感謝你的出現！我家有一成員，雖然佢唔係人類，但佢係我家中好重要的一位家庭成員。 佢叫芝Gi，今年7歲，係一隻長毛芝娃娃。2010年8月23日除左係香港人一件大事件外，亦都係佢正式成為我家的家庭成員。當日同老公剛剛睇完戲，突然收到朋友的電話，問我地想唔想養狗，因為佢有個朋友b因為屋企人問題而要將隻狗送比人。朋友知道老公鍾意狗狗，所以想我地過去睇下會唔會收養佢。其實當時我地對於芝娃娃呢個品種無多大的興趣，因為太驚佢瘦弱的四肢會好容易受傷。最後經過我同老公商量下，都係決定由旺角過去西環睇下狗狗的真身。 一輪車程過後，去到西環已經係夜晚。第一眼見到佢的感覺：咦！都唔係好似芝娃娃咋喎！其實芝Gi的身型比一般的芝娃娃大隻，樣貌比較似蝴蝶犬。同佢相處左一輪，發現佢的性格好親人，對於岩岩見面的陌生人即係我地仍然係好nice，一d都唔怕生。同佢玩左一輪後，我地決定食晚飯先，要真真正正商量下收唔收養佢！我地擔心的係可唔可以照顧到佢，因為佢唔係一隻玩具，係一個生命。收養佢就要負上責任，絕對唔可以係3分鐘熱度。而且我屋企的老狗岩岩離開左無耐，實在要認真諗下承唔承受到佢老左會離開的傷心。 就係我地煩惱的時侯，朋友同我地講，原來朋友b已經係芝Gi的第2任主人，第1任主人係一對情侶，因為分左手而唔要佢比左朋友b。依家朋友b又因為屋企人問題而唔要佢！如果我地都唔收養佢，真係唔知道佢會有咩下場！當下我地聽到覺得佢真係好可憐，即使比人遺棄過仍然對人無戒心，仍然都係咁親人！於是我地即刻做左個決定，決定收養佢！ 當我地決定左要收養佢時，我地問第2任主人佢當晚食左野未，佢話未食咁我地再問第2任主人有無狗糧，但佢的舊主人竟然話無，我地個刻覺得好奇怪，問佢如果我地唔接走芝Gi，佢今晚會食咩呢？佢竟然答我地：食麵包！我地起初接養佢時，佢非常瘦而且身上有好多位置都有輕微的皮膚病。我地都唔知究竟佢食左幾多餐麵包！個刻我更加確信我地收養佢係一個明智的決定！ 芝Gi係一隻好乖的狗，返到屋企無吠過一聲，無咬爛過屋企任何一樣野，非常親人，教佢的野好快學識。雖然養左佢咁耐，唔多唔少會有激心的時候，但我好興幸佢可以係我生命中出現，陪伴我同老公渡過好多時刻，包括步入人生大事。 你對我地黎講唔止係一隻狗，你係我地好重要的屋企人，我只希望你會繼續健健康康陪伴我地渡過每一個精彩的時刻！
