話咁快就一年，就嚟可以拆埋下排牙箍（已經拆咗上排）。 一開始我其實唔係係諗咗好耐就箍牙，早幾年斷斷續續都有人會問我，點解你下排既牙咁唔齊既？係唔係遺傳？聽完果一日，我番到屋企會照吓鏡，之後就諗，其實都冇咩問題，因為都唔係好覺啫。之後開始好多人影相既時候，個口會擘到個口好大，咁我都唔執輸啦，試吓咁樣影相，但硬係唔靚（仲有D樣衰）。我先發現，係因為我下排既牙太唔齊。好似誇張咗，但我真係咁覺得，同埋女人好鍾意放大自己既缺點架嘛。 有一日，去朋友屋企，果堆朋友有一兩個係做美容，都係好鍾意扮靚靚，有個女仔FD講開箍牙，我就問：有冇牙醫可以淨係箍下排牙？佢話有，仲比咗個CONTACT我。我都未係即刻打，大概過咗一個星期到，我就打電話去問資詢費同埋BOOK時間。 當日去完之後，知道價錢覺得可以接受，我都有問上下一齊箍同埋淨係箍下排幾錢，再番去諗吓究竟上下都箍定係淨係下排牙。我都有上網搵BLOG，問咗朋友意見。有D朋友會問：吓，而家先嚟箍。我諗好多想箍既朋友都試過比人一句彈番嚟搞到自己冇勇氣箍。我都有諗過呢個問題，但唔知係最大阻力，最大既阻力係因為我有時要見客，如果比人見到好似唔係咁美觀。 我係差少少，真係果少少既推動力，果個竟然係我老媽子。佢講咗句：挨一年，但可以靚一世。點解老媽子咁有見地架！哈哈！佢仲叫我橫掂都係整，一次過上下排都箍，一陣箍完下排又覺得上排唔夠齊，又要再搞多一年。 最後，到而家，已經就箍完。其實一年好快過，如果想減肥既朋友應該會再有大D既動力，因為一開頭真係輕咗7磅。因為真係痺到食唔到野，好彩我本身唔係咁為食。但過咗3個月到，就習慣咗，係啱岩覆完診果2日唔係好食到野，之後都好正常。不過咬蘋果，食雞肶果D就係冇乜可能會食到。我聽過來人講，就算係箍完，都唔會好似以前咁有牙力，呢樣我都覺得係，因為我拆完下排，我會挑戰吓人體極限去咬蘋果，因為我本身好鍾意食蘋果。但係唔得。我唔會用慘同唔慘去形容，只要自己覺得值，就唔會覺得慘。 可能係我既第一篇SHARE，真係長氣咗少少。 睇相最實際，拆晒再同大家SHARE :) 完
