阿夫利拉麵聽咗好多年，聽聞向東京非常人氣，佢嘅柚子拉麵賣到街知巷聞，不過向當地太受歡迎所以成日排長龍。嚟到香港疫情前都好好生意嘅，依家就變得好冷清喇！ 位於The One IT入面嘅麵店，環境都唔錯，設計簡約又時尚，十分型格！餐點方面都相當簡約，得幾款拉麵，同埋幾款蓋飯。價錢唔便宜架，不過其實全香港嘅拉麵都係咁貴囉！成百蚊食一碗拉麵，老實講唔係咁抵囉！我就寧願去食台灣牛肉麵喇！不過聽到係柚子味拉麵就好想試吓！ 柚子鹽味拉麵 $98 鹽味湯底配上柚子口感自然清爽，义燒都做得好鬆化，唔傳統豬骨湯底咁油膩。哩到嘅拉麵都係用全麥麵條，感覺又健康啲，麵質都好夠彈性，仲好香麥味添！仲有哩到用日本茼蒿之稱嘅春菊做配菜，唔係用平價芽菜仔架！ 柚子甘露沾麵 $108 基本上同湯麵配料差唔多，不過唔係配义燒而係配腩肉，咪見佢五花腩就好肥，做得都好鬆化又入味。麵條仲可以自選凍麵或者暖麵，天氣咁熱就梗係食冷麵啦！冷嘅麵條特別爽口彈牙，配埋個睇落好重口味，但食落啖啖柚子清香嘅沾麵醬汁，好喜歡囉！ 煎餃子 $48 食拉麵當然要配餃子啦，賣相精美之餘，仲做到皮薄餡靚，都算係唔失禮啦！ 阿夫利拉麵 AFURI Ramen + Dumpling 地址：尖沙咀THE ONE 2樓 i.t orange forest 電話：28152177 營業時間：12:00~22:00 旅遊網誌：http://travelermel.blogspot.com/ Instagram：https://www.instagram.com/followme_lody/ #日本拉麵 #東京阿夫利 #柚子控 #afuri #hkfoodie #hongkongblogger #得閒食飯 #美露迪
