蜜月第五天 是日行程: Swansea → 荷伯特 → Salamnca Market → 威靈頓山 → 荷伯特 重新進入繁華市區 喺民宿食完早餐又係時間check out嚕，向城市出發！ 荷伯特同塔斯曼尼亞其他地方真係完全兩個世界，荷伯特係一個現代化城市，同之前咁多日見嘅原始大自然、簡單小村落截然不同，不愧係塔省嘅首府呀。 大鄉里入城，第一件事係返酒店放低行李先。終於嚟到城市，所以住酒店會方便一啲。下榻嘅係市中心附近嘅Hotel Collins，旁邊有收費停車場、醫院、大型超市、餐廳等等，一應俱全。 荷伯特週末市集 用咗成朝揸車落嚟，係時侯祭一祭五臟廟。Salamanca Market 係荷伯特每個星期六先有嘅 weekend flea market，等Shopping魔會一會佢啦！ 果然，Salamanca Market非常之咁熱鬧，連搵個位泊車都唔係咁易，而且泊到老蓮咁遠嘅街邊位都要俾錢嗰種程度。Anyway，泊好車之後就去搵食！ 買咗個熱狗一路行一路食，呢度真係乜都有得賣呀，衫呀碗碟呀擺設呀香草呀，總之就包羅萬有！嚟到呢個專賣薰衣草產品嘅，Shopping魔出手喇，買咗前面嗰支噴床具嘅薰衣草噴霧，咁瞓落床嗰時就香噴噴啦！而後面個啤啤都係塔省特產，只要將佢放入微波爐叮一叮，就會暖笠笠，持續散發薰衣草香味。But sorry，Shopping魔份人唔係幾浪漫，毛公仔呢家嘢就免了。 沿途除咗攤檔、餐廳之外，仲有好多人表演添！好似有音樂。 甚至有人表演吞劍， 嘩就咁就吞咗落肚，睇到都驚驚。 可惜冇人表演心口碎大石... 行完flea market，時間尚早，一於衝多個景點，揸車上荷伯特最高點 - 威靈頓山。 登上荷伯特最高峰 上到車，set好GPS，就馬上出發。一路上山，越行越唔對路，點降GPS上嘅路會消失咗嘅? 停低問路人，佢話我哋知原來呢路唔啱架，仲話科技呢家嘢唔多可信。好啦咁我哋跟佢嘅指示落返山再由另一邊上山，今次終於搵啱路lu! 一路上山，睇住啲植物由大大棵嘅溫帶樹木，一路變矮，最後得返一棵棵嘅寒帶植物，因為越高就越凍越大風架! 你睇吓，一片荒涼。 近睇其實都幾靚。 呢度嘅溫度真係同地面差好多，但係可以俯瞰成個荷伯特，係咪好靚呢? 當然唔少得同最地標合照啦~ 你睇我對拖鞋同件中褸係咪非~常唔襯呢哈哈！ 山頂其實冇咩嘢睇，留咗一陣就返返落山嚕。由於食得太多西餐，今日要搞搞新意思，食泰菜！但當地真係唔知點解好興外賣平過內用，所以我哋買返酒店食！ 好味啊～～懷念亞洲的味道～～ 待續... 第一天 【魔遊記】迷人塔省 始於朗塞斯頓 第二天 【魔遊記】迷人塔省 搖籃下的白鴿 第三天 【魔遊記】迷人塔省 法式浪漫甜蜜 第四天 【魔遊記】迷人塔省 最醉人東海岸
