我都知而家先講Angelina都實在太遲喇香港都有咯，但我死都要等我喺巴黎先去喎哈因為覺得咁型啲囉哈哈哈(係囉我就係死港女一名)。上次去唔到今次冬天咁凍去飲熱朱古力啱晒！

除左凡爾塞宮嗰間之外巴黎呢間喺羅浮宮附近。我地嗰日去到好似五點幾六點但入面都係好多人而且都要等一兩張枱，排隊既人我諗全部都係遊客。

其實我識Angelina都係因為杜如風當年輯風行全世界去巴黎然後介紹話呢度既熱朱古力係全世界最好飲所以我一直覺得呢個係去巴黎既必去行程之一。果真！杯熱朱古力係超超超好飲！好濃郁既朱古力個感覺就好似真係大大舊黑朱古力溶左就咁隊入口咁，好香好滑！

然後仲點左兩件甜品包括佢好出名既mont blanc 栗子茸蛋糕同一件聖安娜蛋糕(哈我亂譯咋因為個名叫st. Honore) 其實我唔食栗子茸因為好怕甜不過既然佢出名就緊要試。嗯呢個真心好食喎佢雖然都係好甜但係好香好栗子味同好滑我都可以食到五分四已經係超比面，好中意食栗子茸既朋友一定要試！

呢件就係聖安娜哈哈

除左cafe，出面店面有野賣有朱古力有茶有糖有甜品包裝都好靚不過好貴囉。

一月去左個極速三天兩夜hea遊比利時布魯塞爾，喪飲啤酒喪食waffle好正下篇再講。