自從N年前橋底辣蟹被寫入旅遊書繼而被旅客攻陷兼價錢貴左之後，我試過喜記，但HKD1000兩位完全食唔飽，最後某年某月某日見到呢間UpUpDupDup既財記辣蟹… 老實講，佢唔系話特別好食，但以主要系想食避風塘炒蟹既我，我覺得都可以去下。對其他小菜我就無抱特別既期望。通常佢門口有幾隻唔同size既蟹比你揀，HKD4xx，HKD6xx，HKD8xx，我自己就鐘意甘揀好過拎隻蟹去磅黎收錢。 無啦啦系Groupon見到有財記既二人餐，HKD558再加一服務費，已包茶芥同埋小食，甘即係一共6百蚊到啦。一隻蟹都差不多呢個價啦，即管去試下先。 我地揀左： 油鹽水魚湯浸大蜆 蒜蓉菜心 四隻豉油皇果皮煎蝦 香江避風塘炒蟹 招牌豉油皇蟹油炒麵 汽水 油鹽水魚湯浸大蜆 說好的大蜆呢？蜆有少少沙，唔可以話佢唔新鮮，但又唔夠新鮮，好彩無腥味。魚湯味完全被黑椒蓋過，整體偏咸，蜆亦食唔出原本既鮮味。粉絲普通，剪得比較碎，難於夾起。分量唔算少，但味道真係好一般。總括黎講，我覺得我自己煮既好過佢。 蒜蓉菜心 咸！咩事甘重手落甘多鹽？菜心炒既時間其實岩岩好，軟硬適中帶點爽脆，只可惜真係太咸啦。分量唔太多，如果鐘意食菜既可能覺得唔系好夠。 豉油皇果皮煎蝦 四隻蝦都幾大隻，不過都系一樣偏咸，完全食唔出有果皮味。質地雖然都叫左有彈性，但少左蝦既鮮味，佢應該系急凍蝦唔系新鮮蝦。 招牌豉油皇蟹油炒麵 好彩炒麵終於無偏咸啦！哈哈！普通一個炒麵囉，有落蟹油咩？唔覺wor！ 香江避風塘炒蟹 好彩好彩好彩炒蟹系好食既。比我想象中大隻，size似平時HKD6xx個d。（之前同個waiter吹開水時，佢話有時無曬細蟹就唯有比中蟹人，唔知係咪我個d呢）我地叫左中辣，蒜粒炒得好香唔太油，不過就唔算好辣囉。肉質夠實，我肯定佢系新鮮劏黎煮既。好味！ 成餐飯既亮點系隻蟹，我地其實亦系為左隻蟹去既，所以就算其他既小菜麻麻地，我又無特別去諗佢抵唔抵囉，我咪當正價食左隻蟹囉。哈哈！不過，waiter既態度真係幾好，可能我地比較早去未有甘多食客系度啦，定系宜家香港既生意真係甘難做？！ 財記辣蟹 Choi Kee Chili Crab 地址：銅鑼灣謝斐道392-402號地下G&H號舖 電話：2234 0888
