門票寫明「無嘢玩」？實測元朗448農莊！ 炎熱夏天總算過去，秋意漸濃最適合帶小朋友戶外放電。 香港各式各樣不同大小農莊你去過幾多個？ 元朗448農莊莊主更在網頁及門票後刻意標明農莊「無嘢玩」？！一於走一趟親身體驗一下！ 我地由元朗市區開車過去，只需要大慨10多分鐘車程，車路直入到尾，唔洗左兜右兜，不過要留意泊車地方唔算大，車位先到先得，當日我哋中午12點多到達，都順利泊車👍🏻 農莊地址：元朗欖口村欖堤東路直入到尾（Google 搜尋欖堤東話448農莊都可以輕鬆搵到） 去到農莊門口，見到有隻小朋友身高嘅恐龍迎接你，穿過鋪滿草藤嘅小栱門，映入眼簾先是左右兩片小花海，由於夏天過去，衣家並唔係欣賞花海盛開嘅最好時機，但莊主仍有按季節性繼續栽種合適植物及盆栽。 經過左邊花田，門票於綠色鐵皮小賣部發售。 小賣部主要販賣飲品、杯麵同小朋友至愛嘅Bubble，想入到黎先填肚嘅朋友記得食飽先入園~ 睇睇地圖，農莊規模唔算非常大，但規劃很好，指示清晰，打卡位亦非常多，感受到莊主用心打理。 除了小賣部旁邊茶座，最矚目一定係小賣部前草地嘅懷舊雙層紅巴士，可以隨意上落及登上司機位，上層於早期時更改建為Cafe 格局，鐘意打卡嘅朋友可以帶備小食同飲品甚至帶束乾花去chill chill 影靚相~休息一下。 離開草地，進入設施範圍，有沙池有花園，更有個室內木製遊樂場，全部均是免費遊樂設施，山頂區與野餐區中間還有條彩色特長滑梯，每個小朋友樂此不疲地跑上小山坡滑落黎，而星期六日、假期更可參加親子工作坊（價錢更新至10月24 入園當日），但由於我小朋友太細未識玩，所以今次就未有參與。 🌱項目收費🌱 🌟土窯雞工作坊 $280/隻 *需預約* (雞一隻約2斤半重，一齊醃製雞） 🌟自制雪糕工作坊 $50/份材料 🌟縮畫工作坊 $50/份 🌟焗畫工作坊 $55/份 繼續向前行，到達小動物區，除了羊群放牧之外，兔仔區、爬蟲類區及陸龜區都集中於此，小朋友見到戶外陸龜區都表示好驚喜，逗留好耐，而媽咪我望住龐大陸龜慢步之後表示有點想瞓覺😆 另外，牧羊區每日都有免費餵羊體驗，只要留意場內廣播前往餵羊區，就有工作人員派發麵包條餵羊。 旁邊花圃有洗手區，玩完可再到隔離兒童樂園玩吹氣跳彈床，可惜當日彈床進行維護，要到下午4點先再開放，我哋就咁錯過了~ 想放盡d 電，淨係玩設施當然唔夠，可以帶小朋友行上7區「山頂」，唔洗驚，其實約20步就到另一區，每一區都有個小草地，有人野餐有人紮營，沿途花草樹木飛鳥蝴蝶，大人輕輕鬆鬆，小朋友又可感受一下行山之樂趣。 其實農莊內有規劃到野餐區及露營區，分門別類後，露營嘅朋友可以靜靜不受打擾，而且更有女士專用洗手間及淋浴間，打理得好乾淨，非常體貼。 最後，要介紹一下「大草原」，有個小舞台，大草地，非常非常適合舉辦各大小型活動，婚禮、生日會、團體包場等等，而且此為寵物友善農莊，搞寵物聚會都無任歡迎。 總結： 打卡位多，農莊內設施豐富，規劃完善，人流唔算多，感覺非常舒服。 適合逗留半日野餐。 如果選擇夏天花草盛開時入園會更完美。 農莊營業時間： 星期三至日 09:30-17:30 地址： 元朗欖口村欖堤東路直入到尾（Google 搜尋欖堤東話448農莊都可以輕鬆搵到） 收費：（收費已作調整，請自行WhatsApp 與農莊查詢） 星期六日及假期-大小同價$100 (舊客$80) 星期三至五$50 未滿3歲 免費 預約： Whatsapp 6684 1448
