相約好久不見嘅舊同事茶聚，選擇左旺角呢個中心點。 樓上cafe雖多，但略嫌無乜新意。比較熱門嘅coffee shop，又太多人好嘈雜。 搭小巴經過洗衣街，見到有間環境好似不錯嘅cafe，就同朋友一齊行過黎呢邊。 點擊圖片放大 近太子方面嘅洗衣街相對旺中帶靜。Coffee Talk店面設計簡約，主要都係梳化位置，於是我地就入左去。 店入面嘅環境舒適，唔會有壓迫感，邊食野邊傾計，傾足三個鐘都未夠喉。私家廁所位於店舖外嘅一個天井位置，環境十分乾淨，唔錯。 Table Stand正推介一系列牛油果食物，作為牛油果控，即刻選定左鮮牛油果牛奶沙冰。唔知大家有無飲過越南嘅牛油果沙冰，非常rich，女仔黎講什至可以當正餐。呢度嘅牛油果沙冰相對無咁咁杰身同重牛油果味，但都好香滑，而且唔會太飽濟。 朋友要左杯hazelnut latte，我無試到，但佢飲完一啖即刻表示滿足。 兩點半嘅下午茶時間，我地都無食過野，決定叫一碟野生雜菌意粉配黑松露汁，再黎一個小食拼盤。 食物份量之大令我地驚訝，首先係雜菌意粉，每人可以分到三四碟，而且配料甚多。黑松露香氣十足，意粉入味彈牙。 小食拼盤包括大啡菇、四隻雞翼同脆炸牛油果蕃薯，件件都好大份，伴碟嘅沙律亦唔惹小。 大啡菇十分juicy，上面嘅焗芝士香脆可口。 雞翼方面，我地揀左辣味。面頭嘅辣醬辣得過癮，入面嘅肉都好入味。 一開始以為脆炸牛油果蕃薯係一款食物，包含牛油果同蕃薯蓉，原來係分別炸香牛油果切件同小蕃薯。牛油果通常被當配菜，咁樣切件然後酥炸實在十分特別。 兩個人埋單$280，食到好飽好滿足，亦坐得十分舒服，都算旺角區中嘅一處小清新cafe。
