家黎沖繩都好推薦黎呢間Sam’s Maui鐵板燒。

想收到個blog最新update
記得like Facebook Page https://www.facebook.com/fatbjai.travel/

其他文章:
冬日非自駕沖繩遊 Day1a (內附5日行程,港龍)
冬日非自駕沖繩遊 Day1b (Naha Main Place,屋台村,第1日就唔見野?)
冬日非自駕沖繩遊 Day2a (Local Tour,古宇利島,屋我地大橋,備瀨福木林道)
冬日非自駕沖繩遊 Day2b (Local Tour,美麗海水族館,御菓子御殿)
冬日非自駕沖繩遊 Day2c (Local Tour,萬座毛,掛上英殖香港旗的餐廳?)

 

Posted in 日本 | Tagged , , , | Leave a comment

冬日非自駕沖繩遊 Day2b (Local Tour,美麗海水族館,御菓子御殿)


上篇講到我地參加左Local Tour去左古宇利島、屋我地大橋、備瀨福木林道,
行程請睇冬日非自駕沖繩遊 Day2a (Local Tour,古宇利島,屋我地大橋,備瀨福木林道)

今篇繼續遊Local Tour!
12點20分左右,我地到達美麗海水族館

我地由落車處跟住導遊去水族館的入口
又是一望無際的大海!

路程途中見到遠處有島嶼。

美麗海水族館外係海洋博公園
呢度好多大型的網比小朋友爬玩,
如果我細個都有得玩呢D網都一定會好開心!

行左3個字,我地終於到達水族館的門口(呢度真係好大呀!)
BTW,水族館的附近好多美食攤檔,
好多人排隊買野食,
希望我地離開的時候有機會買黎食啦!


入場券獲得!
我地開始自由活動,3點半係旅遊巴上集合。


水族館由親親海星作開始,
令我諗起海洋公園相似的親親海星。

輕輕的掂下舊海星,唔好大力捏佢呀。

呢個好似生左隻角的魚好可愛。

呢堆係沙入面穿插住的小魚亦都好可愛。


呢條魚外表非常特別,好似有好多款唔同style的“觸鬚”。

用螢光燈先睇到的水母。

呢條魚的“觸鬚”非常長呀!

另一款會插沙的小魚。
美麗海水族館入面太多唔同種類的魚!
不能一一細數。

1點半的時候,
我地見到有間餐廳,
肚餓的我地 二話不說就入去食野啦!

呢間餐廳就係水族館最大的魚缸旁!
入面係自助的形式,
搵位,然後排隊買餐。
如果你想坐係魚缸旁的座位,
就要排隊等位啦!

魚缸入面有世界上體型最大的魚類 – 鯨鯊!
偶然會捕捉到鯨鯊游埋黎的一刻。

男朋友叫左碟意粉,味道好似普通的蕃茄意粉咁,但都幾好食。
我個碟外表好似沙律咁,
但係超好食,
面頭係生菜絲&蕃茄,
個底係濃郁的芝士&肉醬飯(好好味!)。
仲叫左兩杯飲品,總共$2367円,約HK$164。

食食下見到有職員著潛水衣係魚缸入面,
佢仲會同魚缸旁的座位的客人打招呼!

食完野我地睇多一陣就走啦,
出口有精品店,
然後有個common area比遊客休息,
仲有美麗海水族館的印章比遊客吸係D明信片度!
(好彩今朝係古宇利島買左D明信片姐)

跟住我地就係common area外面的露天地方睇下風景。

呢度好似去左太平洋小島咁,一望無際碧海。

企高D望遠D

不遠處有個好白的小沙灘。
之後我地就行番去水族館正門的美食攤檔啦。

D美食攤檔都收得7788,
好彩都仲有幾間未收。


我地試下呢間誠もち店的沖繩の燒き

佢有唔同的燒餅口味,
當時得番沖繩的豬肉味,
300円一個,差唔多HK$21一件。

味道有D似曾相識酸酸地的味道(難以形容),
味道係ok的,
但有點貴。

食完燒餅,男友又想食呢間ゆんたくcafe Wan☆彡的鯛魚燒


這間店的資料。

我地買左紫薯鯛魚燒,300$円,
甜甜地的紫薯配上鯛魚燒的整法,味道唔錯,
仲抵食過頭先的燒餅。

之後我地番上旅遊車,
去下一站 – 御菓子御殿 (恩納店)

到站之前導遊派左每人一個御菓子御殿最出名的紫薯撻比我地試食。
試完覺得好正!一定要買番幾盒!

御菓子御殿 (恩納店)的外表好有琉球特色。
店內除左有御菓子御殿的產品之外,
仲有D沖繩特產、精品賣。

我地每人各自買左一盒大(10件)、一盒小(6件),
我覺得係沖繩必買的手信,
有濃郁的紫薯蓉!

我地每人買左一條紫薯脆片,
都幾脆,紫薯味都濃,都值得一買。

男友仲買左一盒雜錦肉乾,
Gyutan Jarky 牛舌乾,
Mimiga Chips 豬耳乾,
Shimabuta Jarky 豬肉乾。

男友覺得3個都好好味,
特別係中間盒豬耳乾最正,夠爽夠咸。

最後一站就係萬座毛
會留待下一篇blog繼續講呢個Local Tour,
夜晚我地仲食左間掛住英殖時期的香港旗的鐵板燒添,
密切留意!

想收到個blog最新update
記得like Facebook Page https://www.facebook.com/fatbjai.travel/

其他文章:
冬日非自駕沖繩遊 Day1a (內附5日行程,港龍)
冬日非自駕沖繩遊 Day1b (Naha Main Place,屋台村,第1日就唔見野?)
冬日非自駕沖繩遊 Day2a (Local Tour,古宇利島,屋我地大橋,備瀨福木林道)
冬日非自駕沖繩遊 Day2b (Local Tour,美麗海水族館,御菓子御殿)
冬日非自駕沖繩遊 Day2c (Local Tour,萬座毛,掛上英殖香港旗的餐廳?)

 

Posted in 日本 | Leave a comment

冬日非自駕沖繩遊 Day2a (Local Tour,古宇利島,屋我地大橋,備瀨福木林道)


非自駕又想去D交通唔方便的景點,
最好就參加Local Tour 啦!
我地旅行前係Klook book左Hip Hop Bus觀光巴士一日遊(路線A)
當時我地搵盡所有優惠code,最後$711.1 兩個人。
Hip Hop Bus仲有唔同的路線選擇可以睇
https://www.klook.com/zh-TW/activity/828-hip-hop-bus-okinawa?aid=6ed3e56f7c8d6767&af_wid=78

我地當時的行程係:

  • 8:00 AM – 9:00 AM 那霸市出發
  • 古宇利島
  • 屋我地(WARUMI)大橋(從車欣賞)
  • 備瀨福木林道
  • 海洋博公園, 沖縄美麗海水族館
  • 御菓子御殿(恩納店)
  • 萬座毛
  • 6:00 PM – 7:00 PM 抵達那霸市

我地揀呢條路線的原因係想去古宇利島、萬座毛&水族館!
而且我地住間酒店(DoubleTree by Hilton Hotel Naha 希爾頓逸林酒店)係其中一個等候接載地點,非常方便呀!

我地搭車的時間係8:15am,
我地係酒店食完早餐,
就早D係酒店門口等車啦,
因為張使用憑證寫住要提前10分鐘等候 (日本人係非常準時架)


我地架觀光車!(係tour途中先記得影)

觀光車去左幾間酒店載客,
大約9點鐘正式起行!早上的陽光好明媚呀!

導遊係一個日本的女士,
佢會用英文同我地溝通,
佢英文都聽得明白 唔會太勁日文口音。

每人會有部機仔,
部機剩係係車上用,
用黎講解車外的景色。
估唔佢會放哂中國同台灣兩支國旗,
真係好貼心,
但佢地都係3號lol,
好可惜無廣東話 :(


天空同個海 幾乎一樣色 好靚呀
9:30am. 我地第一個落車的站 並唔係古宇利島,
而係比我地去下廁所,有間賣下手信的便利店。
係度逗留一陣好快就上車,出發去古宇利島,


就算天咁多雲 海水都仲係好碧綠

我地係車上一見到個海就係咁影相,
事關個海淺淺藍藍的色 太靚啦!

10:30am我地到達第二個落車的站 古宇利島
佢位於沖繩本島北部,屋我地島以北,
呢個站有個小型的市集,
但我地落車 就行左去海邊影相 XD!

呢度似係比小遊艇停泊的碼頭

影完相我地就行下市集,
市集賣好多新鮮的菜&手信精品。

可惜我對呢度的野都無乜興趣

吸引我眼球係呢度的名信片!
好多古宇利島的相都影得好靚!
買左6張名信片,每張150円。

11:00am黎到屋我地大橋
佢係位於名護市,連結奧武島及屋我地島的一坐橋,
我立即興奮地走近大橋影相!

終於黎到屋我地大橋

天氣時陰時晴,總算捕捉到有陽光的一刻。

仲好曬添。

男友影的時候,天氣又有少少變化!

影完相,我地行番上去觀光車啦,
大家睇下沿路D沙係幾咁乾淨,
完全見唔到有垃圾!

屋我地大橋上的景色,望番我地頭先影相的位置。

天空突然滿布烏雲,
但係海水依然好似翡翠般咁綠、咁靚。

之後下一站就係去備瀨福木林道
林道位於一個沿海的村落,
呢條村落種左幾千棵至今已經三百幾歲的樹。
我地一落車就有導遊沿路講解林道特別的樹木,例如夫妻樹。
但係條林道都幾窄,
一團幾十個人,
完全影唔到D樹,
而且好難影到D樹特別之處,所以我地係齋睇無影相 XD

然後有半個鐘的自由活動時間,
(但要預留10-15分鐘行番去觀光車,事實得15分鐘自由活動)
我地對呢個林道無咩興趣,
所以我地就行去海邊睇下海(真係百看不厭!)

行左3分鐘就黎到海邊

呢度有個碼頭仔。

碼頭上面非常大風,好難影到張正常pose的相。

大風到企都企唔穩咁濟呀。


我地離開的時候,個太陽又猛烈番。

我地回程的路中,
有戶人家種左好多花,
非常靚。

忍唔住停低影張相。


我地臨上車離開前,見到呢度有個資訊板,
其實係車上導遊都有比備瀨福木林道的leaflet我地架。


備瀨福木林道 唔同景點的位置圖。

然後我地就去下一個景點沖縄美麗海水族館
我地下一篇blog繼續遊Local Tour!

想收到個blog最新update
記得like Facebook Page https://www.facebook.com/fatbjai.travel/

其他文章:
冬日非自駕沖繩遊 Day1a (內附5日行程,港龍)
冬日非自駕沖繩遊 Day1b (Naha Main Place,屋台村,第1日就唔見野?)
冬日非自駕沖繩遊 Day2a (Local Tour,古宇利島,屋我地大橋,備瀨福木林道)
冬日非自駕沖繩遊 Day2b (Local Tour,美麗海水族館,御菓子御殿)
冬日非自駕沖繩遊 Day2c (Local Tour,萬座毛,掛上英殖香港旗的餐廳?)

 

 

Posted in 日本 | Leave a comment