身處於宗教色彩極濃厚嘅國度，復活節前被稱為Big Week (Μεγάλη Εβδομάδα)嘅一星期，見識到希臘東正教徒對宗教嘅敬仰同堅持。復活節假期，沒有吃喝玩樂，甚至仲忙過平時返工，早晚返幾個鐘教會，齋戒40日，不斷念經祈禱，少啲堅持同自律都做唔到。 琴晚Big Friday，紀念耶穌被定罪釘十字架，全城轉晒做Sad Mode，連教堂敲鐘嘅方法都變得好Sad。夜晚大約8點至11點，所有教徒都去教堂參加巡遊儀式，一班牧師舉起大大個十字架同埋象徵耶穌棺木嘅鮮花木枱，帶領教徒圍住教堂行一圈哀悼耶穌。 由於儀式係用古希臘話進行，唔好話係我呢啲外人，就連大部份嘅希臘人都唔明牧師講乜，但佢哋非常專注，儀式一開始，我見到嘅係全民大熄機，佢哋雙手舉起嘅係蠟燭唔係手機，雙眼望住嘅係天空唔係電話個Screen，口講嘅係經文唔係錄Voice Message，果一刻，我亦都跟風熄電話，去感受佢哋對宗教嘅果份尊重。
