細個時，棒棒糖對我嚟講係 "乖乖時" 先有嘅獎品，我不知幾希望可以每日都有一枝，可惜爸媽唔肯。 第一眼見到日本出產嘅 Fujiya 麵包超人棒棒糖 ($15) ，我對眼即時發晒光，好想擁有佢，除咗因為我 like 爆麵包家族，仲因為麵包超人棒棒糖俾到我懷舊嘅感覺。 Fujiya 麵包超人棒棒糖以麵包超人形狀做包裝。 有冇留意到？ 袋上個麵包超人好cutie，拎住枝紫色棒棒糖。 包裝袋右下角有 "刷牙" 溫馨提示。 每包有 6 枝獨立包裝棒棒糖，共三種味道，包括士多啤梨(粉紅色)、橙(黃色)及提子(紫色)。 頑皮嘅我併出星星圖案。 麵包超人包裝背面有好多不同資訊，如：營養標籤、成分、到期日、刷牙溫馨提示。 每枝棒棒糖嘅包裝設計非常簡單，透明膠袋上印有五位麵包超人成員，一次過見晒佢哋，咁就唔使爭龐。 透明膠袋上亦有棒棒糖味道嘅圖案。 麵包超人棒棒糖包裝設計非常容易打開，只要 "一拉、一撕" 就得。小朋友想偷偷地食，絶對係EASY JOB。 今次我揀咗橙汁味棒棒糖，以為面前只係一個橙色圓形嘅糖，點知望真d。。。 呀~~~~~~ 原來棒棒糖面壓咗麵包超人的樣子，令我好驚喜，仲搞到我唔捨得食佢添。 最後，為咗唔想同人分享喜悅，我一手就將枝棒棒糖放入口。 麵包超人棒棒糖果汁味濃，甜味又溫和唔CHOK喉。一枝共有23kcal。 口痕時，食一枝過吓口癮，滿足口腹之慾，又唔會影響正餐。 依家，每當我工作苦悶時，我都會拎出一枝麵包超人棒棒糖，有佢陪伴住我，可以令我變得醒神，仲可以求 "麵包超人" 賜我力量。 今年，我買咗一包 Fujiya 麵包超人棒棒糖，將 6 枝不同味道嘅棒棒糖放入全盒。點知大大小小嘅 "蝗蟲" 一到，全部麵包超人棒棒糖都被掃清光。
