六、打招呼要錫兩下面 如果女仔嚟講，喺西國見到朋友，無論係男係女，打招呼要左右各碰一下面，熟嘅仲會攬多一下。除左朋友之外，通常見到朋友嘅朋友都會用呢種方式打招呼或者握手。至於男仔嚟講，如果見到朋友都係會握一下手或者有時好耐無見會攬一下。跟住到拜拜嘅時候，同樣地要做番一樣嘅禮儀。記得曾經有兩次去朋友嘅生日會同BBQ派對，參加嘅人數將近30，每見一個新識嘅朋友就要錫兩野，走嘅時候講拜拜又要同大家錫兩野，真係錫到面都痠呀。唔知而加呢個武漢肺炎既期間，係咪都繼續維持呢個禮儀呢。 七、一年有數之不盡嘅節慶 西國除左有最出名嘅三大節慶：華倫西亞嘅法雅節(Las Fallas)、西維爾嘅春會(Feria de abril、潘普隆那嘅鬥牛節(Los San Femines)，其實每個地方都有大大小小嘅節慶，頻密嘅程度可以話係每個月最少有一次。其中一個我鍾意嘅節慶莫過於係巴塞隆那嘅San Joan，成個城市係呢一晚都會火光紅紅，除左會砌火堆之外，大家都會湧哂去海灘狂歡同放煙花，成個城市會一直熱鬧到天光。 八、一日之計在午餐 對於香港人嚟講，通常午餐都係匆匆忙，食D簡單野，而晚餐一定係一日之中最重要嘅一餐，因為終於放工，可以一家人坐低慢慢食飯。但對於西班人嚟講，一日最重要果餐一定係午餐，所以通常係西班牙各地同各大小餐館都會有lunch menu，通常12-15歐左右就會食得到，個套餐包括前菜（多數有海鮮冷盤、沙律、 火腿或芝士等可揀）、主菜（通常有意粉、燉飯、烤魚或扒類可揀）、甜品和飲品。至於晚餐，因為西班牙人唔會係9點前食飯，所以佢地都會食D輕食，例如沙律、乳酪、三文治等。有日我嘅西班牙室友聽見我話夜晚要去食paella（西班牙燉飯），即係碌大隻眼比左個不可思議嘅眼神我，然後同我解釋話西班牙人唔會係夜晚食paella，因為太heavy，消化唔到。 九、英語係巴塞限定 巴塞隆那有來自世界各地嘅人，由其是好多英國人因為氣候同熱鬧嘅生活而搬到來巴塞隆那生活，所以英文係巴塞嚟講尚算流通，一般嘅服務員都識講英文同埋因為遊客眾多嘅關係，就算餐廳店員唔識講英文都會有英文menu。小薯大概遊歷過西班牙十幾個地方，基本上出左巴塞以後，當地人基本上都唔識講英文，尤其是南部嘅人，即使係20出頭嘅後生仔都未必識講。畢竟西班牙語係全球第二大語言，而係歐洲識講西文嘅人為數亦唔少，加上西班牙多數移民都係來自南美，所以當地人對英文嘅需要亦唔大。不過隨住全球化愈演愈烈，好多西班牙嘅父母開始意識到英文嘅重要性，以致相對地有有經濟能力嘅父母開始會送仔女去課後英文班，從細個開始學習英語。有一次小薯去到華倫西亞，朋友嘅父母帶左我去睇佢地個姨甥女上英文堂，落堂之後佢父母大為緊張咁問我嘅意見，覺得個英文班好唔好，相信以後西班牙識講英文嘅人會愈來愈多。 十、運動係生活嘅一部分 目測西班牙嘅街頭，大部分人嘅身材都好均稱，甚少見到癡肥嘅人。我諗原因係除左同佢地嘅飲食習慣有關之外，同佢地熱愛運動有好大關係。我認識嘅當地人之中，大家都有去gym嘅習慣，一般佢地都會係放工之後，食飯之前去gym。而年紀比較大嘅人，如果有隻狗，就會拖埋隻狗去散步。一般嚟講，每個社區都會最少有一個公園，而住係海邊嘅人，就多數會去海邊散步/跑步。至於夏天嘅時候，住係沿岸地區嘅人當然會一得閒就去海灘曬太陽同游水。 更多靚相Follow ig: the.steel.legs https://www.instagram.com/the.steel.legs/ 延伸閱讀：[西國西事］在巴塞隆拿生活觀察到的小事（上） 點擊圖片放大 +2
