有東京這個鋒芒畢露的鄰居，顯得在它旁邊的縣的存在感特別薄弱。但作為「綠葉」，其實都有很多好玩的地方，只待伯樂發掘。剛過去的 11 月，我就專登熬了 3 小時車到了千葉縣的 Mother Farm 一日遊，值得推薦給大家呢~！ . Mother Farm 其實 1962 年已開園，牧場創辦人前田久吉先生小時候家貧，因此經常聽到耕田的媽媽說：「如果有頭牛，家境就會好起來了。」孝順的前田先生長大後，事業有成，然後創立了牧場，並改名為 Mother Farm，獻給辛勞養育他的媽媽。 . 之但係，Mother Farm 的厲害之處並非只有一頭牛，還有 150 隻綿羊大遷徙、鴨仔大巡遊、擠牛奶、剃羊毛、果園摘水果、花田賞櫻、21米笨豬跳......等玩意，一日未必玩得晒。而且，大部分活動一日只開放兩、三個時段，所以建議事先抽 15 分鐘看看每日的「表演時間表」，商量好行程，再逐樣慢慢玩！ . 東京 > 千葉 睇吓個鐘~ 冇錯！ 當日晨早8點繁忙時間就由新宿出發！ 估唔到這種勁黑人憎的「同上班族一齊迫電車」的「自由行行為」， 今日自己做番，好慚愧~ >.< . 來到佐貫町站已是 11:15 。 要花三個鐘在交通上，並唔係因為車速慢，而是班次極疏，差不多一個鐘只有一班車。 所以如果要來，最好預早出門，否則過到黎已近黃昏了~ . 好彩一離開 JR，就有巴士準備開出。 巴士指示好清晰，寫明會經 Mother Farm！ . 日本巴士好舒服~ 不過今日個司機好燥底，鬧我哋做乜想落車唔㩒鐘... 由車站至牧場，車程約 15 分鐘，470 yen， 山路為主，而且極崎嶇，巴士錢唔慳得！ . 終於到達千葉 Mother Farm 了!!! 入場門票可即席購買，盛惠 1,500 yen，但建議預先在 Lawson 買， 因為平D之餘 (1,480 yen)，仲有價值 300 yen的雪糕券送，可入園兌換一杯軟雪糕。 . 第1站： 開餐食燒肉 全日未食過野，一入牧場即到餐廳開餐。 餐廳落地玻璃對住大牧場園景，仲有戶外位，好舒服~ . 兩人份量套餐有牛肉、羊肉、野菜 (2,980 yen)。 羊肉少少羶，一路對住出面的動物一路開餐，愈食愈唔對路，好有罪惡感，阿門。 . 第 2 站：動物零距離 食完飯先到附近的牧場，呢度有 7-8 種動物，遊客可以零距離跟小動物抱抱和拍照。 天竺鼠原來好可愛溫馴。 . 園內明星：草泥馬。小心牠會向你吐口水。 . 第 3 站：賽豬 這個是賽豬場，比賽就黎開始喇~ . 6 隻小豬已經入閘，工作人員會從觀眾席上選 6 位「領豬員」，負責催趕豬仔跑到終點，勝出有獎。 未被選出的觀眾，都可以「投注」： 開跑前，觀眾可購入各號碼的小豬公仔，競猜哪隻勝出，猜中可獲大豬公仔一隻! . 一出閘的時候呀... 原來豬仔仲跑得快過人，一隻隻好「知掟」咁朝終點喪跑！ . 第 4 站：食軟雪糕 yo yo~ 園內幾乎人人都手持雪糕，因為它以牧場牛奶鮮製，特別香滑。 有紫色藍莓味和白色呍呢拿味，亦可兩溝。 . 第 5 站：剪羊毛 Show 可容納千人的「剪羊毛Dome」 . 台上 19 隻多自不同國家的羊，主持人會逐一詳細介紹牠們出場。 之後... 就會選其中一隻去剃毛。 你睇！被選中的羊，非常不情願剃毛呀~~~~~!! . 完 show 後，觀眾可隨便走上台，近距離跟羊合照。 . 又或者可以摸摸台上的羊毛 . 第 6 站：手信店 裡面有好多不同大細的動物公仔，又有牛肉乾、牛奶、芝士.... 總之全部都跟牧場動物有關。 . 第 7 站：鴨仔大巡遊 鴨仔大巡遊一日只表演幾次，要預先睇定時間表，否則會 miss 咗表演~ . 工作人員會帶領鴨仔走到觀眾腳邊，肥肥的鴨臀，走起路來很可愛~ . 第 8 站：乳牛牧場 每日有4 次擠牛奶體驗時間! . 其實屋裡面仲有幾十隻牛，牛場旁邊仲有馬場，可以體驗埋騎馬~ . Behind the scene: 媲美 Window default 那幅 Wallpaper . 小貼士：牧場有不少斜坡，對於小朋友或老人家可能會較吃力， 所以可以坐這架狗巴士代步，一程 200 yen，到站後，車會發出可愛的汪汪叫聲~ . 千葉 > 回東京 最後一班車5點左右開出，一於返新宿，食河豚!!! 欲知河豚味道如何？密切留意下回分解! =p . 更多> 日本全國遊記 北海道地方 1) 北海道 東北地方 2) 青森縣 3) 岩手縣 4) 宮城縣 5) 秋田縣 關東地方 9) 栃木縣 11) 埼玉縣 12) 千葉縣 13) 東京都 14) 神奈川縣 中部地方 16) 富山縣 17) 石川縣 19) 山梨縣 20) 長野縣 21) 岐阜縣 22) 靜岡縣 23) 愛知縣 近畿地方 24) 三重縣 25) 滋賀縣 26) 京都府 27) 大阪府 28) 兵庫縣 29) 奈良縣 四國地方 36) 德島縣 39) 高知縣 九州及沖繩地方 42) 長崎縣 45) 宮崎縣 46) 鹿兒島縣 47) 沖繩縣 . . www.facebook.com/nihonzatsugaku 跟喜愛日本的朋友，一起交流最新的日本資訊和文化。 よろしくお願いします～ (^o^)
