今日係喺鹿特丹嘅第一日，晏晝約咗家姐佢哋飲茶，朝頭早就出去行一個圈。沿着河邊行咗四個公里之後就回頭，總共行咗差唔多7公里一個半小時左右。 中午同家姐佢哋飲茶，係喺鹿特丹市中心碼頭嗰邊，間中式酒樓好似係以前沙田華舫咁建喺河邊，泊好車行上去飲茶。點心都唔錯，但係人唔多，飲完茶要姐夫車我去骰仔屋嗰邊行吓。 骰仔屋係一群正方形嘅屋，不過以一個角度興建，所以都幾奇特。裏便有個博物館可以上去參觀，收費係三歐羅。可以睇到屋內擺設因為斜面比較多，所以都要花盡心思。 睇完骰仔屋就行去對面嘅Markthal睇吓，係一個集市場，飲食及住屋嘅建築物。樓下係市場及飲食場所，屋頂就係有繪畫，樓上就係Apartment。 再由Markthal行半個鐘頭左右去鹿特丹中央火車站旁邊嘅Zwaan Bikes單車店睇吓，有不少Brompton小布單車，同款價錢比英國嘅貴$1000左右，但都係比香港平兩千蚊。但如果扣除運費等因素其實只比香港平少少。 睇完單車就去旁邊嘅單車停泊場睇吓，除有除咗有單車店及租車店之外，裏便泊滿幾千部單車，估計係比踩單車過嚟再轉火車嘅人使用。 跟著坐火車返回家姐餐館附近的火車站，在家姐餐館食晚飯。
