日誌又荒廢了一整月，這月沒有什麼好介紹，比較特別的是前幾日去了澳門閒遊咗三日兩夜﹗ 難得同食家一齊有假期當然去澳門休息吓，故無咩特別景點，亦無咩特別話要食，於是一於以試新食店為主﹗ 之前食開既林記、泰臣、法蘭度等等等都無食過﹗夠特別了吧﹗就為大家逐間介紹吓﹗ 第一晚我地兩個搭巴士去咗筷子基，試了這間在網上評論不錯的新濠仔。 澳門食店其實一向都無咩食評，我都係上澳門既討論區搵吓，味道真的不錯啊﹗ 街坊入鋪嘅大牌檔格局，由於臨近年廿九關係，見到好多檯客都係一家人做節而來﹗ 先來一個白灼花螺，半斤$80，又估不到半斤有咁鬼多喎﹗ 螺味極濃，蘸上辣椒醬味道一絕﹗ 再來試試這兒的幾味招牌菜，這是燒汁肥牛粒。 牛肉粒半肥半瘦，吃落有脂香，個燒汁亦較得甜甜惹味的，可惜是牛肉醃過，但整體$70碟是不錯的﹗ 這個焗茄子有個好架勢既名堂，叫釀焗雙響炮﹗ 我就係俾佢呢個名吸引咗而叫，其實是汁焗茄子，兩大條無切過既茄子就有如兩轆炮了吧？ 小炒王，炒得乾身亦夠火喉，蝦乾銀魚下得多，一碟可送四支大啤﹗ 其實見對面檯既燒雞、海鮮等也很美味，但得兩條友真係食唔好咁多樣﹗ 整體味道也不錯，加四個餸加四支青島埋單$300，值得介紹﹗ 第二天訓到成11:00am先起身，當然係去我上次Blog都有介紹過既水上街市啦﹗ 吃了一次真係念念不忘，這次已是我倆第三次來幫趁喇﹗ 我地先去一樓街市買餸先，買完餸就攞上去俾老闆娘煮﹗ 認得了吧？唔記得自己睇番前兩篇日誌啦﹗ 見有新鮮青口好耐無食過，就咁白灼蘸辣椒豉油來吃，$20斤成十五隻都有﹗ 味道清甜，青口吃落挺Cream的，好味喎﹗ 買了$15白飯魚，叫老闆娘椒鹽炸再加辣椒炒炒佢﹗ 估唔到做得咁好食，白飯魚條條酥脆，椒鹽味夠，又辣又香，勁正﹗ 以後來是必點的一樣佐酒美食﹗ 主角來喇，每次來水上街市為的就是一窩完美的蟹粥﹗ 今次我好重本買左隻成斤重既大膏蟹$100，出到來既效果比之前兩次真係更好吃呢﹗ 唔係講笑架，一邊肉都已經成個碗咁大﹗ 蟹黃融化於粥入面，成窩粥甜到不得了，想說這店的粥底真的很好，又棉又滑，所以我真係不能不說這是完美的蟹粥﹗ 有相為證，真係成窩粥都係蟹黃架﹗邊有可能唔好食？ 超級大滿足，埋單連兩支啤酒及加工費都係收我$120，真係平到痴線邊到搵？ 這窩粥賣$500都必大把人食，何況而家我地食完成餐都唔洗$250﹗ 香港的朋友來澳門，真係可以試試這兒架，老闆同老闆娘兩個苦心經營這粥鋪，作風樸素老實，小店值得多多支持﹗ 吃完粥到處行吓，去左大三巴整番個胡椒餅﹗ 加左價$13去到$15，依然係咁好食，肉汁多蔥又夠香，一個兩份分享﹗ 吃完胡椒餅我地去咗澳門大會堂睇一代宗師，哈，去澳門都睇戲估唔到吧﹗ 其實係平日在香港都無時間睇，難得在澳門無咩好做就去睇喇﹗ 估唔到不錯喎﹗平日成個院幾百個座位，得幾條友入場，好正好舒服架﹗ 晚上又去試新野喇，搭巴士去左媽閣，一試這間想試很久的長城燒烤。 有睇過澳門旅遊書就一定會見過呢間野，終於有緣一試，的確不錯﹗ 不停食食食，先來番個葡式炒雜菜清清腸胃先﹗ 夠哂大碟，蒜下得夠多，葡式肉腸片令菜吸了不少鹹肉香，好好味﹗ 原隻燒魷魚，烤得外皮香脆，肉質不乾亦軟糯，正﹗ 再來一隻燒春雞，雞皮烤得脆卜卜的，雞醃得夠味卻又不會一味死鹹，最欣賞係雞全熟之餘肉仲係嫩的，好味道﹗ 連三支青島，埋單$250左右，不算貴，除燒烤外她亦有不少葡菜可選擇，多點人來會更好，試多幾樣﹗ 最後一天的行程，簡單為主，就係落去茶記食豬扒包﹗ 氹仔這間美景美食，可以一試﹗ 豬扒包即叫即做，豬仔包焗得極香脆，熱辣辣兩邊塗上牛油再夾上大大塊豬扒﹗ 豬扒真係大到突哂出來架，豬扒醃得入味，香茅味重，不錯﹗$16，同食家一同分享﹗ 吃完到了氹仔濠景花園下的Savory Crab飲咖啡，這兒吃美國菜，裝修舒服。 咖啡不錯只係廿幾蚊杯，仲要有免費Wifi上網，閒Hea睇下書打下Candy Crush最好﹗ 臨走按捺不住，要再食多個豬扒包，見這間余榮記開到成個氹仔都係，一於買番兩個包上船食先﹗ 辣魚包，辣魚醬很薄，吃落只有咖哩味，麻麻地﹗ 豬扒包，好怕而家尐食店加東又加西，加片蕃茄又加兩片椰菜咁，搞到個包不淪不類﹗ 吃落好明顯沒午餐的那間好吃，豬扒唔夠味，牛油又無，真係去食個漢堡包無咁嬲﹗ 這就是我倆最近的三日兩夜澳門之旅喇，悠閒吓唔趕行程很舒服，希望下次大假可以再去過﹗ 很多網友掛住大狗，他很好，這張相是上星期帶佢去醫生打針影的﹗ 多謝大家支持，又係那句，網誌十年才更新一次，搵我就add我Facebook啦﹗ https://www.facebook.com/#!/smallsmalllin 我的微博: http://weibo.com/smallsmalllin
