原文: http://talkupday.com/男人的浪漫唔係豆腐火腩飯/ 原文作者: YNWA Facebook 專頁: Talkupday 圍講噏Day 大約三個禮拜前喺Facebook收到位學長嘅PM，內容係話學校舊生會將再次舉辦舊生籃球賽，問我有冇興趣join佢地嗰隊？我第一個回應就係我已經放低咗籃球一段時間，實力真係大不如前‧‧‧ 講到呢度，識我嘅朋友可能都會問：乜你唔係踢波架咩？其實小弟以前中學時期係一名籃球人，狂熱同著迷程度比足球不惶多讓。當諗到有機會再同一班師兄打拼，不其然腎上線素急升，決定預埋我一份！就算做大後備或啦啦隊都冇問題！ 相信那些年嘅美好回憶人人都有，還記得中一嗰年見到班師兄好x型咁放學喺A court度為校隊練波（其實只係走吓籃然後就鬥波），我當時同自己講希望有一日可以成為一份子！以前打籃球可以打到無論返學前、小息、lunch time食10分鐘飯或放學留喺學校打到比阿伯趕我哋走都要打；一個星期五日都係練波，全心全意幫小師弟特訓，自己又要出去青訓計劃操練；放假就去花墟維 園各街場由6點打到熄燈，成身臭汗去食老麥或行吓聯合信和；屋企有超過30餅VCR全部都係NBA賽事（唔係MJ就係Penny），每場都睇過30次以 上；彷彿中學生涯同籃球就係劃上咗一個等號！ 於whatsapp群組入面，成班麻甩佬自自然然會話當年，講返以前代表學校攞到 Division One各獎項，更參加大專邀請賽。我雖然比佢哋細兩年但都有幸參與！當大家知道將會有一班比自己細十幾年嘅師弟而佢哋同樣攞過A Grade冠軍都會參加呢次舊生籃球賽，個個即時熱血起黎，決意一定要操fit返，每個weekend更會返母校練波，要証明我哋呢個 generation就係學校歷史入面嘅Best of the Best！好似72勝嘅Chicago Bulls係NBA最强最偉大嘅球隊一樣！ 今 次嘅reunion，大部份師兄都經已十幾年冇見或冇聯絡。比我嘅感覺真係大家都成長咗成熟咗，少咗份年少氣盛同個人主義，多咗份 togetherness同understanding；鬥心仍然强勁，就正如我哋母校嘅motto ”NEVER SAY DIE”一樣！呢份認真同熱血就係喺中學時期無形間咁灌輸咗入我哋個腦入面。NEVER SAY DIE係一種態度，並唔係死唔認輸／衰，而係無論喺咩惡劣環境下都要用盡全力fight for everything，輸咗要企返起身，再努力過，呢種就係NEVER SAY DIE嘅spirit！ 好多人都覺得我校嘅男生出咗名「串」。我唔係要喺呢度平反，只係覺得當你為咗一樣野好認真好投入咁去到充滿信心嘅地步，呢種自信心喺好多人眼中會覺得係自視過高或者並不討好，視乎你點樣去睇啦！ 其 實呢份爭勝心係透過喺校內校外嘅競爭慢慢培養出黎。你想入校隊嘅話，你就要努力練波；見到隊友或師兄打得比自己好，就要揾出自己嘅弱點再努力去改進；出 到去學界比賽，著得起件波衫代表學校就要做到最好，唔單止要打好場比賽幫學校贏取錦標，更要注意自己校外嘅品行，唔好影衰學校嗰名。正正就係呢種鬥心，可 以幫助到你喺職場上唔會成為落後嘅一群。 就以成立呢個blog為例，係四個識咗廿年嘅兄弟好想一齊去完成嘅一件事，比大家一個challenge去挑戰自己。所以一係唔做，一做就要認真投入去做好佢，就算只係for fun形式，都要過得到自己嗰關，到咗老黎大家睇返將會係對友情嘅一個好好印記。 好 多人話而家啲後生仔做野唔得，我唔想標纖呢班九十後或千禧後有幾不濟，但可能佢哋就係缺乏咗呢份投入呢份passion！無論你做邊行又或者玩咩運動都 好，只要你有呢種hunger同 passion，treat it as seriously as u can，未必一定去到最top或最成功，但一定可以羸取到所有人對你嘅肯定同respect；唔好咁易放棄，要學識堅持，抱住NEVER SAY DIE嘅態度！ 有人話：豆腐火腩飯係男人的浪漫！我就覺得當一班男人好認真投入咁去追夢先至係最浪漫！ 仲記得激戰入面賤輝講過嘛：「我唔想到熄燈嗰陣連一件值得紀念嘅事都冇！」所以無論你係幾多歲，如果你仲有夢想仲有嗰團火，唔好諗咁多，去吧！時間係唔等人架！而我，亦會加緊操練！可能未必去得返以前嘅level，但起碼都要全力以赴，NEVER SAY DIE！ https://youtu.be/uIkI_UTCwNU
