今次就會分享一個工序簡單又好靚嘅風琴焗薯。 我哋先將薯仔洗乾淨。因為每個薯仔形狀都唔同，所以呢就用刀修一修薯仔既底部等佢可以放得比較穩陣先。 跟住就用一對筷子或兩隻木匙羹放響枱面，等我地切嘅時候唔會一下就切斷個薯仔。 用刀相格大約3-4mm 嘅距離垂直切落個薯仔度，當然因為有對筷子響度就唔會切斷啦。如果冇放野做阻格嘅話就要小心唔好切斷啦。重覆部驟切埋果兩隻薯仔。 跟住就可以準備做個蒜油啦，我哋用咗3瓣嘅蒜頭切碎佢，你可以用工具壓佢做蒜蓉或者可以直接用蒜粉。 放兩匙橄欖油同約 30克無鹽牛油落煲度用中小火整溶牛油，再放蒜頭入去，等蒜頭有少少金黃色就倒起佢，留意唔好太耐，因為倒上黎嘅時候重會有餘溫。 將蒜油用掃搽上薯仔上面，跟住灑上海鹽同埋黑胡椒。然後放入 180度焗爐焗 25分鐘。 25分鐘之後就拎薯仔出嚟，再搽一浸油上去，記住中間切面都要搽。再放上紅椒粉，百里香，再補少少鹽同黑椒。再放入焗爐入面焗 30分鐘，要因應薯仔嘅大細同埋唔同嘅焗爐溫度去調節一下時間。 出爐之後就可以上碟啦，最後灑一尐蕃茜上去就完成啦。
