原文: http://talkupday.com/我的叱咤903/ 原文作者: YNWA Facebook 專頁: Talkupday 圍講噏Day 記得大學時期搞vshow時嘅主題定為「dream」，我地每個搞手都會錄一段短片講吓自己有咩夢想。小弟當時嘅夢想竟然係想加入叱咤903做一個 DJ。可能因為以前經常收聽師兄森美嘅節目，覺得佢轉數快講野搞笑；每年1月1號總會「部」喺收音機或電視機前，全程跟足叱咤頒獎禮，見到好多歌手能夠上 到叱咤台都係感動萬分，總之就覺得903係一個好型嘅大家庭。 結果夢想當然係冇成真到，但我仍然依舊係一名903死忠，尤其而家出出入入經 常揸車，可以話由朝到晚都有機會聽到唔同節目。問心嗰句，節目質素比以前真係差咗，但情況有少少同電視業相似，皆因佢哋啲competitors更差，所 以冇壓力底下節目變成不進則退。以下係3個小弟特别推介嘅節目同埋我對幾個so-called皇牌節目嘅睇法。 YNWA推介： 1）3號螺絲釘 by Colin Colin鍾意訪問唔同嘅音樂人（唔係歌手）去了解佢哋背後嘅創作目的，辛酸以及所有大小事情。特别會了解填詞人對於每首歌嘅故事，係一個對廣東歌同創作人tribute嘅節目。 2）集雜志 by 急急子 節目口號係「每日集合，混雜志向」，急急子鍾意捐窿捐罅去揾一啲地道手作野，農村生活，咖啡人生，藝術展覧；係一個非常有heart嘅另類節目，往往聽完都覺得有所得著。 3）雲妮鍾情 by Vani 903其中一個長壽節目，亦係一個純音樂節目。雲妮姐姐總會揾到一連串相類似或有意思嘅新舊歌，總之兩個鐘頭入面你可以完全relax而又憑佢播嘅歌揾返好多回憶 DJ推介－阿檸 (新進DJ，毒男一個，沉迷動漫figure) 認 識阿檸係透過集雜志入面嘅「扭蛋劇場」，喺一兩分鐘嘅超短劇中，阿檸經常用唔同方法去諷刺時弊，有時聽完都會會心微笑。之後聽佢同杜小喬嘅break up club，更加覺得佢係寫劇高手。可能因為咁佢好快就有自己節目「毒檸王國」，不過我就覺得佢做節目嘅功力仍有待改進，將來應該會係一名出色嘅DJ 令人失望嘅皇牌節目 1）在晴朗的一天出發 早 晨時事節目以嘻笑怒罵形式去諷刺政治時弊。可惜除咗林海峰有咁嘅功力之外，阮子健就只係跟住林生講嘅野俾反應，冇乜自己獨特意見。潘小濤更加有啲格格不 入，同佢平時喺881做「串」差好遠，喺晴朗要做下靶位被另外兩個主持人嘲笑，唔太適合，亦欠缺火花。我會情願轉去881聽志雲大師仲好。 2）早霸王 森 美小儀曾幾何時係我聽903嘅原因，但係經過廿年之後就好似一對老夫老妻，再冇乜新意，特别係遊戲部份，亳無樂趣，悶到爆燈。西瓜太想表現自己反而俾大哥 係咁入（其實西瓜自己一個做「早安，同學早」係唔錯嘅）；阿杰就真係差到不得了，真係要勤力啲惡補；姑媽小儀就一如以往冇乜改變；成個節目猶如森美大哥一 人show，但真係too much。 3）口水多過浪花 冇咗占勞呢pair孖寶拍住Do姐，成個節目真係失色不少。迪偉太多野講變成麻利可有可冇。默契雖然要時間培養，但個組合combination係有問題。觀乎Do姐之前都係拍兩個男主持最有chemistry，903應該要諗諗。 其他 - 關公災難 5 月先正式launch嘅全新節目，至今嘅comment都係好壞參半。一名高高在上嘅才女王迪詩同一個爛撻撻嘅港男Sunny劉翁喺唔同嘅題目上討論而突 顯兩性嘅分别。老實講節目內容係唔錯嘅，但可能應該放喺夜晩播會好啲，始終下午2-3pm呢個時段大家都可能想聽啲輕鬆啲嘅野。 雖然現今社會已經係網絡世界，但其實仍然有好多人係靠聽收音機過日晨，希望903各位DJ繼續努力唔好辜負一班粉絲嘅期望。
