16/6 坐樂桃0035機，機身比UO窄D，感覺上得唔太舒服，不過我坐走廊位隻腳可以伸出少少已經比較好D，成程機醒下訓下。。 0520就到關西機場T2， 可能因為T2得樂桃落機，所以過關同拎行李唔算太耐，之後就SHUTTLE去返T1搭車去酒店 上次搭南海電鐵係難波轉車，唔知係咪上次唔識行行左好遠路，今次搭到天下茶屋再轉堺筋線到長堀橋，今次住ARK HOTEL，酒店隔離就已經係地鐵出口好方便，就算行去心齋橋都係3個字度！ 去到酒店放低行李都只係7點，諗住早D去黑門食個早餐，點知原來黑門好多鋪都係開9點，好彩有間CAFÉ坐下可以抖下 9點幾就開始出去亂覓食，食左Y1500既吞拿魚壽司，Y1000生蠔海膽，仲試左河豚刺身，但我完全唔識欣賞，除左有D口感，UNUN地我食唔到有味。但總叫試過囉 之後時間尚早又唔知去邊時，我地就周圍行，行行下行返去難波BIG CAMERA因為落雨我地入去HEA下 之後就去睇owl family貓頭鷹啦 搭堺筋線(天神橋筋六丁目方向)，到「南森町」站。從南森町站3號出口直走 去到見到可以walk－in 12點果場，我地就冒住雨都等等啦 每場一個鐘，y1500包一杯無酒精飲品，亦可online book位Y1700同樣包一杯飲品但就可以揀酒精飲品揀，但我唔覺佢有酒精飲品揀 每張枱都有一份中英日既講解，職員亦會講解一次～ 之後就可以親親貓頭鷹啦 每場都有6隻，完左一場佢地就會去隔離果邊休息，所以唔係範圍內既貓頭鷹係唔掂得架！！ 一個鐘好快就過，要同佢地講再見啦～ （其實好矛盾，因為佢地真係好滑好可愛，但見佢地咁樣被人困住無自由又好慘） OWL FAMILY 北区天神橋1-10-13 Osaka-shi, Osaka, Japan 530-0041 跟住就開始週圍遊蕩，無意中行左去天滿宮 跟住又行左一陣天神橋筋，真係好長好似無止境咁長 因為太無止境咁我地就返轉頭搭車返心齋橋食大起水產 除左佢所謂既toro唔好食之外，其他都好好味，可以話平靚正之選！！ 大起水産回転寿司 道頓堀店 daiki-suisan.co.jp 日本〒542-0071 Ōsaka-fu, Ōsaka-shi, Chūō-ku, Dōtonbori, 1 Chome−1−7−24 四海樓道頓堀ビル 點知食完就落大雨，諗住係藥妝店行下避雨但完全無細雨蹟像，我地決定冒雨行返酒店 終於可以上房了，但全身已經濕透，安頓好d後立即秒訓，凌晨機到日本真係要100％體力＋精力，下次盡可能我都唔揀凌晨機到啦～～ 補眠完就去返心齋橋買鞋，因為太大雨我對鞋完全報銷了，好彩我著左對舊鞋者～晚餐去左食大阪燒，但我唔記得係咩名～ 唔知點解每晚臨返酒店前我都一定要行下便利店先安心～之後見到白桃期間限定就梗係試啦，點知原來係孖裝冰條。。。唔特別囉～ 食飽就去搵周公。。。明天重點行程！！！
