上兩星期收到電話，話因為我以前幫襯做 facial 嗰間匈牙利皮膚醫生創立嘅品牌分店已閂門，我嘅戶口轉咗去另一間旺角某大型美容護膚品大本營嘅分店。同時，offer 免費皇牌眼部 facial 俾我。 咁啱又 book 到年三十晚 7:00pm 有位，決定去試一試喇，之後就可以去埋花墟買年花。 點知年廿七打嚟，問我可否早少少嚟。我都好想呀，可惜我嘅時間已經排到密密麻麻，我自己都要 6:00pm 先收得工，而且當初係你話 ok ，我先預留呢個時間為自己眼部肌膚喺農曆年前作最後護理。最終 ba 都改唔到時間。 我明白嗰日係年三十晚，個個趕住收工同家人慶祝，所以我趕頭趕命都喺 7:00pm 前到達 counter。 離遠見到 2 個不同高矮 ba 同 1 個比較豐滿嘅美容師喺 counter 後排排隊傾計，一見我嚟，即係手肘左撞右撞，示意有客人到。 到達 counter 表明 book 咗 7:00pm 做眼部 treatment。 ba 即時帶我到另一張檯做檢查，當然係一大堆問題喇。接住就入 counter 後嘅 facial 房。 講真句，我係超級唔鍾意喺呢類 facial 房做 facial，一嚟隔音差，二嚟地方細、迫，三嚟無地方 hea 吓。 不過，今次呢間 facial 房比想像大，又有梳妝台。不過，無 locker，我嘅袋要放喺梳妝台前嗰張櫈。 美容師幫我求其洗面、抹爽膚水，之後做今次重點：眼部 treatment。 美容師會用茶按摩球幫我穴位按摩，可惜呢位美容師好似啱啱喺學堂出嚟，依家要搵人嚟實習，問題多多。 總結有以下問題： 左右手力度不一 左右手不協調 穴位唔到位 手勢求其 照顧不周 經驗少 呢位美容師係我由細做 facial 以嚟第一次遇到嘅 "左右手力度不一" 及 "左右手不協調" 嘅美容師。 "左右手力度不一" 即係一邊大力，另一邊細力； "左右手不協調" 即係左右手喺穴位按摩時，可以一邊手有打圈按摩，另一邊手可以喺穴位按壓。 用茶按摩球按摩後，再用精華幫我按摩眼部肌膚。 美容師問我有冇戴 con，我話有，所以佢就住力。 之後我覺得好似輕咗d，所以同佢講，可以再大力少少。 呢 part 美容師嘅左右手協調到及力度一致返，不過穴位就唔到位。 人家係指腹點90度接觸穴位，慢慢按摩。可惜，呢位美容師就用指腹45度角入，繼續用45度按摩，好似大包圍，完全感受唔到穴位按摩嗰種舒適。 按摩後，到眼部 treatment 最後一 part：敷眼膜。 呢個時候，我話我 feel 到下巴左右兩旁嘅肌膚乾到有強烈拉扯感覺 (其實早已 feel 到)，要求美容師幫我搽上面霜。 我以前做呢個品牌嘅 facial 都未試過肌膚乾到有拉扯嘅情況，而且爽膚水係呢個品牌嘅皇牌產品，超級補水。點會搞到我咁？ 我話 "下巴左右兩旁嘅肌膚乾"，美容師真係只搽呢個地方，其他地方由得你。 搽咗之後，我發現臉頰肌膚同樣乾到拉扯，美容師先至幫我搽埋咋。 完全整個眼部 treatment 後，梳妝吓，離開 facial 房，ba 上前話效果好好，好適合我。 我都覺得，不過美容師嘅手勢就真係差到無人有。 我同 ba 講返美容師嘅問題，ba 話： 因為我戴咗 con，所以力度細，唔關事。 未曾聽過有關 "左右手力度不一" 及 "不協調" 嘅問題 得，聽到咁嘅回覆，我可以收聲喇。 好心再問題講出，唔面對，唔接受，絶對無問題，因為你有選擇時，我亦有選擇。 一間已令我失望到極點嘅品牌，真係可以放棄。 不過，以上只係年三十晚喺旺角分店嘅大概 40 分鐘眼部 treatment 嘅分享，絶對歡迎各位親身去體驗。
