好多時響街叫燻蹄都係得幾片,其實真係唔夠喉。只要簡單幾個步驟就可以響屋企做出美味既燻蹄。今次就同大家分享一下燻蹄既做法。 我地今次用咸豬手製作,一黎豬皮處理比較乾淨,二來佢本身已經有個底味。如果係用新鮮或冰鮮既豬手,咁就要做多少少步驟。 首先洗乾淨隻豬手,然後放入一煲水入面汆水,記住要凍水落,咁先可以將豬既蘇味同污糟野迫出嚟。一直煮佢五至六分鐘,就會出現白色既懸浮物。用篩儘量撈起懸浮物。如果係用新鮮豬手,就成隻拎出嚟洗同檢查一下豬皮有冇毛未清理好。再換過另一煲水。如果係咸豬手就可以唔換水。 呢個時候就加入白醋,黑胡椒粒或粉,鹽,香葉,八角。煮到水滾就加蓋轉小火煮45分鐘。 煮左之後就拎出黎攤一攤先。然後切一刀,沿住條骨切,起左條骨出黎。將厚肉既部份切出黎,響肉既地方切幾刀,記住唔好切到底,將切出既肉放響比較薄既地方,再用保鮮紙或錫紙,由邊開始卷起佢,最後再封多一層錫紙鞏固佢。用橡筋綁住。放入雪櫃雪2小時,最好雪4小時或過夜以進一步定型。 其間就做埋個沾醬部份,蒜頭切碎,切小小辣椒,如果唔係好食辣可以去左籽佢,加入白醋,落鹽,加一匙水,加少少糖吊一吊味,然後撈勻佢。 響雪櫃拎番出嚟打開佢之後,因應喜好切片就可以上碟啦。有時可以做多一兩舊,想食既時候就可以隨時拎出嚟,而且用來招呼親友都係一個好好既選擇。