一天只做一件事 之 行大運暨 一尖三咀過四灣 有過行鬼手既經驗 今次好好調整步伐同心情 慢慢地去欣賞沿途既山水同風光 五點十喺北潭凹 簡單熱身 戴好頭燈 就踏上漆黑一片既路途 途經赤徑 再拾步而上 向一尖出發 到山腰既時候遇上日出 深怕沿路都要曝曬而去 好在到米粉頂既時候 雲層蓋頂 令到今日既路程舒服一啲 要為三咀分難易既話 我會話係先苦後甜 米粉咀下降同上升既幅度最大 短咀相對路窄（仲遇到幾隻牛棟喺條路中間添） 長咀則升降不大 比較平緩易行 四灣嚟講 印象比較深既 都係離開東灣上山既路上 literally係要排隊上山 等咗最少有十分鐘 另外就係喺鹹田灣補給 要等到大半個鐘先上菜 都耗費咗唔少時間 同鬼手一樣 呢條考牌路線既尾段都算唔上輕鬆 樓梯 斜坡 接踵而來 輾轉波折十幾個鐘 先到達終點西灣亭 新年祝各位山友 越行越有 上落平安 恭喜恭喜 祝我自己航拍唔好再壞MicroSD 路程：北潭凹 - 赤徑 - 大浪坳 - 蚺蛇坳 - 蚺蛇尖 - 米粉頂 - 米粉咀 - 短咀 - 長咀 - 東灣 - 大灣 - 鹹田灣 - 西灣 - 吹筒坳 - 西灣亭 歷時：十一小時三十分鐘（包括兩小時三十分鐘休息及拍照時間） 交通：乘九巴94號至北潭凹即可起步 離開則可於西灣亭乘村巴或的士離開 喜歡的話 歡迎追蹤訂閱我的 YouTube: https://www.youtube.com/c/zantriz Instagram: https://www.instagram.com/zantriz/
