第一次接觸滑雪係2001年1月時同另外"兩條蕉"參加x環遊去韓國觀光旅遊五天. 因未見過落雪, 二嚟又未滑過雪. 咁年青人當然選擇個有得去滑吓雪嘅旅行團啦. 嗰陣時只係知滑雪等於ski. 咩叫snowboard? 識鬼咩. 個團只係包ski equipment, 唔包上山嘅吊車證. 其實個導遊未出發去雪場前都係咁叫我哋千其咪鬼上山呀, 整親就煩啦. 原來D團友全部都係未滑過雪, 個個咪淨係喺山腳D平地篤篤吓囉. 篤得兩篤都悶啦. 見人哋個個係山上面滑落嚟咁鬼型, 而自己淨係喺山腳嘅平地篤篤吓, 仲唔比D韓妹笑死咩!! 我哋呢D中華兒女, 個個心口掛住個"勇"字, 點哀得架!! 咁啱當年韓國非常大雪, D雪咁厚怕咩呀!! 又有個心口掛住個"勇"字嘅男團友叫我哋不如一齊坐一次吊車滑落嚟啦 (早D講嘛C兄~~). 好, 小弟本著一顆為國爭光嘅愛國之心, 一於決定上山一次 (其實宜家睇返都係一小段吊車嘅高度, 係beginer level). "不到雪山非好漢" ... GOGOGO!!! 我哋四件都未坐過吊車(吊腳嗰種). 行到去吊車站當然要睇吓點坐先啦, 唔係出咗洋相點樣為國爭光呀 ...好在上車嘅地方係平嘅, 咪篤篤吓咁篤過去囉. 第一個難題完滿"解決". 初初坐到上吊車都驚驚哋架. 又高又大雪. 但始終都係第一次, 心情都好興奮. 睇吓風景睇吓女, 話咁快就到嘞. 不過第二個難題又嚟, "點落車呢"?? 上吊車係平地, 落吊車嘅係斜架喎!!! 計算?? 心諗咁哽係"滑"住落車啦, 唔通仆住落車咩. 仲諗, 要落車嘞!! "滑(篤)"住落..."滑(篤)"住落...heheeee...攪掂食碗麵. 優美嘅動作等同我國體操王子李寧完成一連串動作落地一樣"十分"滿分. 我D friend? 各安天命啦. Heheeee~~ 嘩, 咪講笑, 原來條slope都幾斜吓架喎 (呢句當然淨係喺自己個心講啦). 我哋四件就好似"大時代"結局時丁蟹D仔咁一個一個開始落山嘞. 我其中一個friend同個團友先行落山. 佢哋由山上面"直落"!!! 唔使十秒就已經到達山腳 ... 嗰種"為國犧牲"嘅高尚情操真係值得世人尊敬. 而佢哋兩個哽係向住D韓妹"飛身"嚟結束呢段短短十秒嘅"極速之旅"啦!!! 我同另一個friend睇到咁嘅情況當然"慢慢享受"呢個滑雪過程. 正所謂"上山容易落山難", 點樣"慢慢地享受滑雪過程"成為第三個難題. 條slope又斜, 又未滑過雪, 點樣停呢?? 諗咗一陣, 有方法!! D雪咁厚又軟, 訓底落D雪咪得囉. 我哋就跟住呢條"屎橋"出發落山. 我哋當然唔會"直落"啦. 首先向住雪道嘅邊邊滑過去. 差唔多到盡頭咪試吓轉彎, 唔得咪用訓底落雪嗰條計仔囉. 哎吔, 到盡頭都轉唔彎.....我訓!!! 哝?! 點解D雪去到條腰咁深嘅!!! 起唔返身tim... D雪又深又軟, 爬都爬唔返出嚟. 著住普通風褸嚟滑雪嘅我當然係腰道入晒雪啦... 我個friend係中途轉到彎無事呀. 我咪叫佢唔使理我等我自己救自己囉. 因為我對ski已經甩咗, 而D雪又深又軟, 只好唔停咁爬希望爬返出嚟. 經過成十分鐘不斷努力之後, 終於.....爬返出嚟. 我所用嘅氣力就好似亞LYNN攻城33小時一樣, 不過我就用嗰短短十分鐘嘅攪掂咗. 又熱, 又出晒汗, 又無晒力 . 爬返出嚟之後, 著返對ski繼續"滑"落山. 但我當然唔會"咁精"再用同一方法落山啦 . 我哋一路以大"Z"形 (唔係"S"呀...Heheheee) 咁慢慢滑落山. 又試吓轉彎. 其實滑雪真好好玩. 諗返起轉頭呢一小段slope我宜家玩snowboard應該用十幾廿秒就已經可以滑到落山腳. 但我哋兩個就足足用咗超過一個鍾!!! 我仲記得滑到落山腳就見到我哋嘅導遊已經x晒口面tim ... !!! ... :P 就係因為呢個幾鍾, 我中咗滑雪毒嘞~~ 而我係點樣開始玩snowboard, 下一part再講 ...
