30歲仔，鐘意上天下海，懷著今日唔知聽日事既信念，興趣多多卻一事無成。開左呢個BLOG，係為左紀錄我人生既一大轉變，因為我終於係31歲之前搵到我認為可以托付終生既職業(上個禮拜, 2017年3月27日)。 從來都係邏輯行先既我，慢慢開始覺得，呢一切一切都係緣份。那些年來，我因為職業壓力而衝浪，因為衝浪而活躍於風箏衝浪，因為風箏衝浪，玩埋山地車，滑翔傘，因為傘友ＪＡＮ（唔多唔小，詳情之後講），而入左行成為樹木工作者。由從無了解呢一行到入職開工，只係一通電話。 話說搵到一個樹木公司網頁又近我住家就膽粗粗打比個老闆問請唔請人，意外地佢話請，仲假任放，早一日ＷＨＡＴＡＰＰ通知佢就得，唔需要打比佢，老闆仲明言，極之辛苦，不需要見工，黎試幾日睇慣唔慣先。 簡直驚嚇，世界上竟然仲有Ｄ咁既老闆，後來仲發現，老闆亦係滑翔傘玩家！ 後來知到，呢行好冷門下，入行需要Ｄ機緣巧合，我既入行過程就好似簡單左Ｄ？ 樹木工作者雖然日曬雨淋又容易受傷，但係對於我呢D怕悶，討厭室內，唔鐘意吹冷氣，熱受戶外生活既爛玩人士，呢份工作簡直FIT曬。 好喇講下我既工作，新仔入職乜都唔識由低做起，我都預左辛苦搬搬台台做番一段時間師兄師傅們先會教我野，點知唔係喎，我被篇配左去一組嘻嘻哈哈隊，隊員個個神經質鐘意搞笑，又無乜階級觀念，唔會擺款，每一日一齊做一齊玩一齊學，最開心就係咁做野啦，遠離政治，簡簡單單，同心協力，每日工作就係，開車去一個地方＞爬樹—斬樹／修枝＞斬件搬上車運去掉。 所以而家多左個新興趣，爬樹！ 第一個禮拜，我開始學用電鋸，拆散把電鋸，電鋸用既油係用白電油溝一隻叫Ｔ２既電單車機油，同埋學左一個繩結。同埋識左幾棵樹，（銀合歡，血桐，橡樹），準備買入爬樹架生，邊做邊學，一切都仲好新鮮。 因為電鋸係極危險工具，所以我根據鋸齒行既方向，同要切既野既位置，鑽研緊一套刀法，點樣習慣一套安全既動作以作長期使用。
