今天去另外一個好多香港人落腳嘅地方Colinda。由於約咗朋友喺Bang Bang Food Court間酒樓1:30去飲茶，打算係提前個幾鐘頭去Colindale睇吓，所以上晝就有兩個鐘頭左右決定去Hyde Park行吓。 因為地鐵要轉車，所以決定坐巴士過去，喺Marble Arch落車，行過去就係Hyde Park。由於Hyde Park都幾大，見冇乜人，攞個個航拍機出嚟拍下Hyde Park嘅景色。跟住行去戴妃紀念噴泉行吓，10點先開門，要等一陣先可以入去睇吓。 睇完之後行去Knightsbridge搭地鐵返酒店，攞啲嘢俾朋友。未到12點就已經去到Colindale地鐵站， Colindale Gardens就係喺地鐵站對面，入去個Show Room睇吓，最新一期嘅apartment兩房單位都要525,000鎊，如果中高層或者係方向比較好啲嘅，可能都要55至60萬鎊。跟住行去另一個屋苑Beaufort Park睇吓。 Beaufort Park發展比較早，所以樓下啲舖頭都基本上開晒，有餐廳、美容院、雜貨鋪等等。由於風都幾大，所以隨便睇吓咁就行過去Conlindale另外嗰邊大街。由地鐵站行去大街都要10分鐘，兩旁都係啲舊嘅排屋。大街兩邊都有apartment，有超市、麥當勞、KFC等。朋友打電話過嚟話係提早到咗，咁我就係入去龍鳳行超市行吓，跟住過去隔離嘅酒樓會合朋友去飲茶。酒樓嘅點心都OK嘅，腸粉都唔錯。食完就朋友話係去樓上嘅Food Court行吓，都有十幾檔嘅東南亞及中式美食檔，人都幾多外國人都唔少。 行完同朋友行返去地鐵站嗰邊，朋友就搭車走，我就坐返地鐵落去市中心。
