原文: http://talkupday.com/好食推介-永合成馳名煲仔飯/ 原文作者: YNWA Facebook 專頁: Talkupday 圍講噏Day 上次介紹咗一間充滿本土情懷嘅科記，今次再同大家推薦另一間地道食店－永合成 如 果大家喺上環一帶返工，對永合成呢個名字應該絶不陌生。創辦人許老先生以前係一名整餅師傅，首間鋪頭喺近西隧口主打蛋撻西餅。其後許老先生發覺原來用焗餅 嘅焗爐去焗煲仔飯出黎嘅效果比用明火煮更好，因為焗爐火喉均勻穩定，容易控制，最重要係可以同一時間焗多個煲仔飯，方便繁忙時間出餐。及後佢哋搬咗去上環 蘇杭街，上下兩層坐到近百人。每年一入秋都係爆到瀉，就算佢哋嘅價錢一啲都唔平，但勝在用料十足，所以生意門庭若市。 最 令筆者佩服嘅係許老先生對食物質素嘅要求同堅持以及佢對屋企人嘅付出同承擔。許老先生要求5名仔女由細就喺鋪頭全職幫手，大家姐負責水吧，二家姐樓面跑 腿，三家姐為鋪頭主理人，兩個細佬就喺廚房。一做就幾十年，一家上下齊心團結，許老先生更幫佢哋每個家庭置業，令佢哋後顧無憂。鋪頭就只開早餐同午市，4 點左右收工，等佢哋可以返屋企照顧啲小朋友。星期日就休息，一家幾口聚埋一齊食餐飯，享受爺孫之樂。 同 科記一樣，筆者每星期都會幫襯一次，一去就去咗差唔多9年。雖然從未有機會同許老先生交談，但同主理人華姐（三家姐）就十分相熟，好多嘢都係從佢口中得 知。同華姐傾計時更經常交換經營食肆嘅心得，我哋大家都比較buy自己靠自己呢一套，落手落腳先可以保持品質，唔能夠假手於人。時代改變，煲仔飯確係出 色，生意亦好穩定，但好難可以再好似以前咁去叫下一代人中學畢業後唔再升學又或者讀完大學後全職落鋪頭幫手，畢竟後生一代都未必肯放棄一切留喺度捱。 舊年許老先生決定將永合成搬去西營盤較細嘅鋪，由兩個細佬主理，二家姐幫手喺樓面。而上環鋪就分拆租出去，留返一個細嘅地方賣自家浸嘅檸檬醋，等大家姐同華姐可以過吓日神。（兩間都係自己鋪，可見許老先生喺理財投資方面都有一手） 永合成一年四季都主打賣煲仔飯，但其實佢哋嘅家常小菜亦都係very good，以下係筆者嘅special recommendations： 1）窩蛋牛肉飯－用上新鮮牛針肉，每朝早要親自挑去所有筋，再手剁成碎，單係呢份手工心機已經值門票價 2）豉椒排骨飯－新鮮排骨加上手剁豆豉蒜頭辣椒，非常惹味 3）北菇滑雞飯－呢度係唔會用急凍雞，可以食到雞嘅香滑同鮮味，成日一早就賣晒 4）蕃茄牛肉會意粉－呢樣係筆者夏天嘅favourite，熱辣辣唔想食煲仔飯，呢個意粉用蕃茄加少量茄膏同糖去炒，牛肉就用返手剁牛非常之嫩，意粉有咬口亦唔會太淋，好開胃 5）梅菜蒸肉餅－家常小菜，豬肉又係手剁，送飯佳品 6）凍奶茶－呢度嘅奶茶係我飲過最出色嘅。佢哋會用平時沖完嘅熱奶茶攤凍（佢哋係會每半個鐘煲一次茶做熱奶茶），然後雪凍做凍奶茶。出面一般都係用熱茶撞落杯冰度，但呢度嘅茶膽經已係凍，唔會溝淡咗，茶味夠濃又唔澀 老實講新鋪地點比較差，鋪入面更缺乏咗嗰種舊情懷，因為遠離咗繁忙嘅上環區，午市少咗批office客，生意相對地都冇以前咁好，但係食物品質係保持到嘅。今時今日呢啲傳統舊香港一代傳一代嘅食店真係買少見少，好希望大家都可以多多支持！
