材料 雞蛋 5隻 蔥 1 條 蝦 12 隻 鹽 少許 白胡椒粉 少許 生粉 2茶匙 今日做一個超簡單，10分鐘就搞得掂嘅菜式，呢個就係滑蛋蝦仁啦。而要做到尐蝦爽、蛋又唔會過老就要有少少地方要注意啦。 材料當然就有蛋啦，今次用左 5 隻，蝦大約 12隻啦，我用左雪蝦，好處係唔洗剥殼，而要注意一下有冇蝦腸，有就去左佢啦。 蔥就切蔥花備用，5隻蛋打勻佢，放少少鹽，然後放埋蔥花入去打勻。 蝦用淡鹽水解雪，就用廚房紙印乾佢，呢個步驟好重要，好似咁包住卷一卷佢。之後就俾少少鹽，少少胡椒粉去腥。咁你落鹽呢佢會再出水㗎，咁呢就落少少生粉包一包佢。咁所有野就準備好曬啦。 首先落油，將蝦放入去炒，大約一分鐘就可以拎起放入去蛋入面。之後撈一撈，跟住呢就收細火或者熄火，將蛋漿倒入去，用隻鑊既溫度去炒蛋。 幾樣野要留意既，蛋呢就由下面推，唔好反呀。四邊向中間推，用鑊既溫度整熟尐蛋。唔夠溫度就開返火一陣，有溫度就再熄火，重覆一兩次就可以啦。 如果鐘意熟蛋就煮多兩下。想滑尐呢就可以起得啦。 超簡單好味既蝦仁炒蛋就做好啦，大家都可以試下啦。
