Jamie's Italian喺香港開咗咁耐，一直都冇時間去試，早前相約朋友食飯，終於喺云云餐廳嘅List上面騰出一個空間，試一試Jamie Oliver呢位名廚旗下嘅餐廳。

醃製香脆魚類（$94）
左起:迷你酥炸海鮮、蒸煮貝殼類海鮮、紅菜頭醃製三文魚、橄欖配法式麵包。
另配美味魚醬、檸檬蛋黃醬及水牛芝士。

木板佐食以4個意式罐頭支撐，幾得意!

Jamie's Italian係Jamie Oliver旗下最大規模嘅餐廳，主打傳統意大利美食，由於Jamie一直崇尚健康飲食，香港分店標榜使用有機食材同自然放養嘅動物肉類，小妹不嬲支持天然食材，對於Jamie嘅飲食理念抱持欣賞態度，其中木板佐食（$94/每位）嘅食材最具特色！

醃製肉類（$94）
茴香莎樂美腸、開心果意式肉腸、風乾火腿配迷你水牛芝士。

以Jamie's Italian嘅特色木板盛載嘅各式醃製小食，配以羊奶芝士、甜辣椒醬、醃菜、橄欖等，大大突出小食嘅滋味，令天然食材味道更豐富。小妹同朋友一人嗌咗一個木板佐食，分別係醃製肉類同醃製香脆魚類，前者有茴香莎樂美腸、開心果意式肉腸、風乾火腿配迷你水牛芝士；後者就有紅菜頭醃製三文魚、蒸煮貝殼類海鮮、美味魚醬、迷你酥炸海鮮及檸檬蛋黃醬。

香脆蟹肉炸飯球（$78）

除咗意式前菜，小妹亦試咗香脆蟹肉炸飯球（$78），以飯包住蟹肉，混入茴香、豆、簿荷沙律，放入滾油炸，外層香脆可口，內層鬆軟帶淡淡蟹肉嘅鮮甜，配合柚子檸檬乳酪醬，清新去除油膩感，不過小妹覺得份量上略嫌有啲細，性價比唔高。

意大利蕃茄雞肉薄餅（$185）

食意大利菜，一定要食Pizza，本來想試吓極具香港特色嘅香港風情辣味薄餅，但因為咁啱喉嚨唔舒服，唔可以食辣嘢，所以就嗌咗意大利蕃茄雞肉薄餅（$185），以有機雞肉、慢煮有機車厘茄、水瓜榴、橄欖同水牛芝士作為材料，放入石製烤爐烤焗，薄餅皮充滿經石爐烤過嘅酥香，同一般Pizza連鎖店用電爐烤嘅味道超級唔一樣！

店舖唔係一般意式餐廳嘅設計，天花牆上充滿日式同越式混合嘅壁畫，極具特色，喺咁特別嘅環境下，小妹當然要同朋友小酌兩杯啦！

店名：Jamie's Italian

電話：3758 3333

地址：尖沙咀廣東道17號海港城海洋中心4層412號舖

營業時間：星期一至日: 12:00-23:00