ETUDE作為一個CP值極高既品牌，為人熟知既唔應該只有各款大熱既眼影盤，今日我想分享下ETUDE我覺得非常值得入手既產品🤗 💖Tint My 4-Tip Brow造型眉彩梳 筆頭由4個筆尖組成，畫出黎就似水筆狀咁，如果係護膚、化妝步驟前用，佢基本上係好持久，點捽都唔會甩，佢既筆頭用唔同角度畫，可以仿眉毛，打平橫畫又畫到眉尖尾效果，我自從去泰國買過黎用，出海都唔甩之後，基本上有咩戶外活動都會用佢，係對於新手黎講，因為一落筆就無得返轉頭，真係要本身畫眉有一定熟悉程度先建議用 💖Super Slim Proof Pencil Liner & Brush Liner纖細防水眼線筆 / 尖細防水眼線液 我本身自己畫眼線都係比較鐘意眼線筆款，因為畫左之後邊緣再用硬身眼影掃推鬆開，會比較自然同柔和，哩一款眼線筆本身係1.5mm轉動式筆頭，少左需要刨筆既麻煩仲要防水防油添，不過眼線拉長位我自己就鐘意尖端收尾，所以就用返同系列既眼線液，都係防水防油而且畫起上黎就好順滑，隻啡色係偏淺少少但勝在同樣夠自然 💖Curl Fix Mascara輕盈鬈翹睫毛液 新推出版本比之前既用落更加輕盈，基本上疊加4、5次都唔覺得睫毛重左然後跌落黎，刷頭亦都由本身彎曲設計變左直身，係取量方面比之前更平均更易控制，不過係濃密度差少少，我自己之前用其他牌子Mascara因為效果麻麻但又唔想浪費，就都有用佢地既睫毛top Coat同Base黎補補數，前者係增加防水度、後前係濃密度，用左之後效果係唔錯，不過宜家直情用返ETUDE既Mascara就基本上係放係屋企既預備席 💖Fixing Tint 不脫妝水感霧面唇釉 哩一款我係首先買左4號色先，用左之後就即刻買埋其他色，由於本身係唇釉，會比其他霧面唇膏更加易handle，而且少少分量已經顯色，霧面得黎又唔會突出唇紋，等佢乾左仲唔會甩落口罩，不過我個人覺得佢出既顏色太少，由其本身1至3號色都比較相近，如果之後可以出更多色就好 💖Contour Powder立體輪廓修容組合 一盒有齊深淺修容粉餅，其實對於打陰影非常方便，而且佢既色調不偏紅不偏灰，會更適合亞洲人既膚色，淺色可以用返係鼻影、臥蠶同耳下方，深色就腮骨下同耳邊的水位，而且佢其實取量就算用返佢支專用修容掃、係粉餅上打幾圈，取出黎既分量都係好輕盈，基本上唔會有重手左既情況出面，日常妝感就會更加自然，不過如果好似我要影相咁，就要用多少少時間，不過慢慢黎點都好過畫多左要補救既 💖Curl Fix 睫毛專用卸妝液 用左ETUDE既Mascara就發現，其實連卸妝液都轉埋，首先我眼眉妝大多用防水款，唔用返眼唇卸妝液都真係搞唔掂，哩一款Curl Fix 睫毛專用卸妝液，佢本身就只係for卸返眼眉妝，唇妝就唔包埋，不過用ETUDE本身藍色個隻眼唇卸妝液比較過，好似由其眼睫毛方面真係易溶左少少，咁都有可能係我自己心理作用——專用既係特別好用haaaaa，不過卸妝時唔澀眼、用左之後唔會滲左入眼令到唔舒服、仲要有效率溶左防水眼妝，都已經好值得入手 以上就係近期我認真覺我唔錯既產品，由其差唔多一半都係今年新產品，計埋今年ETUDE新出既眼影盤，真係大多數都走左我心入面，早期出既Dusty Cat定今個月最新既10色 Autumn Closet都係，之後我仲會有返Autumn Closet既介紹，配合返秋意既感覺，可以留意返😉
