20億血汗錢倒落咸水海真相

(圖片轉載自Photo from Consumer Council)

醫學美容行業日趨興旺，HIFU、THERMAGE、溶脂等微整形成行成市，隨住想扮靚嘅人越來越多，呢個行業就越爆越多衰嘢，而且出名有超多陰招劏客。今次就想同大家Share下4大最新陰招，等大家唔好咁易墮入陷阱。

陰招1.

頂級儀器，割喉低價引人入局

好多醫學美容中心常以低價甚至免費試做大賣廣告，並且聲稱用嘅係頂級科技同儀器。其實邊有咁大隻蛤乸隨街跳？
燈油火蠟人工儀器材料宣傳，加加埋埋條數極襟計，又點可能以蝕本價賣療程畀你而唔諗盡方法劏你？其中最原始就係試做完拉閘放狗局你買。但係呢啲已經淪為細舖嘅低裝做法。而家好多出名嘅醫學美容中心用好多明星作招徠，其中以長腳蟹代言嗰間最經典，新聞都有講，除你條褲，直接撳低你就劏。正所謂，睇下你走得去邊？

陰招2.

平價買療程人生只得一次？

好多姊妹會話，唔係吖，我真係買到平價療程喎？yes but not really啦。當你以爲好筍，就可能已經進入精密嘅佈局。都係嗰句，收得你咁平（經典如$388做100線hifu)，一定有方法響你荷包攞凸。

常見陷阱就係畀你好好享受首次體驗，甚至頭三四次都客氣有禮，完全唔sell，但係到第六七次就黎料。以脫毛為例，啲平價大 brand會教細激光度數，等你做極都仲有，幾次之後就話你啲毛好頑強，要另外加錢買其他輔助療程，先可以令效果明顯。你都做咗六七次囉，通常都會落疊～～買。呢啲公司本身唔係細brand，所以絕對負擔得起同你玩幾次先慢慢劏。呢招算係好毒。

陰招 3.

買完唔再買黑面趕客

有個 “天真” 大Brand，成功令你買完一次，服侍緊你嘅時侯猛要你再買其他療程就梗架啦，但係最毒嘅又點會咁簡單？如果啲sales 發現你並非有潛質嘅客，就會講啲好難頂嘅說話單單打打，務求令你唔想再返去。唔好以為咁樣趕客好戇居，其實你放棄唔再去，佢地仲慳返晒服侍你嘅成本呀傻豬。你畀咗個幾皮野就當倒左落海，佢哋就袋袋平安，報埋做上市公司盈利，真正無仇報呀！20億美容券嘅來源咪就係咁囉。

陰招4.

複雜價單最易中招

注意，呢個手法係好大嘅brand都響度用緊。顧名思義，等你免費試做完，覺得間公司大有信心嘅時侯，放鬆嘅一刻就同你介紹療程可以點 “配搭”，又話可以畀個special
offer你。話明配搭，就梗係啲價錢眼花撩亂到你點計都計唔點，一信佢個所謂offer，就中計買咗可能自己根本唔須要嘅嘢，最慘係仲以為好抵。所以呢，試做未必好，價錢唔透明嘅肯定有料到！執生啦姊妹。

(圖片轉載自仁聞報)

四大口訣保住荷包

其實香港過去好多行業例如電器店、藥房等都有黑心店，而且養起好多人。佢地手法都係以低價吸客入店，再以各種精密佈局欺騙金錢！但隨住好多受害者出現，互聯網盛行，呢d黑店已經被良心大集團取替！豐X 百老X
已經係買電器首選，唔會咁多中招事件啦。

但係點解美容行業仲停留響咁無知落後嘅階段，政府真係應該要加強監管！嚴打劏客行為。但係響未有法例保障之前，我地呢班貪靚嘅消費者，就只有自求多福，唔好因為貪嗰啲小恩小惠，天真諗住真係有大蛤乸隨街跳而迷迷糊糊入咗黑心騙局。什麼順豐騙案、倫敦金就係睇準人性愛貪先至會得手。

姊妹們，扮靚點都係我地嘅終身事業，無可能話斬腳趾避沙蟲，只要記住以後搵醫學美容中心扮靚，一定要記住4大口訣：

1。上網check 晒間野有無投訴case

2。fb comment 有冇刪post

3。有冇朋友因為貪試做而衰左

4。細心揾啲明碼實價同埋多正面評價嘅大公司

做齊就可以大大減低中伏機會。慳返可能被騙嘅幾皮野，分分鐘買到個靴襪史架。

更多相關新聞或文章

．美容密集推銷易「中招」

．套票過期　美容客年嘥20億

．拆解激光脫毛優惠有幾著數

．67%人買健身美容服務曾受威嚇倡設冷靜期

成功發佈