材料 牛尾 2 磅 洋蔥 1 個 甘荀 1條 西芹 1 條 蒜頭 3粒 番茄膏 2 湯匙 紅酒 200 ML 雞湯 500ML 香葉 2-3片 醃料 胡椒粉 少計 食鹽 少許 麵粉 2 湯匙 今日同大家分享一個經典既法式紅酒燴牛尾嘅做法。今次用左 2 磅嘅急凍牛尾，先用淡鹽水解凍，之後就格一格走尐水。 之後我地就準備法式三寶啦。所謂法式三寶就係洋蔥、甘筍同西芹，呢三樣野好多時都會出現響法式料理入面。好啦，我地先處理一下洋蔥、甘筍同西芹先啦，甘昏切一切個頭同尾，去埋尐皮先，跟住用滾刀切，今次會切大舊少少，咁完成左都可以食到甘筍。 跟住西芹修一修個頭，跟住就切條。最後就洋蔥啦，先切頭尾，再對半切開，簡單切大塊少少，之後準備3瓣蒜頭。咁大致準備好蔬菜部份啦，之後就繼續處理一下牛尾啦。 牛尾簡單灑一兩撮鹽，再落少少黑椒粉，跟住落兩匙麵粉然後撈一撈佢。麵粉可以鎖住肉汁，而且亦可以將個汁孌得杰少少。好多時中式做法會將肉類汆水去除腥味，而西式做法好多時就會煎香肉既表面，再用調味去加深個風味。 鍋底落少少油，用中火煎一煎牛尾先，六面都煎一煎佢，咁可以封住肉汁，等每一邊都變得金黃色，跟住就夾起佢地先。你會見到個鍋底會留有牛尾嘅風味。記住唔好洗走佢呀，就咁將三寶放入個鍋度炒。俾少少心機慢慢炒，蔬菜嘅香氣會慢慢釋出，再加入2 湯匙茄膏炒香佢，茄膏都會含有麵粉嘅成份，佢都係另一個幫助收汁嘅材料。 之後就可以將牛尾放入去啦。 炒幾下之後就可以加入高湯啦，如果有牛高湯就最好啦，響香港比較容易搵到雞湯，所以就加入雞高湯啦。然後將紅酒加埋入去，再放埋幾片香葉。等滾嘅時候就冚蓋同轉細火。想有更多層次嘅風味可以選擇性加入迷迭香、少少黑胡椒同埋喼汁，喼汁同肉類料理係好夾㗎，落半匙就可以再提升層次。當然唔落成件事都已經好好味啦。 好多時候中式料理呢都會落糖或冰糖去整淋尐肉，西式就比較少咁做。另一個要注意嘅係，例如你要燉煮幾個鐘啦，唔好一次過一直去燉，好似呢個紅酒牛尾咁，先用細火煮一個鐘先。然後熄火俾佢rest 一個半鐘又或者放響度幾個鐘，咁牛尾就會更加入味啦。 過左個半鐘就打開個蓋，煮返滾佢收一收汁就可以啦。你可以用支叉去試一試個淋度，再用匙試一試味，你覺得唔夠味的話可以加少少黑椒之類。當然可以因應你要嘅淋度同汁嘅濃稠程度去上菜啦。 咁呢個超好味嘅紅酒燴牛尾就完成啦。
