今日禍不單行，朝早準備出車時發現後轆漏咗氣，用咗半個鐘換胎。去到60km左右第三個爬坡後發覺前轆爆胎，由於只帶了壹條後備胎過來，唯有喺路邊補胎。可能啲胎貼過咗期，補好打氣去到20psi就再漏氣。 無計可施之下唯有出絕招截順風車，第一個韓國大叔開部pick-up停車，我用翻譯軟件話想去最近嘅單車店，大叔話冇問題。大概揸咗15分鐘去最近嘅城市Namji，第一間單車店冇開門，第二間見開門佢就放低咗我，我同佢講聲多謝咁佢就開車走人。 呢間單車店話無16吋內胎，我睇Google Map重有兩間單車店，不過要行成半個鐘。最後搵到間阿伯見到部小布都好愕然，卒之搵咗一條尺寸差唔多嘅內胎幫我換上去，仲好好人幫我調教埋前後嘅brake。全部費用只要15,000 won，大概90蚊左右。 單車店好近單車路線，返回去繼續行程，原來只剩下30公里左右。大概6點抵達目的地壹個叫Susan嘅小地方，check-in酒店就出外搵嘢食，碰到壹對外國人夫婦，都係踩四河，明日亦會去到終點站嘅洛東江河口。
