今日要同大家分享一個簡易版嘅鹽水鴨胸嘅做法，雖然叫做簡易版，而我地都會保留一兩個重要步驟令到呢個簡易版嘅鹽水鴨胸都可以去到一定水平。 要做呢個鹽水鴨胸一個好味椒鹽係唔少得嘅。所以我地就先自己做一個椒鹽啦～當然大家都可以買坊間已經調好嘅椒鹽，只係味道就同自己做嘅會唔同。 我地拎左大約4 比1 嘅比例去做個椒鹽，即係 4 匙海鹽加1 匙花椒粒。 先用乾鑊放係海鹽加熱，大約1-2分鐘啦。跟住放入花椒同埋轉小火以免花椒炒燶。咁大約炒3-4分鐘，一嚟你會聞到好香嘅花椒味，二嚟鑊入面既鹽都會轉做啡啡地色，咁呢就可以倒起佢攤一攤凍先。 之後呢我地就準備處理一下個鴨胸啦。我地今次係會用生鴨胸既。記住唔好買錯咗煙燻鴨胸。我地解凍左佢先，然後呢就用廚房紙印乾表面。有尐鴨胸底果面會有少少根既，咁可以剔左佢出黎，當然亦都可以唔會既。 點解會用鴨胸而唔係成隻鴨呢。用成隻鴨一來工序會再多尐，二黎工具和操作時間都會長，所以就簡左冇骨既鴨胸啦。 將我地攤好左嘅椒鹽平均塗上鴨胸上面，記住兩面都要塗啦。咁做好之後就放佢入密實袋入面醃最少4個鐘。最好就醃過夜啦。尐花椒粒都唔好浪費，放埋入個密實袋入面啦。淨番既椒鹽可以搵個樽仔入起佢，下次個用椒鹽既菜式例如椒鹽豬扒呀椒鹽鮮魷呀就可以用到啦。 鴨胸醃左一晚啦，我地就開始做個白卥水啦，主要材料就有白芷、香葉、八角、白豆蒄、小茴香籽，再加兩片薑同埋一條蔥啦。當然呢個係簡單版就用呢幾樣主要材料就已經好好味啦。 室溫水加入白卥水料，放埋薑片同埋蔥入去。等都水滾呢就將醃好嘅鴨胸連埋花椒粒都放埋入去，等水煮滾後再煮大約3-4分鐘，然後呢就冚蓋焗佢 25-30分鐘。 焗左都有30分鐘啦，咁我哋拎個鴨胸出嚟攤一攤先。 好啦，個鴨胸涼尐嘅時候我哋就切開佢睇下個成果啦。 你睇個鴨胸既顏色幾咁靚仔，而且保留左大量嘅肉汁。呢個白卥水都可以繼續放雞翼呀，雞腳呀之類。
