台灣手信開箱 ! 5款網購台灣伴手禮

瀏覽人數:215
發佈於 2020.05.05

台灣可以話係手信天堂,但由於最近因為疫情關係,真係唔知幾時先可以去到台灣。不過小妹最近喺香港一個台灣代購網度買到一直好想食嘅台灣手信!

1) 最純正鳳梨酥@微熱山丘
講得係純正鳳梨酥,係因為佢完全冇用到冬瓜蓉,只係用咗台灣本土出產嘅鳳梨肉做餡,所以食落係啖啖鳳梨香,而且仲食到鳳梨嘅果肉纖維,認真真材實料,但係如果鍾意食甜鳳梨酥嘅朋友可能唔太鍾意,因為佢完全係鳳梨肉整出嚟,有啲貼近土鳳梨酥,甜度方面要睇該季鳳梨嘅酸甜度比例,所以食落冇傳統鳳梨酥咁甜膩,但小妹就係鍾意唔會太甜嘅純鳳梨酥,佢冇傳統冬瓜蓉鳳梨酥咁過份甜,又冇土鳳梨酥咁酸,恰到好處。至於酥皮就比一般鳳梨酥薄,所以唔屬於太鬆化類型,但就可以包到好多鳳梨肉。佢嘅皮會整得甜少少,可以中和鳳梨肉嘅酸。

2) 「酥」界新貴蘋果酥@微熱山丘
微熱山丘早排仲推出蘋果酥,又係用純果蓉做餡,同樣真材實料,冇溝過其他果肉。不過唔知係唔係蘋果好容易會發酵變得有酒味,所以蘋果酥食落甜度稍高。酥皮部分反而覺得唔係太甜,但面層就有一層薄薄嘅白糖霜,食落又同鳳梨酥有唔同嘅風味。

3) 人氣鳳梨酥@佳德
佳德係傳統鳳梨酥嘅代表,採用一半冬瓜蓉加一半鳳梨蓉做餡,食落甜度屬高,牛油外皮相對較厚,但酥香鬆化,喜愛傳統鳳梨酥嘅朋友一定要買嚟試。

4) 70%特濃朱古力卷@海邊走走
一改傳統蛋卷嘅做法,用70%特濃朱古力加蛋漿整成,朱古力比例達8成,所以成支都係深啡色,而且仲要粗過手指,食落啖啖香濃朱古力味,正!

5) 滿滿肉鬆卷@海邊走走
眾所周知,台灣人熱愛肉鬆,而將肉鬆融入蛋卷中一啲都唔意外,反而令傳統蛋卷更多咗一番風味。但佢同澳門買嗰啲鳳凰卷又好唔同,唔會話得少少肉鬆打發你,而係成條蛋卷都塞滿晒肉鬆,仲要係塞到實晒,又係另一以本傷人嘅產品,你話教我如何不愛台灣?

至於小妹喺邊間網上代購店就唔作公開宣傳,但歡迎大家私訊問我^^

*本站之內容由作者所提供,並不代表本站的立場。因此本站對所有博客的立場、真實性、準確性及完整性不負任何法律責任。

相關話題

收藏此文章
  • Facebook分享
  • WhatsApp分享
  • Line分享
  • 複製連結

發表評論

{{commentText.length}}個字
全部評論 {{comments.length}}

作者最新文章

更多旅遊文章推薦