今年是結婚30周年，加上太太的生日，決定去檳城及怡保自駕及自由遊玩六天。臨飛前有颱風，提前預訂了的士，但當飛的前一晚已經改掛8號風球，怕的士會取消，決定改訂用開的私人七人車，因為打風要加多少少，車費就貴了平時的士壹倍了。 整晚睡得不好，晨早4時半便起身睇下航班是否延遲。航班正常，司機亦按時到屋企樓下接我們。去機場沿途風平浪靜，只是間中有雨，不知天文臺為何掛8號風球。 航班準時登機，但機長說人手問題要延誤少許起飛，但最終提前了少許抵達檳城機場。現在馬來西亞已經使用電子入境申報，唯有掃描QR code 一路排隊一路登記。排隊半個鐘左右便過了關，行李已經在輸送上。 今次租了三日車，第四日中午在機場還車。租車是部馬來西亞國民車Proton，因為是最平，每日約200馬幣 (HK$400) 租金左右。部車雖然只行了2萬公里左右，但馬力明顯不足，噪音又大。加上馬來西亞的道路指示不足，行錯了兩次路，雖然已經行高速公路，差不多要3個鐘才抵達怡保的酒店。 酒店是新裝修，check-in喺頂樓，樓下有7仔便利店，部車就泊地牢停車場，完全免費及有保安睇著。在房間稍為休息下便去附近的舊街場行下，特別是二奶巷及三奶巷。在二奶巷食了個雞旦仔雪糕，兩個大雪糕球及配料，只是18馬幣，直係抵食。 食完在附近拍下照，便行10多鐘去Mural Art's Lane去看下。成條巷仔牆上都畫有不同的繪畫，有中國、馬來、印度主題，但最新已經是2020年了，很多繪畫已經開始褪色。 返回舊街場想去何人可博物館睇下，但只是開放至下午四時，已經關門了。怡保出名其中一度菜是芽菜雞，但很多都要走路15分鐘在Mural Art's Lane那邊，而且很多6點已關門。最後在附近找了間麵店，點了兩個四寶麵及飲品，四寶麵類似香港的車仔麵。 由於一大早起床，有點累。返回酒店冲完涼很快便上床瞓覺了。
