中環有好多環境好靚嘅餐廳. Babacio係其中一間. 佢係係大館對面, 如果坐露天座位係可以見到大館嘅. 望住個靚景食lunch或dinner真係好Chill. 不過今次我同朋友就冇特別request for outdoor seat, 所以餐廳安排咗我地坐indoor. 我覺得坐室內都唔錯, 店內燈光暗暗地, 同朋友飲酒傾計都好舒服, 重點係有冷氣.

講返食物先.

Insalata Di Pollo (HK$138)

依個沙律都幾大碟, 勁多沙律菜&雞肉. 沙律菜好新鮮, 雞肉都唔會好乾或者鞋. 不過我覺得黑醋味道好似淡咗少少, 令到個沙律冇乜味咁. 店員會放枝黑醋係枱面, 所以覺得冇味嘅話都可以自己加醋.

Piccante (HK$188)

我覺得依度嘅Pizza都好出色. 佢有分茄醬底/冇茄醬底. 呢個係茄醬底嘅pizza. 餡料有水牛芝士&沙樂美腸. 佢嘅茄醬唔會太酸, 味道岩岩好. 同埋佢勁多芝士.

平時食pizza最驚係個Pizza邊又厚又硬, 我多數都會選擇唔食個Pizza邊. 不過呢...依個Pizza雖然睇落個邊好似好厚咁, 但係食落唔會覺得佢好硬, 個口感有少少似食緊麵包咁, 我唔覺唔覺就食晒. 如果要搵樣嘢彈嘅話, 只可以話沙樂美腸烤得有點乾&硬.

整體嚟講, 依個pizza都係好食嘅.

Saporita (HK$188)

呢個係冇茄醬底嘅Pizza.

鍾意食芝士嘅朋友一定好鍾意, 因為佢勁多芝士. 芝士上面嗰啲係烤薯仔粒, 薯仔粒都烤得好淋. 我都係第一次食依款Pizza, 味道都幾特別. 依個Pizza趁熱食會更好味. 如果你覺得味道淡, 可以加辣椒粉或者辣椒油. 辣椒油我就冇試過喇, 辣椒粉我就試咗少少, 佢真係加少少都好辣. 我覺得佢嘅辣係有少少蓋過咗本身Pizza嘅味道, 所以我個人認為唔加辣椒粉會比較好食.

Montanara Fritta (HK$68)

想俾個驚喜朋友, 所以就叫咗一個甜品.

佢有得揀要士多啤梨餡定係香蕉餡. 我哋就揀咗香蕉餡.

佢個外型有D似沙翁. 佢係一個麵團包住朱古力榛子醬同埋香蕉餡, 炸完之後上面灑砂糖.

係幾好食嘅, 味道唔會太甜. 朱古力榛子醬同香蕉嘅味道都好夾. 但係都有少少膩, 所以我覺得幾個朋友share嚟食會好啲.

整體嚟講, 食味味道唔錯, 餐廳環境好舒服. 食完飯仲可以同朋友飲下酒傾下計, 好正.

Babacio

地址: 中環雲咸街75-77號嘉兆商業大廈5樓

打工仔旅遊日記

IG: @e.travelogue

成功發佈