繼上次住過文華東方酒店既海景客房之後，一直被官網上的套房浴室照片 引住。一生人可能只會遇到一次香港酒店大減價，又適逢有節日慶祝我哋就預訂左文華東方酒店既海景客房！體驗一下這個極之豪華既浴室。即刻去片！！由於係第二次入住，酒店係入住前已經有聯絡我哋詢問入住原因。知道我哋係去慶祝週年紀念又主動提出送上文華Signature 既Cheese Cake 同問我哋想點樣佈置間房，真係好貼心既安排。一入到房間就已經被呢個咁靚既佈置 引住！雖然之前都知道會有佈置但係諗唔到係咁有心思同咁Ig-able ~ 之後我哋再行入啲套房就係重點啦！ -- 大大既浴缸係浴室既正中間而且個View仲係望住維港！ 可以望住呢個view浸浴真係所有煩惱都會無哂 （除咗錢之外。。。～哈哈）再睇埋套房既Bathing Amenities! 上次係客房用既係 Diptyque 而今次套房竟然係用Jo Malone! Jo Malone 既香水就用得多！但係用Jo Malone 黎沖涼又真係未試過～ 值得一提既係呢間套房除左係浴室對正維港可以望到摩天輪之外，客廳個景都不容錯過。因為呢文華既套房大部分都係係Corner suite，所以都有2 種唔同既景觀，等你係房入面坐一日都唔會覺得悶！ 今次我哋住既呢間房就係客廳望皇后像廣場，雖然中環真係成日都會經過但係可以舒舒服服咁坐係酒店房入面望住中環既日與夜真係一個好難得既機會。 睇完 景就到食晚餐既時間，晚餐方面同上次一樣我哋都係選擇咗in-room dinning，係客廳一邊品嘗頭盤，主菜，甜品再望住中環商業大廈既燈光，呢個體驗真係好香港！同時亦覺得香港真係好靚～ 晚餐過後就要做下運動！原本以為對文華東方酒店既Gym Room唔抱有太大既期望因為佢始終係一間有歷史既酒店，但係一打開Gym既門又覺得以一間咁有歷史既酒店後講真係算唔錯！ 設施應有盡有，而且仲有專人教你用設施同埋測體脂既機（仲會出埋一份Report俾你！）雖然渡假既時候最唔想就係睇到自己既體脂比例同帳單，但係呢個服務真係好好！平時係Gym要做呢個機要問Personal Trainer嫁，係酒店做就唔驚佢會Sell你 Join 唔同既課程減肥啦！去完Gym就順便去望下佢哋既泳池～文華東方酒店既泳池係一個比較迷你既室內泳池，雖然唔係infinity pool 但係佢都有一個大屏幕顯示住香港既景色～咁就係室內都可以想像自己係出面游緊水。 最後返到酒店房又係沖涼既時間！係呢間套房放得最多時間就係呢個浴室。夜晚行入浴室感覺又唔同咗，好似成個格調又再提升一個等級咁！真係太太太太豪華啦！！ 完成呢個奢華浴室之旅之前，我哋既早餐就係快船廊食早餐buffet。雖然早餐Buffet既位置不大，但係所有菜式都應有盡有。Egg Station, Noodle Station, 點心面包等等全部都好好食！如果唔想係房入面叫一set既早餐，我哋覺得快船廊既BreakfastBuffet都幾值得食。
