經過左咁多日遊山玩水. 今日終於到左太座最期待既 Shopping Day. 所以今日既遊記會無咩風景相，仲會有D沉悶。大家見諒見諒。 第一站先到天神. 博多站坐地鐵過去, 3個站 (200日元). 除左坐地鐵, 其實有另一個經濟 D 既方法玩博多天神一帶. 就係坐100日元巴士, 不過我平較懶, 唔想搵巴士站. 所以都係坐地鐵, 快靚正! 100元巴士網頁: http://www.nishitetsu.jp/bus/rosen/100.html 一出地鐵就見到天神地下街既路牌，包保唔會行錯路。 不過原來地下街既鋪頭要10點鐘先開門。而家先9點半。 唯有先去 BIC Camera 行下先。 點知原來行去 BIC Camera 都唔遠。10分鐘左右就行到。 BIC Camera 又係開10點。摸門釘。 咁唯有去附近搵間 Cafe 嘆過早餐先。 食完早餐，BIC Camera 終於開門了。 天神既 BIC Camera 有2間分店. 分別係一館同二館. 留意番2間店所賣既產品係唔同. 如果有時間當然可以兩間行晒. 因為其實2間店相隔好近. 但如果有心水產品想買. 可以先到佢地網站睇下先. 1號館: http://www.biccamera.co.jp/shoplist/shop-026.html 2號館: http://www.biccamera.co.jp/shoplist/shop-018.html 不過講真, 行完 Yodobashi. 基本上都唔係太需要行 BIC Camera. 第一，規模比 Yodabashi 細。就拎 Nikon Counter 比較。 Yodabashi 個 Counter 超大。大量鏡，不論平貴，任玩任試。 相反，BIC 呢度個 Counter 細得黎，仲要得幾支膠鏡放係度俾你玩。 第二，我比較過耳筒同相機呢2種產品，價錢都係比 Yodabashi 略貴。 所以行左一陣間，就落番一樓搵太座。見佢已經係藥妝部苦戰緊。 最後見佢都有小小收鑊。所以我估藥妝部情況應該比電器部樂觀。 之後就同太座分道揚鑣。各自精彩。約定食午飯時再 whatsapp 聯絡。 賣甩左太座，咁我當然做番男人最鐘意做既野啦。。。。 就係去睇下耳筒，單車，波鞋，電腦，太陽眼鏡姐。 如果大家有興趣買蘋果產品，可以黎天神呢度既 Apple Store. 大部份既產品退左稅之後都比香港平。 以13寸既 MacBook Pro Retina 為例。 香港賣緊 $9988. 日本只係賣 $8400 左右。 其實係 BIC 或者 Yodobashi 買 MacBook 可以再平多5%. 但佢地只提供日文 Keyboard, 同我地平時用開個 Keyboard D位有唔同。 但如果你去 Apple Store 買就可以要求要番英文 Keyboard. 去完蘋果吸毒之後，就周圍行下。 行埋 BIC Camera 一號館, ABC Mart, Patagonia, North Face, Oakley, Nike, GU, North Face, 好日山莊.... 所以其實不分男女，天神呢個地方都大把野你行。 雖然唔會幫襯，但都想去一風堂既總本店朝聖下。 一風堂總本店係天神西通附近。位置比較僻，要轉入一條橫巷先搵到。 見到呢間用"木"造既鋪頭轉入去就會見到。 唔好以為總本店個鋪面就好勁。(我開頭都以為會好似彌敦道果D周生生咁大間) 而事實就係咁樣樣。非常"的色"。 我係門口上網再 Confirm 左多一次，呢間真係總本店。 而正正對面就有一間非常吸引既鋪頭 - AKB48 CAFE & SHOP。 但無奈我太毒，無勇氣入去。只能夠係門口影張相。 再行一個街口又一間一風堂。洗唔洗咁誇，多個便利店。 再行前小小，就見到一風堂對手。(聞說呢間一蘭旁邊既藥妝店都幾抵） 行到差唔多一點，見有D肚餓，就 whatsapp 太座係地下街等. 再一齊去開餐. 順帶一提，天神地下街全長600米，有成150間鋪，行一日都行唔完。 我地誤打誤撞，搵到呢間食天婦羅既快餐店。無料扮四條我聽得多，四條扮無料我第一次見。 唔好睇佢門面普普通通。入面既天婦羅飯超好味。極力推介。 之後想係博多再食都搵唔番了。只係係天神有分店。 大家有興趣可以上佢網址睇下，除左九州，日本其他地方都有分店。 https://www.tenya.co.jp/ 呢個定食只係 820日元，而家睇番相都會留口水。 食完 Lunch 就同太座分開再行一陣，搵到呢間 BEST 電器。 見出面好似好強咁，入到去真係"嘩"一聲。完全係一個死場。 姐係好似以前 Chic 之堡，佐敦廣場咁。入到去陰陰森森，員工仲多過客人。 如果你本身想搵下 Cassette 機，錄影帶機既話，呢度可能幫到你。 行街行到悶悶地，就去參觀一下神社。我到而家都唔係太理解點解係一個購物區既中心會有一座神社。 姐係如果係香港有咁既情況，呢間神社一定俾地產商剷平左，再拿拿林起番棟商場。 警固神社 雖然佔地唔大，但一般神社有既設施，呢度都有。 好似手水舎咁。 古代建築同現代建築總係有D夾夾不入。 到左食 Tea 時間，係地下街搵左間 Cafe 食D野，坐一陣，俾隻腳休息一下。 Tea 完之後就坐地下鐵番博多，又行左2個鐘。 天都黑晒，真真正正行左成日街。 成手都係野，番酒店放低D野先，休息一下，再準備出去食晚飯。 眼利既你可能會見到多左一個喼。身為一個土豪，買野買到要買多個喼番香港係好合理。 實情係過幾日就係太座生日，佢一直都鐘意左呢款喼好耐。 咁岩係博多間阪急見到。用左銀聯5% discount 再加 8% 退稅。埋單4千鬆港幣。 雖然唔算平香港好多，但有時D野，旅行買會特別開心。就豪一豪。 下午去完一風堂總本店朝聖，晚上就輪到一蘭總本店。 博多站坐2個站地鐵到中洲川端站，2號出口，一出就見到。 二樓係純粹食拉麵，而一樓就係屋台，好似大排檔咁，除左拉麵，仲有其他小食。 先到二樓既售票機買飛先。 買左一碗拉麵 (790日元) 同埋一隻半熟蛋 (120日元). 之後就根據你個人喜好，填埋側邊份 Form. 再禁鐘叫職員黎收。 隔左一陣，一碗熱辣辣既拉麵就準備好。 好鐘意一蘭呢種 "探監式" 既設計。以前都係睇電視睇得多。估唔到大個左有得試下。 好似爭小小野。。。個聽筒呢? 中州屋台離一蘭總本店好近。食完之後可以順道行過去參觀一下。 行下行下就索性行埋番博多站。其實路程唔算遠。大概行20分鐘左右。 食飽飯當散下步。 但係行到番博多又有D肚餓。。。其實似口痕多D. 於是搵左間居酒屋。飲杯啤酒，食幾串串燒。 呢度有個小插曲，話說呢間居酒屋係無中文 Menu. 咁都唔緊要啦，漢字唔多唔小都睇得明既。 不過我都想查下其他純日文既食物係咩黎。 就打算用 Google Translate 幫下手。 咁岩隔離坐左一個白領大叔。可能以為我地連漢字都睇唔明。 就主動用英文同我地逐樣逐樣食物翻譯。 以日本人黎講，佢既英文算係好好。但有D食物確係好難翻譯。 佢就搞盡腦汁用身體語言話俾我地知。 雖然呢個係一個小小既幫助，但我真係好感激呢位大叔。 大家都知日本人係一個比較內儉既民族。 要佢地嘗試踏出第一步同外國人溝通已經唔容易。 而且仲要用佢地唔熟悉既英文。 所以我真係好感激佢既幫助同欣賞佢既勇氣。 呢一件事之後，當我係香港見到其他遊客需要幫助既時候，都會主動幫忙。 但呢件事同時令我想起另一個陰暗面。可能大家都聽過一個日本白領既故事。 日本白領一般放工都唔會即刻番屋企。 因為如果你準時番屋企的話，就代表你係公司無野做。 又或者表示你同上司既關係唔好，放左工都唔洗去應酬。 所以一般白領就算放工無野做。都會一支公去呢D居酒屋 Hea 到夜一夜先番屋企。 咁鄰居同屋企人就會覺得你係一個成功既事業型男士。 我好希望我估錯。。。。。 最後埋單叫左8串串燒，一杯啤酒，一杯烏龍茶先 1770 日元。 有無搞錯。呢個價錢係香港飲2杯啤酒都未必得。 係今日結束之前，我嘗試畫左一個天神地圖，希望幫到大家。
