原文: http://talkupday.com/的士，我受夠了/ 原文作者: YNWA Facebook 專頁: Talkupday 圍講噏Day 想問吓大家有冇試過受到的士司機嘅無理對待？例如拒載？架車唔過海？要趕住去交更？唔熟對面海啲路？一定要行西隧？兜路？濫收車資？冇禮貌？「恰」 老弱婦嬬？我敢肯定九成九嘅香港人都有試過類似嘅不快經驗。點解的士司機係要做埋呢啲討厭到極嘅行為呢？彷彿只係佢哋可以得到最大利益而漠視任何乘客。 筆者幾年前係的士常客，平均每個月搭的士都過二千蚊。「八折的」服務當然比較好，但冇車嘅時候都要迫住截街車，最常出現嘅場面就係…. YNWA：唔該去中環xxxx行東隧 的士：唔過海呀！搭下架啦！ YNWA：麻煩開車，等咗好耐都冇車，趕時間 的士：都話唔過海，九龍車 YNWA：我帶路 的士：真係唔過海，你落車啦 YNWA：咁一係車我過海，一係車我去差館 (下删幾百字的士司機粗口横飛以示不滿但仍要死死地氣過海) 我經常遇到唔想過海或者揀客嘅司機都會咁樣同佢講： 「其實你可以選擇冚旗，你冇咁做就即係揀客，係犯法。你要知道的士係由乘客決定去邊而唔係司機，你咁唔鍾意既其實應該選擇去揸巴士或地鐵，因有固定路線，唔駛怕啲客叫你去呢度嗰度。」 最可惡嘅就係専恰老弱婦嬬！試過一個大肚媽媽拎住幾袋野，加一部BB車，嫲嫲就抱住一個瞓咗嘅小朋友喺的士站上車，放好晒BB車喺車尾箱後，都俾個女司機話唔過海而叫返佢哋落車！真係未見過世界上有啲咁PK嘅人，可恥！ 我必需指出有少部份司機大佬係非常之好嘅，而我亦會尊稱佢哋為「的士司機」。好可惜業界偏偏有一大班害群之馬，我會叫佢哋做「的士佬」，就係自私嘅佢哋影響咗班好司機，更間接引發起uber襲港。 於六月中，香港政府建議以試驗計劃形式發出3個專營權牌照以提供450至600架優質的士，提升的士服務以及抗衡uber入侵。 其實政府係咪真係咁豬，見你頭痛就淨係俾panadol你，唔會硏究吓背後有乜真正問題呢？其實uber之所以咁受香港人歡迎，正正就係因為大家都忍夠班「的士佬」嘅惡行，所以唔介意俾貴啲但有對等嘅服務，最緊要係用行動去懲罰班的士佬。 首 先，我並唔覺得的士有供不應求嘅情況出現。無論日頭或夜晚喺街度都見到大量「吉」的士排長龍等客；除非落大雨你就見到大部份的士都「冚旗」揀客啦。再者， 呢個優質的士專營權只會益咗班車主，再度提高車租，根本班司機做黎都係交車租，所以為咗揾多啲踩多幾轉，再加上短加長減之後，就係咁想揀啲中長途客去 maximize個利潤。 個問題其實唔係香港市民好恨俾貴啲，只不過係唔想再受的士佬氣。政府應該嘗試針對呢個問題又或係開放的士市場比 uber，正所謂有競爭先有進步。當班的士佬生意差嗰時就要自我檢討去改善服務質素。呢個世界汰弱留强，應將班害群之馬踢走。但可惜政府要顧及嗰班有錢的 士車主嘅既得利益，所以佢哋係唔會開放市場加入競爭，typical政府無能處事手法，令到成個市場陷入兩難局面，最後又係影響到一班無辜嘅市民。
