【日本美食特集】遊東京我都吃了什麼﹖第一次去原來呢啲係必食﹗

瀏覽次數:809
發佈於 2020.04.20

小妹一直想打一篇第一次去東京必食嘅大特集,呢排因為疫情關係,放假就留喺屋企,終於有時間整理,好讓各位疫情一過就可Book機票去日本大吃特吃﹗究竟東京有咩好食呢﹖呢篇就係小妹幾次去日本試過嘅餐廳,畀大家做個參考。
1)時令水果&甜品放題@TAKANO
如果想盡情食日本時令水果同精緻甜品,呢間一定可以滿足到你,唔使二百蚊港紙任食90分鐘,網紋蜜瓜、甜王士多啤梨、香印提子 ... ...只要係時令都會放出嚟,就啱季節一定食到,仲有用以上水果整嘅甜品,女仔一定心心眼,不過呢度只招待女顧客,男仔想去一定要有一個女性朋友帶去食,如果唔係就惟有望門興嘆喇﹗
地址:東京都新宿區新宿3-26-11 5 樓

2)享受釣魚樂趣@釣船茶屋
如果鍾意釣魚嘅朋友,不妨可以嚟呢度,可以釣魚之餘,釣到仲可以食埋佢,仲要價錢平啲呀﹗釣到魚嘅顧客仲會大鑼大鼓話畀全場知,真係氣氛一流﹗當然你唔想釣,都可以直接嗌魚食嘅,煮法任顧客要求。
地址:新宿區西新宿3-2-9

3)人氣千層蛋糕@Harbs
成日覺得Lady M千層蛋糕甜又漏嘅朋友,可以一試呢間水果千層蛋糕,同樣皮薄,但餡就豐富到爆,皆因佢唔只有Cream,仲有多種日本時令水果做餡,酸甜有致嘅水果配合香滑忌廉,一啲「漏」嘅感覺都冇。呢款水果千仲要係人氣Number 1,每日限量,賣完就冇。如果遇上草莓嘅季節,仲可以試到草莓千層。
地址:東京都新宿區新宿3丁目38−1 ルミネエスト新宿B2F

4)香濃豚骨@博多天神拉麵
源自九州地道白湯拉麵,主打豚骨湯拉麵,除咗知名嘅一蘭之外,較出名就係佢。門面雖然唔屬於華麗派別,裝修比較平民貼地,但勝在以濃厚豚骨湯取勝。
地址:東京都新宿区新宿3-22-13

5)即炸天婦羅@船橋屋
呢間百年老店以即叫即炸天婦羅聞名,各式野菜海鮮天婦羅食落酥香脆口,一啲都唔油膩。
地址:東京都新宿區新宿3-28-14

6)近三百年嘅鰻魚飯@伊豆榮
位於上野嘅伊豆榮,創於18世紀,至今有近300年歷史,醬汁同鰻魚烤法都係世代秘傳。
地址:東京都台東區上野2-12-22

7)放工Relax集散地@思い出橫丁
以居酒屋聞名,好多日本打工仔放咗工都鍾意嚟呢度食吓拉麵串燒,飲番幾杯,不過近年多咗遊客,日本人已少咗。而小妹最鍾意呢度嘅串燒店,即烤串燒配上熱清酒或啤酒,認真唔錯。
地址:東京都新宿区西新宿1-1-1

8)原宿必食可麗餅@Angels Heart
原宿有多間知名可麗餅,其實食邊間都冇所謂,而Angels Heart只係其中一間出名舖頭,以水果同雪糕作為可麗餅嘅餡料,食落香甜冰凍。
地址:東京都渋谷区神宮前1-11-6

9)美國至Hit龍蝦包@Luke's Lobster
來自美國紐約嘅龍蝦包,每日開舖都大排長龍,而喺原宿嘅呢間分店就更加唔使講,每次都要等足半個鐘起跳。每個包都用足一隻波士頓龍蝦嘅蝦肉,真係每啖包都啖啖龍蝦肉。
地址:日本東京都渋谷区神宮前6丁目7-1

10)大粒士多啤梨Cake@果實園
如果你對士多啤梨有情意結,呢間甜品店絕對唔可以錯過,選用日本各地知名士多啤梨,製造各款甜品,令一眾少女心心眼。
地址:東京都渋谷区代々木2-7-7 南新宿277ビルB1F

11)體驗女僕陪食@Home Cafe
為日本宅男熟悉嘅女僕Cafe,主打嘅唔係嘢食,所以嘢食真係好一般,惟一嘅係體驗秋葉原文化,同女僕傾吓偈,玩吓遊戲,影吓相,又係開心一Day。
地址:東京都千代田区外神田1-11-4MITSUWA 3F~7F

12)特平限定烤全牛@俺的燒肉 銀座9丁目
主打特平燒全牛,以港紙600蚊就可以食到牛嘅唔同部位,仲要用牛形嘅盤盛載,等你知道食緊邊個部位。每日限定5盤,想食就一定要提早去排隊。
地址:東京都港区新橋1-5-6 銀座第三誠和ビル1F

13)連日本人都唔講禮儀嘅平價迴轉壽司@大江戶
位於新宿嘅平價壽司,唔係話特別好食,但就一定係平,新鮮度亦高,$150日元一碟兩件,真係平到痴咗線。壽司師傅會不定時擺幾碟拖羅壽司出嚟,如果你見啲日本人喺度搶,你就知嗰碟係好嘢。
地址:東京都新宿区西新宿1-3-1 新宿サンフラワービル 1F

14)人氣烏冬鍋@三國一
創業於昭和29年,開業至今逾60年,以關西風醬油為底嘅手打烏龍麵聞名,最鍾意佢嘅壽喜燒烏冬,湯汁甜甜哋有牛肉香味,烏冬沾滿湯汁,正。
地址:東京都新宿區西新宿1-13-10

15)自由之丘必食班戟@FLIPPER'S
去到自由之丘呢個甜品集散地,一定要試呢間主打即整班戟嘅店鋪,以入口即融鬆軟著稱嘅厚班戟,因個人喜好自行選擇鹹、甜兩食,果然係人氣之選。而最正嘅係,店內採自然光,仲有落地大玻璃對住棵櫻花樹,春天嚟食多咗一份詩情畫意。
地址:東京都目黒区自由が丘1-8-7 3F

16)松葉蟹放題@北之家族
唔使港紙$300就可以食到松葉蟹放題,可以揀燒同Shabu Shabu,而且食足兩個鐘,仲有壽司刺身沙律蟹肉茶碗蒸做前菜,極有誠意。
地址:東京都新宿区歌舞伎町1-16-3

17)「寺」外的美食@淺草雷門寺食街
嚟淺草寺除咗去打卡,最重要係呢度仲有美食,皆因一條食街直伸延至雷門寺。例如大學芋(蜜地瓜)、傳統和菓子、雪糕銅鑼燒、士多啤梨大福、黃豆粉糰子等,完全配合古色古香嘅景點。
地址:台東區淺草

 

18)海鮮愛好者天堂@築地市場
呢度刺身店、壽司店、丼飯店林立,仲有即開生蠔海膽做前菜,真係海鮮愛好者嘅天堂。
地址:東京都中央区築地

咁多間大家食過幾多間呢﹖未食過都唔緊要,快啲Bookmark咗佢,等疫情之後再去大開「食」界﹗

*本站之內容由作者所提供,並不代表本站的立場。因此本站對所有博客的立場、真實性、準確性及完整性不負任何法律責任。

相關話題

收藏此文章
  • Facebook分享
  • WhatsApp分享
  • Line分享
  • 複製連結

發表評論

{{commentText.length}}個字
全部評論 {{comments.length}}

作者最新文章

更多美食文章推薦