一天只做一件事 之 環湖出咀摸鬼手 好耐未試過一日淨係做一件事 五點左近出門 飛的直剷入烏蛟騰 六點起步 天都未光 為咗早啲到埗可以影多啲素材 一路行 不斷行 冇乜休息過 八點到鹿湖峒 十點到鬼手 早起的鳥兒有蟲吃 果然成功錯開人潮 亦影到唔少獨照 但閒蕩一個鐘之後再起行 發現大腿開始有疼痛 可能係因為起初13K走得太急 又可能係行裝太多太重 對肌肉負荷太大 只可以且進且緩 用多四個鐘先上返船灣郊遊徑 以為終於到達痛苦既終點 點知只係起點 郊遊徑不斷升降 又滿途浮沙碎石 到路程末段都冇得輕鬆度過 於是乎 帶住疲備既身心 又行多兩個幾鐘 先走得到大美督 30K冇退出冇補給 由天黑 行到天光 再行到天黑 完美 倒不如完成 呢句說話 正好用嚟概括呢條考牌路線 路程：烏蛟騰停車場 - 船灣淡水湖郊遊徑 - 馬頭峰 - 赤馬頭 - 雞仔峒 - 橫嶺坳 - 大峒 - 觀音峒 - 紅石門坳 - 石芽頭 - 鹿湖峒 - 跌死狗 - 鳳凰頭 - 鳳凰笏頂 - 鳳凰尾 - 白角山 - 昂莊山 - 大嶺 - 黃竹角墩臺 - 沿岸左行至鬼手岩 - 原路返回至鳳凰頭 - 左取平緩林徑（不上跌死狗）- 船灣淡水湖郊遊徑 - 鵝髻頂 - 虎頭沙 - 三門山 - 砵樹環山 - 長牌墩 - 伯公咀 - 東頭洲 - 主壩 - 大美督巴士總站 歷時：十二小時（包括三小時抽筋、拉筋、休息及拍照時間） 交通：乘小巴20R至總站即可起步 離開則可於大美督乘巴士或小巴回大埔墟港鐵站
