我真心覺得屋企張床有膠水，令我每朝早賴床賴到最後一秒鐘先起床梳洗趕返工，特別是天氣開始轉涼，我明知已經遲到都仍然同床舖難離難捨想抱緊些。 早上的時間爭分奪秒，賴床的時間是珍貴的，襯衫的時間是奢侈的。 有時都好羨慕阿奀天天恤衫西褲，立好個頭就可以出門。我身為一枚平凡中環辦公室淑女，無奈不可以著太hea上班，所以入手一些穩陣大路的衫褲鞋襪藉以減少每朝早襯衫的時間是常識吧。以下10樣是我認為很重要的衣物，會一星期五天無限loop的上班裝束： 第10位 腰帶 Waist belt 專業推介我的十大，第10位係皮帶，單色連衣裙加上一條幼腰帶立即令整體感覺不致太單調沉悶。我有時候會加在腰部較上位置，視覺上被拉長，即係扮長腿。 第9位 鬆身上衣 Blouse 鬆身上衣襯長褲得、短西褲又得、裙亦得，但卻沒有恤衫般正式。我很欣賞這種懶悠閒的穿衣風格，單穿已可以出門，若果天氣冷可以再加一件Blazer擋風。 第8位 黑色高跟鞋 Black high heel 見客開會出席飯局event，怎能少了一對舒服百搭的黑色高跟鞋呢？我屋企及辨公室桌下都放著一對黑色高跟鞋以備不時之需。點解黑色？因為易襯。 第7位 背心 春夏時分的街道天氣暖但辦公室冷氣永遠大，當然單穿背心實在太over，背心加針織薄外套便成為我的日常上班碌。其實乍暖還寒的秋天都好適合著鬆身背心襯Blazer。 第6位 窄腳高腰長褲 Skinny high waist trousers 窄 腳高腰長褲襯平底鞋就平易近人，襯高跟鞋側性感可人。okok，真正原因係窄腳長褲可以扮腿幼加上高腰款式比例上更顯腿長。 第5位 平底鞋/婆仔鞋 唔洗講喇掛?! 第4位 大手袋 如果你同我一樣有需要隨身攜帶電腦或帶文件歸家搏殺，一個足夠放A4 SIZE的大手袋係好重要。朝早趕時間，唔係仲要我拎電腦袋/紙袋加手袋嘛? 梗係一個轉身拎一個手袋就衝出門口，成件事快狠準，殺人不見血。 第3位 針織薄外套 襯第2,4,5,6,7,8,10都得，佢陪我渡過好多個趕時間上班的日子，令我同床舖共處多一秒得一秒。第3位你實至名歸。 第2位 黑色連身裙 Little black dress 如果黑色連身裙在我的衣櫃消失，我應該生存唔到，因為我要花大量時間搵衫著而導致日日遲到，最後被辭職。咁講係誇張左D，但飯焦夠話有朋友移民因為怕左年輕人咯，我都唔係最誇張姐! 黑色連身裙係好方便呀嘛，連襯上下身的時間都skip埋。 第1位 西裝外套 Blazer 曾經我以為一件針織薄外套已足夠我橫行辦公室，直至我遇見佢－西裝外套。西裝外套無論搭配連身裙/背心/恤衫/西褲還是牛仔褲都很適合，好搭程度絕對無得輸。現在的我一件背心連身裙外搭西裝外套，加一雙英倫鞋就出門上班去，跟醫神搭港鐵一樣，既方便又快捷。 以上圖片全部在一個好鍾意同其他牌子crossover的fashion brand官方網站下載。 我純粹貪方便，如因此引起閣下購買意慾...咁都無計啦。 Blog: http://kongleicouple.blogspot.hk/
