再過多一個禮拜就出發去班尾，仲唔快快手整理返之前介紹過野沢既餐廳，唔知幾時先係吉時，希望幫到將會去野沢既朋友仔，好多食物相之前都有post過，可以喺https://www.facebook.com/snowmonu/用 #野沢食事 搵返出黎。 其實野沢好多野食，所以篇野係有D長，因為超用心打家。 地圖參考如下 http://www.nozawaski.com/winter/pdf/townmap2016_J.pdf #野沢溫泉 餐廳介紹 區內篇 厨くりや Yakitori & Bar ★★★★★ 地圖冇標呢間，參考座標E5。 有兩個入口，喺St. Anton對面或会夢隔離。我覺得呢間好正，推介! 串燒種類算多，不過全部每碟4串，4個人去食啱啱好，兩個人就有D滯，試食兵團已經盡可能叫晒餐牌上既款式同大家分享，仲特登黎多幾次。 雖然佢話自己係居酒屋唔好當餐廳黎食晚飯(因為日本有D居酒屋只得前菜小吃細細碟，你食10碟都唔會飽仲要唔平)，但呢間絕對食得飽人，仲好飽添。 唔駛太早黎搵位，有次6:15pm行過都仲未開，連個燈箱都收走左搵唔到間野，不過7點黎又未必有位，所以睇你好冇彩啦。 每人消費約¥2200-2500 豐儉由人 ビリケン食堂 Billiken ★★★★★ 參考地圖E3 呢間野係好味但好沙塵，次次經過都話full，反而有次唔打唔撞就試到。食評好易寫，除咗意大利粉比較失色之外全部都係中上之作，推介! 記得訂枱呀!! 每人消費約¥2500 七良兵衛珈琲 Shichirohei Coffee ★★★★✫ 參考地圖C4 前菜的骰好味(得一啖仔，你個口大啲就得半啖，所以食左＝冇食唔飽肚) 油浸薯仔菇煮法好特別味道唔錯，但成兜野都係油好膩好得人驚。個起泡汁豬肉都好味，但都係果句，食左都係冇飽肚既感覺。 上次係淺嘗，之後有朋友黎話間野好得。 是次每人消費約¥1500，食大佢應該唔止呢個價 deuxすもう鍋 duex Sumo-Nabe ★★★★✫ 參考地圖 E5 一間不錯既相撲鍋，起碼食得飽人先。原本個辣味獅子狗都唔錯，似係港式XO醬咁，不過成碟都係就愈食愈唔到對路，好滯呀 每人消費約¥2000 そば処鈴木 Sobadokoro Suzuki ★★★★✫ 參考地圖D7 有雪友推介過呢間只開中午嘅蕎麥麵餐廳，咁犀利又等我試下先。果然不負所望，佢嘅天婦羅係炸得唔錯，馬刺仲食到佢解凍中既碎冰，仲有個野沢菜，係我食咁多次最好味既(好在有咩都識下唶，唔係就錯過左) 每人消費約¥1600 自由劇場 ★★★★✫ 參考地圖C5 原來，老闆識講英文家。呢間居酒屋(?)非常盞鬼，亦係我第一次去呢類型既居酒屋。有炭爐比客人燒串燒，火勢均勻唔會燒燶野食(基本上)，因為個爐只係幫你整返熱/暖D串燒，唔係煮熟野食。 串燒款式同味道一般/可接受，雞泡魚、魷魚比較好味，全部都係¥100 煮物款式頗多如關東煮、日式叉燒咁，但你要識睇日文咩打咩，不過全部凍冰冰既。結果我地燒返熱黎食。 第二次去好多鬼佬，又淪陷了。 齋食串燒應該食唔飽人，不過係幾好feel，吹水一流，想有唔同既體驗，可以一試，有企位有坐既。 消費約¥2500，唔好期望會飽肚。 萬里燒肉 Yakiniku Banri ★★★★✫ 參考地圖D6 一直都想試，好在冇令我失望。我覺得比賴係走高檔次既成吉思汗仲要實在同地道，味道唔錯。 其實餐廳唔係細，坐落都闊落，仲有分枱同榻榻米。上次同日本朋友去，個老闆問我地係咪日本人先比榻榻米我地坐，如果係洋人的話，佢應該會話冇位，因為外國人坐唔到。 可以的話最好book定枱，因為試過途經想去食，佢門口都貼住只做有reservation既。 是次消費每人約¥2000 市川屋 ★★★★✫ 參考地圖D5 (燒肉萬里斜對面) 雖然喺野沢食紅豆餅好似唔夠特別，但呢間店仔既紅豆餅新鮮出爐，熱辣辣，滑完雪食舊熱野暖在心，紅豆份量十足，誠意推薦! ¥80/個 良味食堂 ★★★★ 參考地圖E3 呢間真係走漏眼，估唔到佢咁抵食。 因為門面寫住そば，所以一直都唔係我首選，但食無可食真係咩都試下啦。除左そば佢仲有烏冬同飯類，小食都唔錯，雖然馬刺比其他餐廳貴，不過佢相對多片同好似有唔同部位咁。 雖然唔係叫左好多款野食，但都飽肚，仲要每人消費都只係¥1600左右，我真心覺得抵，好耐未試過出去食飯唔過¥2000 ととりな Yakitori Totorina ★★★★ 參考地圖C6 另一間不錯既串燒店，價錢比較相宜，可惜得幾款，再encore就冇咩選擇lu 每人消費約¥1600 治作 Jisaku ★★★★ 參考地圖D3 黎過兩次整體上唔錯，Yam pancake幾特別可以試下，好似D鼻涕潺潺地咁。 我覺得呢間野都幾搞笑，上次有個細佬仔飲飲下水隻杯爛咗間野D人都冇講咩，又冇話唔好意思(唔似日本人乜都噏一餐既作風)，就咁木無表情收咗隻杯，我以為係個細佬哥曳，點知今次到我哋個杯裂左都仲照用既，咁樣會唔會太環保?! 每人消費每約¥2000-2500 みなと Minato ★★★★ 參考地圖F3 最好book定位，因為黎過兩次都話full，爭D放棄唔再黎，結果喺離開野沢前碰運氣walk in又有位。如果係兩個女仔一人一份鍋物都夠食(¥1300位)。如果會點前菜小食或叫杯野飲，每人消費約¥2600 居酒屋つくしんぼ Tsukushinbo ★★★★ 參考地圖F4 雖然呢間唔係最好味，但唔知點解個個都會黎呢間，然後我食左好多次。 もつ煮即係類似腸既物體，食落彈牙係好味既，但呢間口感係散既就唔係好啱我。 大致上不過不失，烤魚都正，呢度既馬刺就麻麻地，可以話食物水準頗浮動。 每人消費約¥2200 河一屋 ★★★★ 參考地圖D3 晚餐有兩款選擇：牛同三文魚 雖然唔平，但值得一去，不過我既話一季黎一次就夠。D牛係好好味，不過愈食愈油，所以好滯。 **晚餐唔需要記得同職員講，人地預好晒四人份點知得兩個人出現，你話幾唔好呢，仲要係香港人。 每人消費約¥5900 登登登登 "和牛亭" Wagyutei ★★★✫ 參考地圖E5 黎過野沢既朋友應該有食過或經過過呢間比較高檔次既すき焼き/ しゃぶ しゃぶ 佢有三個套餐分別係 ¥4800A5和牛 ¥3800本地牛 同¥2800既澳洲牛。但我想講呢間野又係巧立名目咁收錢，呢樣加果樣加，轉個しゃぶ しゃぶ (Shabushabu)湯又要收¥300?! 仲要人頭計，咩事?? 仲要個價錢未包稅，所以唔好以為點個¥2800就可以落樓，絕對冇咁既事。 份量又係少，又係到喉唔到肺另一傑作。和牛同本地牛都好味，相比之下¥2800既澳洲牛就好一般。最好book定枱，亦睇你好冇彩。如果唔係食和牛，我諗唔到咩原因要黎。 消費每人約¥5000 四十雀 Sijukara ★★★✫ 參考地圖E5 晚飯過後搵個地方吹水就啱，因為佢開得比較夜。如果諗住黎食晚餐既話就冇咩主食選擇，只有兩種麵：野沢担担麵(少辣)同拉麵(唔辣)比你揀。 魷魚小食唔錯但偏咸，佐酒一流。炸蝦仔幾得意，黎呢間必點! 消費每人約¥1000 Juntos Mexican Restaurant & Bar ★★★✫ 參考地圖D4 因為之前食左餐難食意大利野，所以對喺野沢非日式野食唔敢抱咩期望，試左Nachos w/chicken, Taco w/pork 同Burrito w/mushrooms都唔錯喎。但係第二次去唔知係咪因爲training完咗實在太攰，加上諗住試新野叫左個Rice Bowl w/pork 我覺得有D賴野，兜野咁Q難食既-_- 餐廳有兩款甜品選擇，係意料之外好味，雖然我唔好玉桂味嘅嘢，但都覺得OK，另外一個係脆皮包香蕉，兩款都好香脆，值得一試。 每人消費約¥1500-2000 さかい ★★★ 參考地圖G5 連續黎左兩晚，基本上餐牌有既食物都試過。食左咁多款，除左雞翼係好味之外其他都好一般。甚至唔好味-_- 既然野食唔係特別好味，就會以餐廳氣氛同服務態度黎衡量會唔會再次光顧。 欣賞個老板娘晚晚著和服靚靚咁招待客人，不過有個女員工既態度就唔係好得， 完全影響我食野既心情，而且間居酒屋煙霧離漫得好緊要，煙親雙眼同個鼻都好唔舒服，其實都唔係第一日做生意家啦，點解個抽風系統會咁家，所以有得揀我唔想再黎第三次。 每人消費約¥3000 You ★★★ 參考地圖E5 又食雪糕啦啦啦~ 呢間舖頭主要賣麵包同雪糕。其實行過n次都冇為意佢有賣野沢菜味既雪糕，咁就要試下啦。 不過一D都唔覺有野沢菜味，嚴格黎講只係一杯帶甜味既雪糕，中間夾雜左D唔知乜野碎粒，所以有D野咬下，不過都算唔錯。 每人消費約¥330 はと車 Hatoguruma ★★ 參考地圖E3 三年前有黎過，印象應該一般，所以一直唔係我首選想黎再試食。 地方好大但冇乜人黎，我都覺得古怪，食完之後我就知點解。因為間餐廳D野食都真係幾古怪，定我唔識欣賞。未至於難食，但唔會想再黎或介紹比人咁囉。但如果旺季度度都冇位既話可以試吓呢間野，因為真係好多位，餐牌一半以上既食物試勻咁滯，莫非真係冇下次。 每人消費約¥2500 狸 Tanuki ★★ 參考地圖F4 位置方便，就喺大湯附近，成幢野上中下都比佢買起晒，犀利。 季初黎仲裝修緊，連續搞左幾日又真係趕得切開張。去果陣成8點，想食比較特別既Beef Cheek但賣晒，其他野貴夾普通，我地一行二人就叫個前菜、主菜同甜品試下，點知... 嘩~ 佢個meat ball stick成¥800。以為有咩咁特別，點知不如一般居酒屋既串燒，¥800我諗我食到好多串，反胃都得。然後個main course又好一般，口味怪怪咁，連個甜品都冇特別，其實想再黎試多次係咪真係咁差，但又驚賴多次野。 總結：日式fusion菜頗貴，專做遊客-鬼佬生意(90%) 每人消費約¥2500 但唔飽，D鬼佬咁食得，唔知要幾錢埋單 でえすけ Deesuke ★★ 參考地圖D4 三年前呢個位唔係食拉麵 。 間野冇咩特別，唔食亦冇損失。選擇已經唔係多，仲要日子限定，想點？ 味道一般，好油。不過開得夜，十一二點都仲有得食，夜車到或夜麻麻肚餓都可以黎醫肚。 每人消費約¥1000 ぼくちそばかごや Bokuchi Soba Kagoya ★★ 參考地圖D3 聞說好厲害，一日限賣50份，我當然要試下啦。滑完雪即係黎怕賣晒，點知好失望。 原來呢間舖只賣蕎麥麵冇其他餸菜配料，係有D自家小食比你任食，但食完唔會有滿足既感覺。 然後D麵最後係濕滴滴唔乾身，所以試過就算。 是次消費約¥800 成吉思汗ひびき Hibiki ★✫ 參考地圖E4 有set或散叫，其實個set都係得3種羊同腸仔。其他就係小食，的骰到呢~ 唔係唔好味，但未至於好味到嘩嘩聲，樣樣細細碟好似唔夠食咁定我大食?! 我地已經揀左個貴D話有10個courses家啦，你點個平既得7樣野應該唔飽家啦，或者散叫囉。 牆上有塊板寫住special menu 但佔左餐牌8成野食，所以佢應該將個menu改做special menu咪得囉... 全部都係羊，臨尾有個甜品比你清清個口係唔錯既。 是次消費每人約5000円(個人覺得有D貴，價格與食物質量不相符) 風の家 kaze no ie ✫ 參考地圖E4 間野唔係好掂-_- 炸洋蔥圈唔問唔比sauce，味道一般，服務一般，個侍應唔係將碟野食擺喺枱上面而係就咁遞過黎要我地接住，想點呢? 羊架好咸，啲伴菜好唔得，薯仔好油又凍又唔好味，洋蔥圈底底果D難食我當送既就唔同佢計較，伴菜又係咁，係咪有新煮法我唔知。Carbonara意粉我唔識欣賞>_< 總結：唔會黎第二次 平均消費每人約¥2000 雪場篇希望出發前搞掂埋佢，呢篇野咁長，唔知有幾多個睇到尾?? 比個讚你~
