期待已久既行程終於出發啦！ 24/01 農曆年三十晚，亦係武漢肺炎封城之後既第一日。今次肺炎比起之前SARS既疫情嚴峻得多，唔駛幾日已經多人中招。我地出發前都有d擔心，所以口罩、消毒藥水、搓手液等清潔用品都帶多份。 我地24/01晏晝坐濟洲航空去首爾訓一晚，最初諗住第二日中午就要再坐飛機去Lima，不如索性去仁川市附近過一晚，慳返搭車來回機場既時間，但原來仁川機場去仁川市都要40-50分鐘，同去首爾市區弘大既時間相約。。。所以最後都係揀返去弘大，至少可以出發前食返餐好既。 我地本身無咩韓圜，只夠喺機場搭車出弘大，所以我地係hostel放底行李之後就去弘大3號出口既travel depot唱錢，唱左500蚊港紙，諗住夠食晚餐同車費就算。當日匯率係1hkd：147won，都算ok，但回程再換既時候已經去到1hkd：150won（肺炎既疫情對韓國真係有唔少影響，依家仲出埋紅色外遊警示，我地真係好好彩。） 由於出發前要準備南美既行程安排已經好忙，所以首爾既晚餐我諗住去到先揀，反正安排住係弘大附近，食肆實好多唔駛煩。但。。。我忽略左當地同樣係會過新年，年三十晚大部分食肆都無開門，好多開左既都係烤肉店。我地怕食烤肉熱氣，會容易喉嚨痛（去旅行唔想病，尤其去到咁遠），加上韓國當時只有2-3度，咁凍既天氣只想食碗熱辣辣既湯面。無奈我地行左好幾條街都係得烤肉或者炸雞。。。好彩，最後係條巷仔搵到“弘大一只雞”。（其實我一早係map見到，但路痴既我唔知原來咁近，只不過係條巷度。） 寒冷既天氣配上清清地既雞鍋，暖在心頭，覺得好滿足。 餐廳只賣雞同少量既配菜，按人數點餐，所以入到去幾多個人就會比相對人數既份量，價錢都fix左，唔識韓文點餐都無難度（有中英文menu提供)。 食飽行返hostel， 途徑daiso，即使無咩特別要買，都總會行入去逛個圈，當食飽行下。我地當時見到有好幾款口罩（平既1000won 七個到貴既3000won一個都有賣）同消毒紙巾。本身我地已經帶左，但怕去落後既南美唔夠用，所以係daiso都買左d。到我地回程留係韓國既時候，肺炎疫情已經嚴重左，口罩同消毒用品都有限定購買數量，口罩仲要係無咩得揀，只有貴既KF94，仲要得好少量。 返到hostel已經11點，我地今次住既係Twins hostel，弘大2號出口，行5分鐘左右。Host早一日已經WhatsApp問我幾點會到，同用咩方法比錢。可能我地check-in既時間reception會無人，所以host已經係WhatsApp度send定相片同map，教我地點樣到去搵佢地既hostel同點樣self check-in。hostel包早餐（雖然只係簡單既面包同牛奶），房間都算ok，夠地方打開2個喼，所有野都似乎唔錯，但當我地發現房間只有淋浴，厠所係需要共用既時候。。。我就明點解一晚2個人只需HK$300。金san雖然有d錯愕，但最後都欣然接受，亦好彩只係一晚。 25/01 第二日我地雖然搭中午機，但朝早都無話可以訓到好晏。要預早2個鐘到機場，加上弘大到機場既車程，其實9點就要出門。仲要梳洗下同食早餐，所以最晏8點都要起身。 懶得online check-in既我，竟然被告知航班full full地，已經無連位，只可以安排前後坐，仲要係中間位，比人夾住。。。果刻即係比金san問責，仲即時提我回程要記得早d online check in。。。確實，要搭13個鐘機，分開坐又真係唔係好方便（訓覺都想搵個博頭捱下，費事捱左落人地度嘛~）。但天無絕人之路，我地遇到好心既外國交流生肯同我地調位，結果13個鐘又可以坐埋一齊啦！：） 第一次坐墨西哥航空，333既坐位，都算闊落。埋位前已經放左個枕頭仔同毛毯，坐定左就派耳機同獨立包裝既眼罩連耳塞，起飛無耐就有熱毛巾抺手，雖然好快涼左，但都幾貼心。 獨立包裝既眼罩連耳塞 除左呢d硬件，當然仲有野飲，有戲睇，包晏晝同晚餐，間中有nuts做點心，最緊要既係有辛辣麵杯麵做宵夜！本來聞到辛辣味以為係韓國人自備杯麵，點知四周圍既辛辣味越來越重，心諗雖然班機多韓國人，但都唔會咁多人自備咁勁架？！而且香味已經令我由唔餓變到可唔可以整返杯既程度。所以叫金san幫手問下機組人員係咪有杯麵派。唔夠五分鐘，金san拎住杯麵返黎，仲話機尾成車都係辛辣味杯麵。咁為食既我當然即時衝去整返杯啦！連我隔離位既交流生都頂唔住，跟我尾衝去機尾。其實成件事都係半自助，除左空姐幫手沖熱水，由拆包裝到落調味粉都自己黎，要幾辣都可以自己控制。食住杯麵睇住戲，真係好滿足呀！（尤其平時屋企無得食既情況下。） 食住杯麵睇住戲 成程機我一共睇左4套電影，食左兩個正餐加一個辛辣杯麵，仲有幾包花生小食，飲左十幾杯水，瞓左2-3個鐘覺。第一次揀餐係睇住一張A4紙，用手寫加畫圖既餐牌，都唔知係親切定簡陋，但都叫幾有特式。(但後其返左香港係網上見到其他航空因為武漢肺炎，都係用手畫餐牌比乘客點餐。)感覺AeroMexico都幾唔錯， 但唯一唔係咁好既應該就係fake人既usb插頭(係幫唔到你既手機充電)同fake人既wifi。。。 手寫+手畫餐牌 終於到左墨西哥城機場喇！但唔理人定程序，都覺得成件事有d蠢~其實我地只係轉機，但都要好似出境咁填哂出境紙，仲要排隊等過出境關。排隊時又唔好彩，排果條隊既職員，唔知係新手定係職位較低級， 會帶一d佢覺得有問題既旅客入房，比大粒野處理，呢個都算喇，但蓋蓋下章會行出黎安排/疏通後面剛到步既旅客排隊，係咩玩法？有無咁缺人呀~明明local人過關果面d職員比我地foreigner呢面清閒得多，好似濟坐係度吹下水咁。 左邊係當地人過關, 右邊係外國人過關 又可能真係香港人做野比較急，所以覺得成件事好無效率。亦好彩我地transit time 有成5個幾鐘，可以比你地慢慢黎。出左境通常都會去行李輸送帶等行李，我地只係transit，行李會直接送到利馬，所以就直接出inspection zone 將隨身行李過機check。 經過行李輸送帶後既Inspection zone 過完機就諗住望下指示牌行左（connecting flight)定行右（arrival area)，就喺望既同時，比兩個高大少少既職員叫停左要check passport。其中一位問我地係咪轉機，又睇左下我地passport面，講左句“China”。之後另一位仲問我地帶左幾多錢。。。最怕比海關問帶左幾多錢，怕唔係因為我帶得多過佢地限定既金額，而係上年去摩洛哥又係比海關截，又係問帶左幾多錢，我當然隨便講就算。但我隔離位金san傻到將自己腰包打開，拎哂比海關人員睇。個海關懶係搞笑咁話將d錢比哂佢就過得關。。。我當然第一時間大大聲say no！用手截住金san d錢，跟住個海關就笑笑口話講笑，叫我地收返埋d錢。。。 雖然都唔記得係幾多錢，但放得係腰包既都係大部分旅程既費用。更何況依家呢個年代都無咩邊個國家係要收左錢先比你過關（當時係咁諗，但今次去南美前爬文，又搵到文係講要比多d錢先批你簽證，比你過境）不過，旅行就係咁，總會遇到各種形形式式既事，過去既野就當係經驗。所以今次呢位墨西哥大哥問帶左幾多錢，我就反問佢錢係for what? 佢話travel用，例如1000,2000？咁我就順勢講左1000。佢仲問“only 1000?” 我就認真地敷衍佢答"Yes!" 佢地再望多左陣passport就放行。之後又係過安撿，過左安撿就到等侯區。 25/01 飛去比香港慢14個鐘既墨西哥城，仲停留係25號。墨西哥機場等侯區會搵到幾個free wifi，但都係上唔到網，其中一個話free 但要認證，但係我點整都係上唔到網，連想WhatsApp 報個平安都唔得。 咁就試下我地之前買既t-mobile喇，唔知係咪時差問題，未到設定既開通時間（我set 25/01開通，當時set指明會跟新加坡時區，所以就算時差，墨西哥比新加坡慢，應該都已經到開通日期。。。）我地試過用iPhone又試過用小米手機，反正又係點整都上唔到網。（不過去到26/01就用到t-mobile，所以應該都係時間上既問題。) Anyways, 要等多4-5個鐘先到下一班機，所以都係行下等候區。除左duty free 既店，都有7-11, Starbucks, Subway, 連minso，按摩店都有，我睇左下個價錢，20分鐘腳底按摩要440披索（~180港幣）！我地窮遊當然就唔浪費錢係度啦~ miniso都有, 雖然好細間, 無咩可以買~ Subway, Starbucks 7-11, 都可以用信用卡比錢~ 按摩店貌似係亞洲人開 當時係香港凌晨3點幾，其實都幾眼瞓，我地搵個位鄰住瞓多陣，同時幫手機充下電。瞓左陣有D餓就係7-11同Subway買d野食同野飲。
