今次跟大家分享一個薑蔥霸王雞既做法。因為想成品能夠啖啖肉，所以選擇左大雞髀，大家亦可以選擇全雞或雞扒。 雞髀先用淡鹽水解凍，咁可以減低雪味。 解凍期間就準備一下醃料。將蔥切段，唔需要太碎，方便之後拎返出嚟。切好就搵隻碗裝住。再切幾片薑備用。加入一湯匙紹酒，一茶匙鹽，一茶匙糖。用手邊混合邊壓出薑同蔥既味道。 雞髀解凍後用紙巾印乾。然後放入一個密實袋入面，倒入醃料，用手按摩雞髀。最後壓出空氣放入雪櫃醃兩個鐘，有時間就醃一晚就會更加入味。 跟住煲水準備隔水蒸雞髀，將雞脾放到碟上並把薑及蔥放上雞脾上面，水滾放入，蓋上蓋蒸雞髀18-20分鐘。 蒸雞肉的時候就準備薑蔥。薑洗乾淨然後切片，再切成條狀。蔥就洗一洗，去左頭之後，好似咁樣打直卷起，然後打直切絲。之後放入凍水。薑亦裝起備用。 約18分鐘便開蓋，要判斷雞脾是否已熟可用筷子響厚肉近骨的地方插進去，拔出來時如無血水流出便是熟。 把雞脾取出稍為放涼，碟上的雞汁請保留。把雞脾移至砧板，沿著骨開一刀。你睇下充滿左肉汁，用刀慢慢沿住條骨切起左尐肉出黎，將雞肉切塊放上碟。 把剛才蒸雞的肉汁倒入鑊中，慢火加熱。可加入點半匙糖、三份一匙鹽混合，然後倒入雞肉之上。放上薑絲及蔥絲。 最後響鑊倒入2-3湯匙油加熱，襯熱倒到薑蔥上面，利用滾油瞬間將薑蔥的味道迫出。處理熱油時請小心。 咁好好味既薑蔥霸王雞就完成啦～
