放假梗係要約埋三五知己出嚟歎下啦！今次我哋就喺銅鑼灣地鐵站 C 出口一出，就發現呢間充滿泰國風情嘅串燒店。餐廳裝潢真係好有泰國街頭味道，牆上畫滿泰式壁畫，配埋啲音樂同燈光，未開餐已經好有氣氛 主打泰式串燒同泰國菜，啲串燒全部即叫即燒，炭香味十足！我哋叫咗多款串燒，有牛仔骨、豬頸肉、雞皮、魷魚鬚、大花蝦同白鱔等，每一款都燒得啱啱好。雞皮脆卜卜、豬頸肉嫩滑唔鞋，魷魚鬚爽彈又入味，大花蝦啖啖鮮甜肉，白鱔更係香口到不得了。一邊食串燒，一邊飲啤酒，爽到無朋友！ 講起啤酒，佢哋仲有同 SUNMAI 聯乘嘅手工啤，仲攞咗世界大獎添！SUNMAI 檸檬蜂蜜啤酒清爽易入口，而極濃啤酒麥芽味就超厚實，配串燒真係一流。 除咗串燒，泰式酸辣鳳爪沙律都係必試之選，酸酸辣辣好開胃，鳳爪爽脆無油膩。冬蔭功湯香料味濃郁，酸辣平衡得好好，蝦味重得嚟唔嗆喉。仲有泰式去骨海南雞，連雞翼位都去埋骨，肉質嫩滑、雞皮爽口，配埋特製辣醬，好食到停唔到口～ 成晚氣氛又好、食物又正，真係一間可以放鬆傾計、輕鬆飲返杯嘅好地方。下次如果想感受泰國街頭風味，記得試下呢度啦！ 〰〰️〰️〰️〰️ ✨ Grill ขนทอง 銅鑼灣駱克道487-489號駱克駅地舖 (♫ ♪ ♫ ¢яєαмfυи ♫ ♪ ♫ (¯`◕‿◕´¯)ღ
