原文: http://talkupday.com/好食推介-科記咖啡餐廳/ 原文作者: YWNA Facebook 專頁: Talkupday 圍講噏Day 今次想向大家介紹一間老店－科記咖啡餐廳 科記位於上環一帶。基本上你唔係蒲開上環係好難揾到或者知道呢間野嘅存在，因為一啲都唔就腳好難揾吓，不過佢哋嘅食物係值得你用啲時間行多幾步去試。而且佢哋呢度唔似得九記蘭芳園澳牛咁充斥住遊客，一般過黎食嘅都係本地老饕。 筆 者每星期都會最少幫襯一次，之所以咁迷戀其實同佢哋係一間地道小店有關。老闆老闆娘兩公婆已年近八十，仍然堅持每日工作，老婆婆喺廚房，老公公喺水吧，兒 子（都起碼四十幾歲）加上3位頭髪斑白嘅老人家就負責樓面。你一去到就有嗰種「家」嘅感覺。除此之外，食物品質保持得非常好，大大話話去咗科記7至8年， 水準依然不變！抵讚！ 言歸正傳，究竟科記有咩好食呢 1）洋葱沙嗲牛肉多士（佢哋叫樣樣齊多士） 如 果你鍾情於嗰啲牛肉嗱到冇味啲汁噠噠嘅沙牛包，咁麻煩你求其去就近一間茶記啦。呢度係用新鮮牛肉，連同少許洋葱絲加埋秘制沙茶醬一齊爆香。唔會有好多汁， 不過啲牛肉夠晒嫩同juicy，而洋葱則炒到軟腍腍，配上烘過嘅多士，我敢講係我人生中食過頭十樣最好味嘅野！真係唔係講笑！之所以賣成$48份係有原 因！即叫即整，雖然係貴過一碟飯，但人一世物一世，係值得試吓！包冇介紹錯！ p.s. 唔喜歡多士，可以轉漢堡包都得，一樣價錢 2）招牌猪扒飯 豬扒可以話係呢度嘅招牌！佢哋醃得非常入味，經半煎炸後甘香美味。有啲人可能嫌乾身少少，但其實猪扒本身都好腍，少少猪油配白飯同少量老抽，正！好多人仲會加太陽蛋或者莱，更加豐富！又或係配麵／通粉都ok！ 3）涷奶茶 我係一名涷奶茶精，坊間大多數嘅都屬於唔合格！科記嘅涷茶比較滑，茶味香唔太濃亦唔澀。由於佢哋用比較大粒嘅冰，所以叫少冰咁杯茶就唔會因為啲冰溶晒而溝到好淡。 4）蕃茄牛肉通 好多人鍾意去勝香園排半個鐘食碗個湯係有一大半用罐頭plum tomatoes而成嘅蕃茄麵，其實我係唔明點解。呢度嘅蕃茄湯就絶對冇用任何罐頭去溝。可能你覺得唔夠濃，但一定冇人造色素。喺冬天食番碗係一流嘅comfort food。 温馨提示： 1）開放時間 千祈唔好星期日去因為休息！ 星期一至六lunch hour都要等位，四點就收架喇。 個人提議最好星期一至五兩點後去，星期六就早啲十一點好去喇！ p.s. 猪扒經常賣晒，我試過去到連飯都sold out！ 2）搭港鐵 Openrice資料就提議喺西營盤站落，不過個人認為上環比較方便啲。喺上環A出口然後向文娛中心方向行，斜對面就係水坑口街，跟住一直上，科記大約係喺荷里活道近水坑口街入面一條叫磅巷嘅小街，濟公廟對面。 3）駕車 如果揸車就要一直喺皇后大道西過咗尚興打冷後靠左轉左上荷里活道，然係第一個街口右轉，唔好轉上水坑口街。科記出面有啲空位偷雞可以泊吓。 誠意推介俾大家，亦希望可以繼續支持本地小店！
