中央飯店 在今天手機年代，很多時彼此的溝通方式已經拼棄了傳統的互動; 例如你唔會主動打電話去約會朋友，取而代之嘅係用whatsapp、FB Messenger，唔信！？你大可以試吓，今時今日你仍可否記得你其中十位朋友的電話號碼？常言道……時間巨輪係唔會停，但好食嘅嘢就仍然歷久常新。你或者覺得朕係一種不太懂social skill的人，猶如都市隱士般……正所謂大隱隱於市。只要你想找到一刻寧靜，其實毋須遠走他方去避世，有時身處繁華鬧市，一樣可以找到一片寧靜樂土。美食亦然，傳統客家菜早已經被許多世界美食取代，而即食文化更加令年輕一代味覺麻木。甚至……中產嘅新生代已經嚮往一些新派Fusion食肆，亦間接令一些傳統美食沒落。 學生時代好多時去流連元洲街專賣模型嗰間福利，偶爾會經過大埔道一幢住宅大廈，今天經過這暗淡的霓虹招牌下，仍亮着“中央飯店”四個大字，久遺的味覺亦令我這酒徒味蕾蠢蠢欲動，立即致電相約幾位酒友往“中央飯店”一聚。傳統客家菜席上，鹽焗雞這道菜一定榜上有名，但“好叫雞”的朕郤捨棄這道招牌菜式，當夜飯聚菜式有招牌冬瓜盅、梅菜扣肉、貴妃豆腐、酥炸大腸另加味菜牛柳絲炒麵。另有友人自的Macallan 18年, 加上朕至愛的Hazelburn 12年威士忌; 先講梅菜扣肉，老伙記說原來以往廚房用嘅並唔係用惠州梅菜，而係本地石澳梅菜，味偏甜而甘口，與五花肥腩十分匹配，可惜今天嘅石澳已經甚少人再醃製梅菜，所以今時今日食到嘅其實係惠州梅菜矣……另一味貴妃豆腐乃係師傅每天用豆漿，加暖之後再用蛋來凝固，口感簡直順滑入喉，爽！酥炸大腸，絕對是一道惡魔美食，用天然風乾大腸後，再落油鑊炸至金黃鬆脆，但呢個只是第一步曲，佐以炸大腸的自家製酸菜蘿蔔才是一絕，還記得當晚特別叫小二大叔另上多一客酸菜……酒過三巡、飲飽食醉，連炒麵亦吃得一條不漏，當真大快朶矣。價錢絕對大衆化，一定比所謂嘅大集團做得用心。廚藝……未必可以承傳，因為可能廚師亦上了年紀，亦得承認該店是偶有失手。但可以說嘅係……喺中央飯店內，我們係可以食出人情味，呢個係集團式經營的很少可以俾到。而真正做到”大隱隱於市”的食肆，相信我和酒友仍然可以……“信賴中央”矣。 執筆之時並不是當日前往品嚐，上次拜訪“中央”已經是接近4個月之前事。但“中央”係很低調的，正如照片所見，一所優質食肆淹沒於報販、補鞋匠之中，但若你肯去發掘，自然會有喜出望外的驚喜。 共勉之 皇上 ** 中央飯店已經於2017年下旬靜悄悄結業，並不是經濟問題而結束，而係廚藝難以承傳。在今天劣食充斥之下，老牌食肆之結束，對一般大眾可能沒有太大感覺，但對我而言，卻帶有幾許可惜、傷感。
