上次介紹左幾間三十蚊以下嘅糧尾午餐精選(未到糧尾都想睇下)，今次講下價位高少少嘅食店，全部都五十蚊有找，等大家月中嘅時候多個選擇。 樂香園咖啡室 (Openrice介紹) 地址:中環機利文新街8-12號地下 阿奀話黎到蛇竇梗係叫滑蛋蝦仁飯同滑蛋叉燒飯，死都唔俾我食其他飯，亦漠視我係等飯期間不停依依um想食薯仔炆雞翼飯嘅訴求。我一試，果然有料到，蛋好滑而蝦好有蝦味，三十幾蚊性價比極高。阿奀回應我一個「我都話架啦，成日瓜瓜嘈」嘅眼神，然後低頭繼續食佢碟都係好好味嘅滑蛋叉燒飯。 阿奀和阿多推介: 滑蛋蝦仁飯、滑蛋叉燒飯 陳泗記大排檔 (Openrice介紹) 地址:中環士丹利街74號 (即係小雨天對出) 同事提議試下大排檔風味，想回味下讀書時期食頹飯嘅日子，所以我地黎左陳泗記。望左望右見呀姐無停手不停煎蛋擺午餐肉，而大部分中環人都係食緊餐蛋飯，咁我都跟機試一試 一客餐蛋飯連飲品盛惠三十八大元 (岩岩上星期同阿奀再去已經加到四十蚊)，有三塊尚算厚切嘅午餐肉同兩隻太陽蛋。我最欣賞呢三塊午餐肉，煎得香而且有少少脆，份量亦唔欺場，飲品仲可以揀支裝可樂！同事揀左鳳爪排骨蒸飯，賣相吸引但就覺得有點辣。 阿多推介: 餐蛋飯 (阿奀話: 想食午餐肉，我煎俾你食得啦) 龍記飯店 Lung Kee Restaurant (Openrice介紹) 地址:中環域多利皇后街12號地下 (即係759 Kawaiiland、南記隔離) 只要一齊食飯嘅同事數目多過四個 ,我地就會提議黎龍記，但龍記一到Lunch time就好多人，想食就準時過黎排隊喇。佢嘅燒味雙併飯質素高，每次上枱都排到靚靚，令人食指大動，次次我都食乾食淨先醒起自己又唔記得俾手機食先。我最鍾意叫油雞併燒鴨，四十幾蚊食到我歡欣又愉快，哈哈哈 Blog: http://kongleicouple.blogspot.hk/
